’n Gans nuuj sezoen wo ‘n nuuj liefsjpreuk bie heurt oftewaal; tied veur ‘t jaormotto 2020 van Sjtadsvastelaovesvereniging D’n Uul.
Veer vraoge aan oos leje óm de herses obbernuuj te laote krake en alle kreatieve hersesjpinsels op pepier of sjirm te zitte. Dink kunstig, mit väöl fantezie, probeer orzjeneel en vinjingriek te zeen. ’t Kin neet gek genóg waat ós betruf. Det motto waert netuurlik ouch weer gedrök op oze jaormedalie en ónger ’t sezoen oetgereik aan miense binne de vereniging die zich ’n eerste jaor höbbe ingezat veur D’n Uul en dit döbbel en twaers verdeend höbbe.
Ein van de sjpaarzame eise is det ’t logo van de vereniging en ’t sjtadswaope van Remunj drin verwirk mótte zeen. Es geer hie meujte mit höb en hulp kin gebroeke, laot ’t dan aeve weite. Meugelikerwies kinne veer uch ’n hendje helpe. Dus haol de penne, potloje of toetseborde mer teveursjien en gooj al eur iedeje droet. Mesjiens kump eur motto dan waal op de 2020 jaormedalie te sjtaon!
In juni zal ’t Dageliks Besjtuur van D’n Uul bekieke wèlk sjoon motto de eer haet óm kómmend sezoen op de jaormedalie te sjtaon. Geer kint eur motto, gaer veur vriedaag 31 mei, opsjture nao: secretaris@dn-uul.nl.
