Sjtadsvastelaovesvereniging D’n Uul itteleert ein deil van häör gesjiedenis vanaaf 2 jannewarie in twee ittelazjes in de Remunjse binnesjtad. De eerste ittelaazj is ingerich oppe Hamsjtraot 19 mit es thema: "1946, de eerste Vastelaovend nao de oorlog". De tweede waert ingerich oppe Heilige Geissjtraot mit es titel: "de kuns van Vastelaovend".
Alles vanoet de gedachte det waat Corona-proof kin kint doorgaon omwille van de tradisie en de toekóms van de Vastelaovend en 't jaormotto van D'n Uul: "Vastelaovend, mit aafsjtandj 't sjoonste!".
Wie waal d'r dus op de eerste zaoterdaag van 't nuje jaor geine Sjtadsprins waert oetgerope, zolle de ittelazjes van dae daag toet asgoonsdaag te bewónjere zeen.
In de ittelaazj aan de Hamsjtraot is róndjóm 't thema: "De eerste Vastelaovend nao de oorlog 1946. "Veer laeve nog, waem duit ós get"" ein deil van de ittelaazj ingerich mit Uul-herinneringe o.a. aan de handj van objecten euver Uule-Prins Rein I † 1946 en vanaaf 1962 t/m 1968 de twee Uule-Vórs Rein I.
In 1946 waerde óndanks de distribusie en bónne, toch Vastelaovend gevierd. Óndanks alle versjrikkinge tiejes de oorlog, waerde d'r naogedach euver 't viere van de eerste nao-oorlogse Vastelaovend. D'n Uul maakte ein pergram, bals waerde georganiseerd, de Zjwetskammezaol kwaam oet en d'r waerde eine Sjtadsprins oetgerope: Prins Rein I Pijls † mit ziene alles zégkkende liefsjpreuk: "Veer laeve nog, waem duit ós get".
Door fotoos en documente waert ein biezunjer Vastelaoves-tiedbeeld gesjetsj.
Te zeen zeen unieke documente oet 't Uulearchief aangevuld mit in broekleen gegaeve objekte.
Beveurbeeld de Prinsemöts van Rein I en later zien Vóstemöts, de oorkonde oet 't Limburgs museum en angere Vastelaovessjpulle oer partekelere kolleksies. Die laote de "Remunjse Vastelaovend" van 1946 en de jaore daonao herlaeve.
Daonaeve is d'r ruumte veur ein kórt euverzich Raod van XI mötse van dae tied toet noe.
Aangevuld mit "Uule-jaormedalies,sjilderieje en Uule-memorabilia oet versjillende periodes.
Zo wild D'n Uul juus noe en mit bewuste keuze veur deze bezunjere tied, wó 't kint de Vastelaovend oetdrage.
Ein tweede ittelaazj waert ingerich oppe Heilige Geissjtraot mit es titel: "de kuns van Vastelaovend", mit o.a. sjilderieje van Gerard Nizet dae al versjilende jaore prachtige teikeninge maak in de Zjwetskammezaol, dae netuurlik dit jaor ouch weer zal oetkómme.
De Uule-eksposisie is ouch de bekindmaking det in 't zelfde pandj nao Asgoonsdaag de begane grondj waert verboewd toet permanente Uule-fanstore mit museale invulling.
Nao de verboewing zeen d'r neet allein Uule-artikele te koup mer waert de ganse veurmalige winkelruumte gesierd mit historiese Uule-objekte en aopegesjteld veur pebliek.
Sjtadsvastelaovesvereniging D'n Uul is d'r bezunjer greuts op om op dees meneer ein sjtepke veuroet te zette in 't aopesjtelle van häör sjatkamer mit riek gevulde Uulehistorie.
