De Vors - Vorsvrieje Gedachtes 2010
Ein prachtig motto det veer dit nuje sezoen mit zien alle op ein bezónjere meneer kinne oetdrage. Ein thema wo veer op eige wies invölling aan kinne gaeve. Ein krachtig en alleszégkend motto wo ich al eine lach van op mien gezich krieg es ich ’t laes! 
Beteikent: op ein lachender wies get doon. En laot det noe juus ein van de achterligkende gedachtes zeen van ’t Vastelaovessjpeel….! Same lachenderwies de Vastelaovend make en laevesvreugde oetsjtraole. Lache mit de humor dae op sjtraot ligkt, lache óm de sjaele wazel, lache óm ein tiepke in de buut, lache óm de kreasies in d’n optoch, lache óm nieks. Lache óm de angere en lache mit de anger. Lache es veer emes angers eine sjpegel veurhaje en lach óm de sjpegel dae ós veurgehaje waert. Lache mit de miense óm ós haer. Mer ouch lachender wies ómgaon mit get waat waal lastig is. En ouch Lachenderwies minder feine dinge óngerling oplosse… Ouch lachenderwies ómgaon mit de erns van ’t alledaagse laeve…
In dit waord zeen twee wäörd mit ein verbónje. Lache en wies … De wieze Uul dae lacht … D’n Uul duit ’t Lachenderwies dit jaor.
Oze Sjtadsprins en oze Sjtadsjeugprins gaon ós Lachenderwies veur in ’t sjpeel en gaon d’r veur zorge det veer mit väöl plezeer same vastelaovend gaon viere.
Sjteit veur alle laeftieje, van klein toet groot en van jónk toet aad. Same make veer lachenderwies ’t sjpeel van Vastelaovend.
Lache beteikent ruum vertaald; door mitein te lache laote miense zeen det ziej gein kwaoj bedoelinge höbbe en det m’n zich óngerling aksepteerd. Lach ins nao emes en kiek dan waat gebeurt … Es ’t good is kump eine lach trök … Eine lach wirkt aansjtaekelik en óntwaopend. Dao mot meer gelache waere!
Veer kinne allemaol de oetdrökking: “Eine daag neet gelache is eine daag neet gelaef …!” En det is helemaol waor. Laot ós de ernst van ’t dagelikse laeve aeve op ziej zette en ós laote gaon “in de vaart det zotheid”.
Ich wins uch allemaol eine sjitterende, sjone, gezellige, sjtraolende, zalige, plezerige Vastelaovend. Mer baovenaql geneet d’r van….,
LACHENDERWIES
Vors Sybert I