Prins Marnix I

2017
‘Vastelaovend, det make veer’

2017 Marnix I

Nao twee adjudante ‘ne Prins in femielie Adams

Marnix I Sjtadsvastelaovesprins van Remunj

‘Vastelaovend, det make veer’

Oze dórslöstige hoogheid 2017 is Marnix I Adams, grootgetrokke in de binnesjtad van Remunj, en dao via de kleutersjool ‘De Sjteine Trappe’ de leger sjool ‘Het Munster’ aafgewèrk. Marnix I is de middelste van drie kienjer, tösse zöster Laura en broor Roland. Mit zien 34 jaor heurt d’r in ’t rieke van jóng prinse die de Uuleker gaon trèkke mit de vastelaovesdaag. Deze vruntjelike hoogheid is ‘n Uulejónk. Grootpa Jo Adams waar de direktäör van de Oranjerie en Grootmeister van D’n Uul. De moder van Marnix is Isabella Nizet van de Heringfebriek aan de Dr. Philipslaan, häöre Pa waar operazenger en zelf is zie ‘ne echte kunstemaeker, veurnamelik es beeldhouwster. Vader Karel, moelesjmeed, waar adjudant bie Roel I (1979 “Boeremoos, hie is get loos”) daoveur waar Karel al adjudant van Bair Cox gewaes dae es grootvórs door Remunj trok.


Marnix kreeg d’r nog get elders bie mit Harry Lamers dae de partner waerde van Isabella. Harry heel de Uuleprinse oppe bein es eerste liefarts bie D’n Uul van 1967 toet 2011 en is taegewaordig zelfs ‘ereliefarts’. Elise van Hout waerde de laevesgezellin van Karel.
Ome Victor heurt net es Karel ouch al bie ’t Aas ómdet dae Bavo I (1996 ‘in alle kleure, geit ’t gebeure’) de vot nao droog. In 1992 waar Victor al Bacchus gewaes!
Maar noe maak de femielie dan ouch ‘ne echte sjtap richting de adelsjtand mit Marnix es Prins. Det van dae adelsjtand vinjt de femielie waal get höbbe getuge ’t femieliewaope det gegraveerd is in zie ‘prinsekruuts’ det verder maagdelik blank is!

Es bie moder Isabella thoes de heringe veur aswoonsdig ingelag waerde en Pa bie ‘Jan en Alleman’ adjudant sjpeelde dan mót ’t vastelaovesblood waal door ‘t lief haer jage. Det bleek al wie pa en ma bie Bep en Henk van Nationaal de baom van ’t glaas al heel döks gezeen hadde. Ze ginge nao hoes en waerde dao oet bèd gebeld door Henk: “Kins se Marnix (11 jaor) op kómme haole want dae hink hie nog aan de gaam!?”.

Ónger de sjpreuk ‘Vastelaovend, det make veer’ geit Marnix aan de sjlaag in deze vastelaovend. Marnix is namelik e ‘Marnixje van alles’. In ziene legere-sjool-tied ging d’r al op kamers in Maaseik wo die Belzje ‘m get disipline biebrachte. Daonao via BC Schöndeln nao Mesjtreech óm toch al weer gauw op Gildeopleidinge aan de Breijewaeg in de benk te zitte. Det in die benkskes zitte vónj Marnix tied verknoje en daoróm waerde hae sjtukedoor. Hel wèrke en good verdene. Van sjtuke sjtapde Marnix euver nao de tummermansvaksjool en noe is dudelik wo dae sjpreuk vanaaf kump: Vastelaovend, det make veer.
Wie ome Victor mit zien hotelketen in Remunj begós, waerde Marnix gevraog óm mit te wèrke. En ouch dao is ’t ‘Marnixje van alles’. De sjtrik oppe gevel, de kersversiering, hie get opknappe en effe insjpringe en dan dao weer oethelpe. Det is wo Marnix zie wèrkplezeer oethaolt. En es se gemekkelik dien hendjes kins laote wappere dan kins se ouch de moters van alle graasmejjers en sjneeruumers ónger henj naeme bie Briggs & Stratton. Van ‘t ein kump ’t anger en noe is Marnix veural de man dae evenemente en beurze organiseert veur Briggs & Stratton. Dao reis d’r sjtad en landj veur aaf, zo-es nao de States, Ierlandj, Italie, Pole en Litouwe. En es alles weer löp dan rap nao zie leef.

……Zie leef is Sylvia Lensvelt, ‘n Rotterdamse, die nao e paar glazer beer ‘vloeibaar’ Remunjs sjprik. Same höbbe ze twee sjnoebeleers, dochter Zoë van nege en Dean van veer jaor en ze wone allemaol same oppe Buusjop Boermanssjtraot wo Marnix noe de kraom aan ’t verboewe is toet e richtig pelies. Euverigens is de moder van Sylvia ‘n echte Remunjse oet ’t Veldj. Häöre pa kump oet Brasschaat det naeve Antwerpe lik. De oma van Sylvia had in ’t Veldj zelfs e verhuurbedrief van vastelaoveskleier. Es Sylvia de woonkamer in leep zoog ’t allein maar begienepekskes. Sylvia woont al lang in Remunj en ging om get bie te verdene es garderobemaedje bie ’t Häöfke in de Veldsjtraot wèrke. Laot Marnix dao noe achter de gaam sjtaon te tappe. Geer begriep ’t, leefde op ’t eerste gezich en naodet Marnix zich get mood had ingedrónke goof d’r Sylvia zien eerste kösmuulke. Det plekde good en zo begós Marnix ziene ougappel e bietje nonchalant ten huwelik te vraoge. Nao zeve blauwtjes dan toch maar ins tegooj vraoge! Op ‘ne zónnige moderdaag serveerde Marnix óntbijt op bèd mit keersesap en zelfgebakke keukskes in hertjesvorm. Óngertösse ware de tosties in rouk opgegange en ging ’t brandjalarm aaf, ‘n oorverdouvend lewei door ’t hoes. Door de turvel ging de keersesap euver ’t wit beddelake. Es se dan nog dörfs te vraoge “Sylvia wils se mit mich trouwe” dan mót ’t waal meines zeen. En ‘ne lange Jaaaaaaaaaaaaaaaaa(o) waar ’t gevolg. Zo waerde midde in de zomer (34 graden) ‘n circustent in Berg opgezat mit alles d’rop en d’raan. Friettent, beertent en ieskraom. Daonaeve ‘n camping en es aafsjloeting e richtig vuurwerk. ’t Waar e sjitterend festival.
De adjudante van noe ware toen al ‘bestman’ want same achter edere gaam in de Veldsjtraot tapde ze beer. Dit zeen manne die weite waat vastelaovesvierders neudig höbbe: e good getap glaas beer. Nao de sjiech drónke ze ’t meiste van ’t verdeende geldj weer op in De Baog, ’t Kelderke en La Cave, óm aaf te rónje in ’t Häöfke, dao wèrkde ze allemaol. Allewiel is det kefee de Kade, FF, of de Pauw gewaore.

’t Prinselik gezelsjap besjteit naeve de prins oet drie adjudante en ‘ne matterjaalmeister.
Boezemvrunj, die zichzelf ‘de mamels’ neume en die door diek en dun gaon. Det bliek waal oet de ‘sjtreek’ die Marnix oethaolde wie d’r mit de TC van D’n Uul ’t sjmeediezere prinsebord bie Mark I Mooren in de loods ging ophaole om bie Stefan I aan de moer te hange. ‘Ne selfie mit ’t Prinsebord op de achtergróndj waerde oppe app gegoojd: “Vrunj haaj uch maar vrie in januari en februari, ‘t geit gebeure”. De men harsjtikke gek en door ’t dolle haer. Ech waor….? Waaaah, det doon veer. Thoes ginge ze alles al regele, vekanties verzat, de hele mikmak. Thoes vertelde Marnix ’t taege Sylvia en det reageerde ouch al enthousias. “moet je doen, dat is toch zo speciaal, één keer in je leven, daar ga je toch voor!”
Waat dus es ‘n ‘sjtreek’ begós waerde al e jaor later ech waor. Wie Marnix bie Mark Mooren (van de PKK, prinse keuzekemissie) nao de boerderie mós kómme óm ‘n grote autobös te bringe kwame dao ouch Jules en Tanja aanloupe. ‘Ne Uul wèt dan waat aan geit kómme. “Marnix, wils se de dórslöstige hoogheid van D’n Uul waere…” “Det wil ich en Sylvia is ’t d’r helemaol mit ins”. Dus ging ’t sjpeel loupe. Eers de adjudante vraoge en midde in de zomer is det gein sinecure, Bart zoot in Sjpanje, Maarten sjtóng e paar tente verderop en allein Alex waar nog in Remunj.
Dus in volgorde waerde gevraog. Alex goof es antjwaord: “Ech? Noe waal? Sjiek”. Ómdet oze nuje veurgenger gei gedöld haet, belde hae nao Sjpanje. Bart: “Nae?…..te gek, manne, waat sjoon”. “Nieks doorvertèlle, hè”. En zo waerde Maarten pas in Remunj gevraog. Drie adjuus en dan nog Dennis d’rbie es óngersjteuning veur alles waat veurvelt en opgevöld mót waere, allewiel ’t meiste werk’.

Oze dórslöstige hoogheid Marnix is zoget bie alle sjportclubs van Remunj gewaes. E bietje getennis, gevoetbald, bie hockey op en neer gerend, lere zeile bie de waterscouting en neet te vergaete gerugbyd. Sjportieve vent dus.

De vastelaovend begint veur Marnix allewiel op vriedigaovend, nao ’t werk verkleijd en geschmink mit de collega’s nao de Roerkade. Lekker same pinte drinke en aajhore. Zaoterdigs is de kop dan waal e bietje zjwaor maar ‘t ‘buggytreffe’ sjtart gelökkig pas om drie oer. Alle papa’s en mama’s höbbe de kienjer in de buggy gegoojd en zeen nao de Pauw gerace óm dao de middig en veuraovend in vol vastelaovesornaat aan de tap te hange, op ’t terras te sjtaon en zo neudig ‘n oetsjtepke te make nao de Röts (Dupont) en dan mit-ein frietjes bikke bie Mia. Veural gezellig same en de kienjer laote rousje toet ‘n oer of nege.
”t Gaat in de zóndig’ bie Le Jounal is dan de volgende halte. Op de sjtasie veural veur de kroeg hange en kieke waat d’r allemaol gebeurt. Dao kump de Aad Prinse Kepel mit de Aad Prinse Klup veurbie. Aafgeloupe jaor zelfs mit ‘t Aas en de Aad Damesgarde.
Örges sjteit ‘ne Sinterklaos, en oet de trein kómme aad Remunjenere die zich in de kroeg goje. Alles löp zie vastelaovesgengske en det is wo Marnix plezeer aan haet: Pilske, klasjenere, kieke, en maar weer e pilske. Dórslöstig waar hae dus al.
Dan door nao de receptie van de Prins en de route aafmake via Braam nao de Roerkade.
Vaerdig en panklaor nao hoes. Of zo-es Marnix ’t zaet: vastelaovend is veur mich e beerke, sjaele zeiver, gein verplichtinge, sjpóntaan, waat kump det kump en ’t geit wie ’t geit. Net
zo-es twee jaor geleje wie ze inins bie ’t Vleisboeket in de bös zote richting de Boukoêl. Big Bennie waar dao nog aan ’t optraeje, deej nog takkedakkedak mit ’t Vleisboeket die daonao vol op de órgel doorginge. En die oet de Boukoêl maar kieke waat die rare sjnuiters oet Remunj dao aan de beertaofel ‘sjiek’ sjtónge te zeen.
Inins is ’t dan Maondig en wurt mit de kids de optoch bekeke en daonao is ’t waal genóg vastelaovend gewaes.
Det alles wurt dit jaor e gans anger verhaol. Maar waal ein wie ’t prinselik gezelsjap ’t veur ouge haet. Op häör meneer zalle ze zich veur D’n Uul in de Vastelaovend sjtorte en wo meuglik ‘ne eige dreij gaeve aan ’t sjpeel.
Det is al mit de óngersjeijing die dit jaor ‘n echte medalie is mit e breid lintj in driekleur: rood, gael en greun. ‘n Medalie zo groot es e beerviltje óm hange en dan kins se de meziek d’r gemekkelik bie bedinke: Wie sjoon, wie sjoon, wie sjoon, dae man krieg ein medalie, dae löp noe langs zien sjoon….
Mit Marnix 1 en zien oettrèkkend gezelsjap gaon veer de Vastelaovend viere of óm mit Marnix 1 te spraeke: ‘Vastelaovend, det make veer’

Math (1) de Ponti

Adjudante:

Maarten Wagemans (41)
Getrouwd mit Saar. Zoon Mees is 5 jaor en dochter Isis bienao 4. Facilitair Management bie Kien.


Alex Sechi (40)
Veur de helf Italiaans. Getrouwd mit Renée Janssen. Twee dochters, Nova van 5 en Pippa, bienao 1 jaor. Chemicus van beroep bie Lanko International reinigingsprodukte.

Bart Deckers (40)
Samewonend mit Merel Bossers. Commercieel dirrektäör bie Lanko International reinigingsprodukte.

Matterjaalmeister:

Dennis Engelen (39, van de Ingele Geraasjes)
Samewonend mit Marlou van Boxtel en dochter Liz van 10 jaor. Wirkt bie ‘t aopenbaar menisterie in Mesjtreech (zjwaore criminaliteit). Hobby: dialek sjrieve.