Jesse I op bezeuk biej wageboewers

Op vriedaagaovend 22 jannewarie j.l. haet oze Sjtadsjeugprins Jesse I van D'n Uul same mit zien adjudante Daan en Justus en 't breurke van Justus; Severijn en de moder van Jesse; Inge de boewers van de Kienjerwage bezóch.  't Waas veur oze Jeugprins Jesse I eine sjoone aovend, want hae kreeg veur den eerste keer te zeen wie de Kienjerwage d'r oet zuut en  wie d'r waert gemaak.  Ónger bezeelende leijing van Frans Stoks waert al inkele maonje in de hal van Stoks-Van Bergen gelas, gezaeg, getùmmerd en  gesjilderd aan de Kienjerwage van D'n Uul, dae mitduit aan den optoch in Remunj op vastelaovesmaondaag. 
Jesse I en zien adjudante Daan en Justus ware erg ónger de indrök van de wage en bedankde ederein van herte veur zien/häör inzat.  Sjtadsjeugprins Jesse I had ein sjaol mit nonnevotte mitgenaome, diej dan ouch prima sjmaakde biej de kóffie, en d'r waas ouch nog flaaj, dus det waas good geregeld dao.  Nao ein uurke höbbe de Prins en zien adjudante aafsjeid genaome van dees miense en van de wage, Jesse I sjpits zich noe al op den optoch, net wiej zien adjudante Daan en Justus en ouch Severijn, 't breurke van Justus, want dae moog mit den optoch mit in de trèkker.  Boewers van de Kienjerwage, bedank veur dae sjoone wage en dae ammezante aovend!