Kienjermiddaag 2010: de Prins van Griës is euverwonne!

Nao inkele maondje van intensieve veurbereijing waas aafgeloupe zóndaag de kliemax veur alle deilnummers aan de Kienjermiddaag. Allebei de veursjtellinge ware heel drök bezoch en tiejes de naozit ware der allein mer posietieve rejaksies.  De Prins van Griës, dae neet van kleur heel, perbeerde mit zien Uulskuukes en trolle Youri te helpe om Jeugprins te waere. Aan de kleurige kantj waerde Lowieke door zien vriendin Marieke en door het leeve echpaar Sahra en Eric-Jan-Paul geholpe ziene druim om Jeugprins te waere waor te maake.  Griës taege euver kleur, kwao taege euver good; zo wie gebroekelik haet gelökkig ‘t gooje, de kleur en ‘t plezeer gewonne. Vors Sybert zelf haet oeteindelik Lowieke es Jeugprins oetgerope, naodet de Prins van Griës toet inkeer waas gekomme. Daonao haet Prins Jesse I nog de dans van zien Kienjergarde aangebaoje en waas “de tied van griës veurbiej”.  Daomit is der door de kienjer van Remunj weer eine sjitterende Kienjermiddaag aafgeleverd mit good akteersjpel en mit ein aantal sjoon leedjes. Aafgaondj op ‘t groot aantal bezeukers en de väöle posietieve rejaksies kèn allein mèr waere gezag det idderein dae zòndaag neet in de Oranjerie is gewaes get manjefieks haet gemis. Dus… volgendj jaor allemaol nao de Kienjermiddaag!