Goonsdaag 29 juli 2020 is oos erg gewaardeerd Uulelid Ed Allers, veurzitter van oos TC (Technische Kemissie), op 69-jäörige laeftied gesjtórve. Zowie de meiste van uch weite waar Ed al langere tied krank en haet Ed jaomer genóg ’t laeve los mótte laote.
Ed maakde väöle jaore deil oet van oos Uulefemieie. Es leefhöbbende man van Senator en Eredame Marjo Allers-Lehnen, mer baovenal mit zien tomeloze inzat es helwirkende krach op de achtergróndj binne D’n Uul. Hae waar ein van de drievende krachte achter väöle edisies van de Leedjesaovend en noe alweer inkele jaore de grote kertrèkker van oos TC. Boete zien aansjturing en fysieke inzat binne de TC, waar Ed ouch veural de samebinjende faktor. Zèk mer gerös; de kroepaolie dae alle TC-rajere good leed drejje, ouch es ’r sjpraekwaordelik ins get zandj tösse die rajere dreigde te kómme. Ed zorgde d’r dan (ouch weer op de achtergróndj) veur det de verbinjinge toch soepel waerde gehaje en det alles leep zowie ’t mós loupe.
Vanwaege zien verdeenste veur D’n Uul waar Ed gedekoreerd mit ’t Offeseerskruuts.
Oos gedachte gaon oet nao Marjo, Roel, Emmi en alle femielie en vrunj. Veer winse häör väöl krach in deze meujelike tied.
