Zjwetskammezaol 2009
Wies wäörd bie de oetreiking van de nuuje Zjwetskammezaol.
Zeet waalgekomme, dorslöstige hoogheid, Danny I,
es 66e incarnatie van de sjtadsprins van Remunj;
Zeet waalgekomme, prinselik gezelsjap;
Zeet waalgekomme, maedjes en aanhangk van de Prins en ’t prinselikke gezelsjap;
Zeet waalgekomme Vors Sibaer,
dae ’t verdeent om de 11e incarnatie van de vors van D’n Uul te waere geneump;
Zeet waalgekomme Uul, dae eewig en onsjterfelik is in zien sjoonheid,
kiek mer nao de veurzitter;
Zeet waalgekomme, geer allemaol diej hiej zeet en vrunj zeet van ’t gesjreve vastelaovesgeveul;
Hoogheid,
Geer zult uch aafvraoge: wo zeen veer hiej terechgekomme, waat mot det hiej?
Waalnoe, geer zeet hiej om eure UUL in ontvangs te naeme, en dalik ouch eur Uulewepperke.
Geer vraog uch aaf: waat gebroek dae miens meujlikke wäörd?
Toegegaeve, dit geit inderdaad neet euver neutjes. Incarnatie geit namelik euver ’t aannaeme van vleis.
Daomit bedoel ich neet de kermenaaj. Mer om miens te waere mot de geis (dae zich meujteloos kint verplaatse door ruumte en tied) ’t vleis ingaon (det zaet teminste de theorie).
Det sjient nieks vraemds te zeen. Geer höbt det zellef gedaon wiej geer Danny waerde; Math haet det gedaon wiej hae Math waerde. Noe is onnog de Prinselikke geis in uch gevare.
Mer ’t is nog sjoner! Aan väöl luuj bringk geer verlossing … van de erns. Geer zeet dus eine verlosser. Veer herkinne uch aan de teikens! ’t Zol toch geine toeval zeen det geer es 66e Prins van D’n Uul Remunj regeert, in ’t jaor 2009. 2 Plus 9 zeen 11 … en 1 en 1 is twee. Geer zeet, ein kiendj kint de was doon.
Geer mot daobiej weite det de Prins van Remunj neet altied in vleis en blood haet rondjgeloupe. Lang veurdet geer det deej, besjting geer al in de kolomme van ’t Schwetskammezaol. De UUL, dit blaad, sjtamt dao van aaf. Op zien meneer is ’t blaad det veer uch aanbeje ein incarnatie van de vastelaovesgeis van dees sjtad, op pepier.
Leve Prins, good det geer hiej zeet. Sjrievers komme en gaon, dao zeen veer dit jaor weer ins aan herinnerd, ’t göldj ouch veur teikeneers en fotografe. ’t Laeve maak eine cirkel, geit rondj en rondj, mer es de raedjes zich pakke kan d’r get bezonjer sjoons gebeure. Eur Prinsjap zal dao ein bewies van zeen. Ich bön neet onbesjeije es ich zegk det de UUL en de Uulewapper det al zeen. Mer laot ich Ingrid, det uch dalik zal toesjpraeke, neet ´t graas veur de veutjes wegmeije.
Dink neet det zo ein blaad oet de loch kumpt valle, wiej ein Uule-ei. Ich wil hiej gaer ederein dae mitgewirk haet besjtute, mer ich neum gein name om sjloersigheid te veurkomme. D´r is meer aan dit blaad gesjroef dan eine miens kint zeen: d’r is gesjreve, geteikend, gefotografeerd, gegoogled, gemanipuleerd, gecorrigeerd, geretoucheerd, geworve, gesjponserd, gezjweit en gekuump, gevlook, opgemaak en gedrök. Mer mit waat veur ein resultaat! Geer moog uch d’r noe zo van op de heugte sjtelle.
Mer eers wil ich dit nog kwiet. Veur ein sjtök, det euver ein bepaold saort van pluzig beeske geit, waas de redaksie op zeuk nao ein aafsjloetend waord. Veer koste aevel nieks bedinke. Kint geer uch veursjtelle wiej aangenaam de verrassing waas om oet eure mondj eur motto te heure: Neutjes zeen ouch lekker. Daomit höb geer medein mitgesjreve aan dit blaad.
Danny, ich bedoel Prins, veer wins uch (ich moog hiej names de ganse redaksie en häöre entoeraasj sjpraeke) eine feine, sjone, lekkere, opgeruumde, gezonje en zalige Remunjse vastelaovend.
Estebleef. Hiej höbt geer ‘m.
Tebaksleid, anno 2008
De loch waas noojt zo praoper, mer de kastelein is boos
De kefee is nog waal broen, mer dan höbs-se ‘t gehad
De siegrette-rek is laeg, de asbek zeen weggezat
Noe is zien zaak roukvriej en ’t persjeneel werkeloos
Bah, waat veul ich mich bekoch, hiej binne mien eige moere!
Wo is dit om begos? vreug hae zich zjwiegend aaf
Akseinze haet de sjatkies gaer, dao is zie aan versjlaaf
Mer ich kin neet laeve van de loch, kos dae Klink d’r eine sjoere
Hae krieg ’t bald te kwaod en reup: noe allemaol nao boete
Ich bön dees waek al twee keer bekeurd!
Rouk estebleef op sjtraot, Drek sjtaon ze weer veur de roete
Daag nao daag waerd op dees maneer zien hert versjeurd
‘t Doert neet meer lang en hae mot sjloete
En mit de rouk waerd ’t oetgaonslaeve naogetreurd
De lelie
Waat is ter mit oos lelie loos
Det de sjtad eine kekke knager koos
Zol zo ein beeske zich dan baeter lene
Om de belange van Remunj te dene?
Home sweet home
Droet mit dae knager
Doot mich mer de bloom
Jao, de troetelfactor is get waerd
Mer ein lelie greujt oet eige aerd
Is deep geworteld in oos verleje
Mer glad vergaete – vertel mich de raeje
Home sweet home
Droet mit dae knager
Doot mich mer de bloom
Sjoon es ze in häör vaeske sjteit
Sjoner nog es ze aope geit
Om te zeen ’t sjoons, om te ruke ’t feins
Ouch euver de päöl is de lelie ‘Nummer Einz’
Home sweet home
Droet mit dae knager
Doot mich mer de bloom
Remunj waat maaks se ’t toch bontj
Bloome gaon hiej gaer in truupkes rondj
Wille zich sjiek aankleije en sjoon toje
Zeen neet hie om mit neut te knoje
Home sweet home
Droet mit dae knager
Doot mich mer de bloom
‘t Is hie neet om beeste te doon
Mer om ongergood, mode, asseswaars en sjoon
Sjoonheid is ein Remunjs ideaal
Gemeintebesjtuur, ich wis ‘t waal
Home sweet home
Droet mit dae knager
Doot mich mer de bloom