KUUL, ‘t Katers-Uul-Leedjessjpektakel.

Es Sjtadsvastelaovesvereniging D’n Uul en Vastelaovesvereniging De Katers Neel, zeen veer greuts óm uch in gezamelikheid ’t volgende ónger de aandach te kinne bringe.

Op zóndaagmiddaag 26 oktober prizzentere de Katers en D’n Uul uch in gezamelikheid;

KUUL, ‘t Katers-Uul–Leedjessjpektakel.

Ónger dit gezamelik georganiseerd leedjessjpektakel kinne alle deilnaemers gaon sjtrieje óm de eretitel Vastelaovessjlager van Groot Remunj. De middaag vinjt plaats in Kefee-zaal De Sjter in Neel.

Behalve dae eretitel make de deilnaemers kans op ein van de drie plaatse die op de Sjtasiefestasie 2026 gerizzerveerd waere, mit anger wäörd; optraeje veur zón 25.000 miense! Ouch op Vastelaoves Villaasj in Neel waere drie plaatse vergaeve. Veur de winnaar is ‘n plaats gerizzerveerd veur ‘n optraeje op de 11devande11de, in oos Remunj! De pries van € 555,55 veur de winnaar is netuurlik ouch gein sinecure.

Door de gezamelike kemissie van de Katers en D’n Uul waert d’r hel gewirk aan van alles en nog get.

De begeleijing van de deilnaemers waert door ’n liveband verzorg. De waereldbekinde Hub Boesten haet mitwirking toegezag óm de beneudigde meziekarranzjemente veur de deilnaemers te verzorge.

Wilt geer mitdoon mit ‘ne cover, dan kan det ouch! Alle inzendinge waere waal in ’t dialek verwach. In de zjurering waert óngersjied gemaak in de beoordeiling van Vastelaovesleedjes en meugelike covers.
’t Insigste waat geer hoof te doon is zorge veur ‘n teks mit ‘n leedje/wies. Es geer ‘n teks of ’n melodie höb, mer ‘n leedje/wies lastig vinjt (of angersóm), dan helpe veer uch gaer mit óngersjteuning. Let waal: es arties zeet geer zellef diegene die ’t leedje ten geheure bringk, ouch ’t inzinge in de opname.

Melj uch vieje ‘n mailtje aan bie info@dekaters.nl en info@dn-uul.nl