Eerste book veur Dolf Wong
Remunj – Op 27 oktober 2013 versjeen bie oetgaeverie Jeube Press ’t book “De Sjtad van Bacchus”. In dit book waerd de veurgesjiedenis van de Remunjse vastelaovend ongerzóch en opgeklaord. Veur ein selék gezélsjap van geneujde en intimi booj de sjriever, Jean-Philippe Laugs, in Kefee Wullems ’t eerste eksemplaar van dit nuuje book aan aan de grote Remunjse kunsteneer Dolf Wong.
D’n Uul besjteit sins 1936 mér Bacchus haet altied de pepiere gehad om de aajste laevende vastelaovestradisie van de wieje omtrek te waere geneump. Jean-Philippe Laugs wool ’t gaer presies weite en is ein paar jaor geleje gaon grave en sjpitte nao de kern van de zaak. Diej zeuktóch haet noe es oetkóms det ’t bacchusdrieve mit sjtelligheid ein tradisie is oet ’t midde van de 17e eew, neet aajer, mér ouch neet jónger! Door de jaore haet zie weite sjtandj te haje, ondanks soms hértelikke taegewirking van autoriteite. Geer weit allich det D’n Uul in jongste jaore, bie ‘t 1x11 in 1947, de bacchustradisie nuuj laeve haet ingeblaoze nao 26 jaor van ballingsjap.
Jean-Philippe Laugs had ein waal heel perseunlikke raeje om dit book aan Dolf Wong aan te beje. Dhr. Wong haet namelik ein enorme biedrage geleverd aan de Remunjse vastelaovend, o.a. mit teikeninge veur de vastelaovesgezét Razende Moerbode. Ein bezonjer sjoon teikening van ’t bacchusdrieve, door Dolf Wong gemaak in 1964 veur bie ein sjtök van Pierre Huijskens in Elseviers Waekblaad, haet hem van kienjsbein aaf geïntrigeerd en oeteindelik geïnspireerd om ’t oet te zeuke en de pen op te pakke. Waat bliek? D’r vélt heel get nuujts te vertélle euver Remunj, Bacchus en de vastelaovend! (Waat, det mot geer zellef mér laeze in ’t book …)
De Heer Wong noom ’t eerste eksemplaar gaer in ontvángs en tuinde zich vereerd en geraak. Op de vraog waorom hae de bacchuspop in 1964 baovedimensionaal weus had oetgebeeld, antjwaorde hae in loepzuver Remunjs det hae Bacchus nao werkelikheid, dus nao zien waore aafmaetinge, op ’t pepier had gezat.
Meer info: www.jeube-press.net