Remunj 2009.
Höb geer uch waal ins aafgevraog waat’r veur D’n Uul waar?
Beveurbeeld wiej de vastelaovend vreuger gevierd waerde in Remunj, veur 1936, dus veur d’n oorlog?
Es geer ’t allemaol zo paraat höb dan is det prima. Mèr es geer ’t neet weit en uch achter de ore krats, weit dan noe det d’r ein book is det uch de antjwaorde gif.
In oktober versjient bie oetgaeverie Jeube Press (Remunj) ein sjtudie euver de Schmookers, diej aktief ware tösse 1898 en 1936. D’n Uul dank ziene naam en zien Zjwetskammezaol aan dit gezèlsjap, det veer es oos veurluipers zeen. Aan de Schmookers danke veer aevel ouch det veer in dees sjtad uberhaup nog vastelaovend viere. Want wiej de vastelaovend veur WO I ouch bleujde, in de waereld van nao 1918 – ouch in oos sjoon sjtad – waar neet ederein van de vastelaovend gesjarmeerd. De moraalridders kwame en bleve aan de màch en de leefhöbbers van de authentieke Remunjse vastelaovend krege lange tied ein zjwaor piep te rouke. Aevel de Schmookers hele de sjtömming d’r in en hele paol.
‘ “Hoerah! Dao zeen ze weer!” De (10) Schmookers: ein Remunjse gesjiedenis, 1898 – 1936’ vertelt uch ’t ganse verhaol van de opkòms, heugtepunte en ongergank van ein uuters geleef Remunjs gezèlsjap. Waat dudelik waerd, is det Remunj nog väöl meer aan dees getalenteerde en dapper mèn te danke haet. Het is ein ongerhajend verhaol, det uch leut kinnismake mit ’t Remunjse verenigings- en sosjeteitslaeve in de aaje tied, wiej d’r vol-op gezonge, gesjpeeld en gedàns waerde op soirées amusantes (noe: bontje aovende). Daomit herlaeve de tieje van de aaje Schinderhannes, de Kapitein van Köpenick, de opera Meneer Prikkebein van Felix Routs en neet te vergaete de drie Remunjse Revues van de jaore twintjig …
“Hoerah! Dao zeen ze weer!” is gesjreve in ’t Remunjs. Het book telt leefs 208 pagina wo-van 20 pagina’s foto’s en aafbeeldinge. De hoofrolsjpelers komme zellef oetveurig aan ’t waord in citate. De sjriever is Jean-Philippe Laugs (Remunj, 1962), dae geer kint es sjriever/hoofredakteur van ’t Zjwetskammezaol (D’n Uul) en es arties van Sirkes Willems.
"Hoerah!" veur Van Reij en Kemp;
Wethajers naeme "1e exemplaar" in ontvàngs
Op zondaag 11 oktober waerde in intieme kringk in Kefee Willems (de Sirk) 't eerste exemplaar van 't book "Hoerah! Dao zeen ze weer!" euverhenjig aan de wethajers Jos van Reij en Wim Kemp.
't Probleem waem noe eigelik 't eerste exemplaar ging kriege waerde henjig omzeild door allebei 't bäöveste exemplaar oet de eerste doos te gaeve (diej persies twee sjtapels telde; gein gesjtechel meugelik).
't Waar eine sjoon Remunjse happening wo de Schookers zaliger zeker greujts mit zòlle zeen gewaes.
D'r waerde sirjeus gekald mèr ouch waerde d'r sjoon sjlaeg gemaak. Zèngers van de Maerelingk zònge de sjterre van de hemel, geholpe door de aanwezige. Dao-onger de president, sikkertaris en vors van D'n uul, artieste van Sirkes Willems, mitwirkers van de Zjwetskammezaol en perseunlikke geneujde.
"Hoerah! Dao zeen ze weer!" vertelt de gesjiedenis van de Schmookers en de vastelaovend in Remunj, euver de periode 1898 toet 1936, wiej ozen Uul waerde opgerich.
't Book, gesjreve door Jean-Philippe Laugs, is sins 12 oktober te koup in de bookhanjel (Plantage, Boom) en bie Sigarehanjel Janssen-Quicken en Kefee Willems.
De pries is euro 13,95.
Het is ouch op Ebay te koup.
Inlichtinge: info@jeube-press.net.