De Prins

De Prins

Kirmesadel levert de nuje Prins

Spencer I, Sjtadsprins van Remunj,
Prins van D’n Uul

‘Vergaet neet te laeve’

Dèh, dao is-ter dan, eindelik nao jaore wachte is Spencer Hinzen es Spencer I de nuje veurgenger in ’t Uuleriek. En waat haet-ter d’r zin in. Eine druim dae op leek te gaon in rouk waert wörkelikheid. Al van wie d’r ‘ne kroekesjtop waas wól d’r Prins waere. De rol vervulle van Prins Vastelaovend. Waat is Spencer greuts det hae dit sezoen mit alle Uule en anger vastelaovesgekke mit löp, waat zègk ich: veurop geit!  

Eine telg van de kermisadel

De femielie van Spencer sjtóng oppe Kirmes en besjtierde dao de boetsauto’s. De vriejkaertjes die d’r kreeg boetsde hae d’r doorhaer mit vrunj. Oppe mert mit vastelaovend ónger de kathedraal, of op ’t Wilhelminaplein mit de zomerkirmes. De Hinzes sjtónge door ’t ganse landj en ouch nog in Belsj. Eine reliek van de boetsauto’s vinjt geer trök es geer euver de Vinlose waeg nao Zjwame riejt. Jaozeker, dae gereviseerde boetsauto op ’t daak van häör loods. Noe haet de Kirmesadel, die sjieke hoezer boewde in Remunj van ’t sjwaor verdeende geldj, ‘ne offiesjele titel mit Spencer I es Prins van Sjtadsvastelaovesvereniging D’n Uul.

De moder van Spencer greujde op in Bretagne tösse de menhirs en hunebedde. Daodoor haet de prins ‘ne flinke Franse sjlaag mitgekrege. En mit dae sjlaag bedoele veer dan joie de vivre, laeve wie eine Bourgondiër. Spencer’s elders, Arlette Etienne en Harry Hinzen tróffe zich wie zien moder vanoet Düsseldorf op sjtap ging in Remunj en veur- det se ’t in de gate hadde waas Spencer eine goje Frans-Remunjse mix.

Spencer reis van hot nao her

Spencer laef al 24 jaor same mit Monique Maessen oet ’t Marotte riek van Zittard. Monique zit de bleumkes boete en verköp se dan flot bie Florino. Zien dochters zeen Mae die alweer 29 jaor is en Jolie van 15. Naodet Spencer gebaore waerde es ‘ne Dónderbol, verhoesde hae nao ’t Katerriek. Daonao ging d’r in Maasmechele in Belsj in ein grote boerderie wone en belanjde dao oppe Prinsewage biej de 11/11 optoch. En det geveul, dao baove oppe wage kump natuurlik gans trök es zien vaere in de windj wejje ónger ziene eige optoch door Remunj. In ’t Kaketoeriek haet-ter ouch nog gewoond, halverwaege de Kepellerlaan zodet der döks vanoet de Sjtad doorleep nao Huib van de Pos óm dao nog ‘ne leste(?) te kloeke. Noe wone Spencer, Monique en Jolie oppe Henri Luytensjtraot, in ’t Uuleriek, Oeh-oeh…!


Monique in vol ornaat

Spencer zit al jaore in de IT-business. Eenvoudig begós in de verkoup maar oetgegreujd toet dirrektäör. Daoveur reisde d’r nao Afrika en ‘t Midde-Ooste. Eigelik altied óngerwaeges, behalve mit de Vastelaovend want dan is ’t “draan wie Verkes Wulm”. Spencer sjóng neet allein aan de teek maar ouch d’rachter. De Veldjsjtraot waas zie wirkterrein. In legendarische kefees mit dito name es The Duke, ’t Häöfke en de Baog tapde hae toet veer oer sjnachs de glazer vol. En noe nog altied kint geer uch ‘ne adelike pint laote tappe door Spencer I bie de Sjnats aan de Mert of bie Braam, ’t Uulenes, ónger ’t motto “doe duis ’t gaer of doe duis ‘t neet”. De waek zit verder propvol mit sjefere veur Autop en ‘n management-buro en es klap op de vuurpiel e dirrektäörsjap bie software gezóndjheidsoplossinge in Amerika.

De vastelaovend belaeve van achter de teek is ‘n biezónjer gebeurtenis. De bliedsjap van de luuj zeen, de kleure veurbie zeen trekke, de sjaele zeiver aanheure en zelf d’r toch beheurlik nuchter bie sjtaon. Mit zien vrunj löp d’r de kroege aaf van vriedig toet en mit dinsdig en dan is-ter zo vaerdig wie e kemuniejeske. Zien adjudante zeen ouch van die kroegtiegers. Drie sjtöks: Frank Wolfkamp (whisky-kinner), Emiel Kamzol en Aadprins Marnix I (2017). Ein internationaal gezelsjap want Frank is ‘ne echte Tukker oet Twente, Emiel haet roots ligke in Polen en Marnix is eine geweune Remunjse jóng. ‘ne Aadprins es Adjudant, det is neet volges ‘t óngesjreve protocol van de Uule….. Spencer is gebaore in 1970 en ouch door Covid is d’r eine van de aajdste prinse ever. In eder geval eine dae ouch Abraham gezeen haet. Giel I zaliger waas zelfs nog ein bietje ajer (53) en Math I (51) is noe nao plek drie geduujd. De jóngste blief nog altied Maurice I mit 23 jaor.


Spencer achter de tap biej de Sjnats

Spencer waert gepols veur ‘ne adelike titel (en Marnix waert dus adjudant)

Veer begaeve ós nao de zomer van 2020 es Marnix ziene vrundj Spencer geit helpe mit sjoefele in d’n haof. Nao get blome ‘n köpke kleiner te höbbe gemaak zaet Marnix es of ’t de geweunste zaak van de (Remunjse) waereld is, “waat tunk dich Spencer, liek ‘t dich get om prins te waere van D’n Uul?” Lang haet Spencer op dees vraog gewach maar noe ’t nao al die jaore zo rech in zien gezich gevraog waert waas ’t zeker ‘n seconde moessjtil. Marnix wól nog get oetlik gaeve maar Spencer waas ‘m al veur: “Jao, zeker, jao zeker”. “Maar doe mós toch ’t maedje aeve vraoge” zag Marnix…! “Nae nae, die vinjt det ouch good, dink ich vriewaal heel zeker…”. Geregeld, dach Marnix, maar Spencer waas nog neet oetgekald: “Maar Marnix, ich doon ’t allein es doe adjudant waers”. Marnix dach efkes good nao… en sprook veurzichtig: “Oei, ich weit neet zeker of det kint want es aadprins adjudant waere is neet volges ‘t óngesjreve Uuleprotocol”. “Maar… ich doon ’t waal” en zo waerde veur de tweede keer ‘ne aadprins adjudant. (De prinse Hans II (1983) Straus, Jos I (1971) Rölkes en Jos (1992) III Stoks ware ouch adjudant maar waerde daonao prins, Rob II Sjaopkes woor prins gewaes wie der Adjudant waerde)

 

Spencer velt in e sjwart gaat nog veurdet ’t fees kint beginne

De veurbereijinge veur ’t prinselik gezelsjap waerde flót opgepak. Op de eerste plaats de sjteek passe in Korschenbroich. ‘n Zalig moment want de sjteek is waat de prins uniek maak. Doezjend versjillende mötse hange dao en dan nog kins se zelf dien eige möts samesjtelle. In kleure, saort sjtufkes en ’t model. ’t Waerde ‘n blauw-wit (Uule en Remunjse kleure)  gekleurd sjeep mit daobie fien verwirk de Vastelaoveskleure rood, gael en greun. En let op de diamantjes oppe möts die ’t leech weerkaatse es ‘n discobölke. Zo sjtraolt ’t prinssjap in alle kleure van Spencer I aaf. As de keus gemaak is geit de reis wiejer nao Düsseldorf wo de möts gevierd waert mit glaeskes alt.


Jolie en Spencer en Jolie kiek door de Vastelaovesbril

Maar…….. nondedju, waat gebeurt d’r allemaol in de waereld? Corona sjtik de kop op. ’t Begós al drek nao de vastelaovend maar ederein dach nog “det virus wejt waal euver”, ein paar keer hooste en neeste en vaerdig. Maar nieks waas minder waor. ’t Virus breijde maar oet en bleek ein verrekkes vervaelend virus te zeen. Vaccins móste nog gemaak waere en wiewaal det achteraaf flot gebeurde ging de tied nog flotter. De sjpanning sjteeg en de haop op ‘ne goje aafloup greujde en greujde. Óngertösse ging alles op sjlaot en zelfs wanjele moogde nog maar mit twee man same. Sjole toe, ederein wirkde thoes en Kersmis waas mit dien eige gezin allein ónger de kersboum, dae ouch op besjtelling aafgehaold mós waere. De ein nao de anger vastelaovesklub lasde häör zeel en zaligheid aaf en Spencer zoot, zonger möts, zich te verbiete. De adjudante trokke aaf en toe ’t rokkestuum aan en keke in de sjpegel en verbete de pien, …óm treurig van te waere.

Driemaol is sjeepsrech

’t Jaor ging veurbie en Spencer’s druim: floep weg. De aafsjpraok waas namelik: dit jaor waers se prins maar es ’t neet door kint gaon dan is ’t veurbie, jaomer, maar zo is ‘t. De vastelaovend ging mit ‘n traon geruusloos veurbiej. ’t Waerde meert en dao sjtóng de Prinse Keuze Kemissie weer veur zien deur. Neet óm te sjoefele in d’n haof maar óm ’t neet prinssjap aaf te sjloete mit e feesje. Maar wat hadde ze in de rökzak zitte…, de sjteek. En nao get kal van ‘waat had ’t sjoon kinne waere en wie mót det es gevraogde maar neet gewaore prins’, waerde de rökzak laeggehaold en versjeen de sjteek van de Prins. Det waas ‘n sjoon verrassing veur Spencer, dao had-ter noojt op geraekend. Wie de prachtige sjteek veur zien naas waerde gehaje pinkde der ‘n traon weg. Maar toen kwame de sjoon wäörd: “Spencer dees möts heurt op ‘ne Prinsekop, dus Spencer, wils se, óndanks dae aafsjpraok, kómmend jaor Uule-prins waere?”. Jaozeker, netuurlik, geweldig, wie sjoon!. De adjudante vele zich in de erm: wazes mina…, toch nog!


Marnix, Emiel en Spencer dae dudelik veur “prins”geit.

Hopsaké, alle pepiere oet de kas en weer veurbereije op ’t sjpeel, dit keer geit ’t lökke. ’t Vaccinere begós op gank te kómme en de haop op eine goje aafloup waas groot. Van mei toet november ware de veuroetzichte bes good. De 11/11 waerde get te oetbundig gevierd op sjtraot want in de kefees mós ederein óngerhalve pas aafsjtandj haje. Mesjiens door die aktiviteite en väöl angere kwaam d’r ‘n nuuj virusgolf euver ós haer. Alle festiviteite waerde aafgelas maar ’t prinselik gezelsjap bleef alert. Toet ein waek veur de vastelaovend wól Spencer zien prinssjap viere. Maar de verantjwaordelikheid waar te groot. De Jeugprins kòs waal aan de sjlaag maar veur Spencer ging ouch deze vastelaovend euver. Spencer en zien adjuus mósde nog ein jaor wachte, det waas gelökkig aafgesjpraoke. En dan weer oplaje, ein jaor lank, op waeg nao dae aovend in de Oranjerie wo d’r oet ’t sjwarte gaat kint kroepe. Waat zegk ich, springe! Ónger ziene liefsjpreuk: ‘VERGAET NEET TE LAEVE’ Dao hoof gein letter oetlik biej.

De sjpang

Es hoesorde haet Spencer I ein sjpang. Eine Uul euverzuut alles en ’t is D’n Uul wo Spencer veur sjteit. De vastelaoveskleure zeen fien verwirk ónger de skyline van Remunj die gesjtileerd weergegaeve is. Dao baove ’t bekinde, 50 jaor aje en zo sjieke Uulelogo van Aad Adjudant Frits van Hensberg. Ouch zie motto, ‘Vergaet neet te laeve’ sjteit d’r op. Oojt had Rein I (1946) nao de oorlog de sjpreuk: Veer laeve nog, waem duit ós get…!

 

Wanjelprogram van D’n Uul nump ‘ne nuje aafsjlaag

Waas de resepsie van de prins allewiel op vastelaoves-zóndig dan is det in 2023 gans angers. Oppe Loesbleik geit D’n Uul ‘n grote sjpegeltent opzitte wo op 28 jannewarie edere vastelaovesgek zich kint sjpegele. ‘t Feesprogram van 28 en 29 jannewarie in dees tent haet es hoogtepuntj natuurlik de resepsie van de Prins. Dan kump gans Vastelaovendvierend Remunj bie-ein. Dao stjeit Spencer I dan ‘de Vastelaovend’ in óntvangs te naeme en oet te drage. Dao sjpeelt de Prinsekapel van D’n Uul en kómme de Aad Prinse in vol ornaat (druimend es of se d’r zelf weer sjtaon) mit de Aad Adjudante (AAS), sjiek in zjwart-wit, de fillesetasies euver bringe. Dao geit Spencer I neet de damesgarde aanbeje aan ederein maar waal häöre dans en dan gaon de bein hoog de lóch in. Dao kómme de Veldjmuus, de Kaketoes, Tuinhagedisse en alle angere beeste van Remunj bie-ein en sjlaon de Katers op de tróm en blaoze op häör feep de Prins toe. Dao wo de adjudante de vastelaovessjweit van Spencer ziene kop aaf deppe en Spencer, inmiddels heis gewaore, nog eine keer reup: “Vergaet neet te laeve …” En dan, nao det ederein de hoesorde opgesjtaoke haet gekrege, geit de resepsie euver in ein groot fees wo de bend mit häöre meziek toet laat in d’n aovend de miense oppe dansvloer bezig hilt. Dao, in die sjpegeltent, zólle de meiste luuj zich op ’t inj van d’n aovend neet meer herkinne in de sjpegelwandj. Luuj, waat ei fees waert det….!

Spencer geit van ’t ganse verke vraete mit zien adjudante, de raod van ellef en alle miense die D’n Uul make toet waat D’n Uul is. Vanoet Braam, ’t Uulenes, trek ’t prinselik gezelsjap d’r op oet en zólle ze de meiste kere ’sjmorges vazel bie-einkómme óm dan weer fit op sjtap en d’r taege aan te gaon.

 

Math I de Ponti

De adjudante

Emiel Kamzol (51)

Vader van Romah Kamzol (27 jaor). Woont in Remunj en is al 21 jaor same mit Anna van Klaveren.
Is mede eigeneer van mProvement B.V.. Vastelaovend. Dao mós ich eigelik noojt get van höbbe;
ich sjloot mich altied 4 daag op. Mer Anna haet mich weite te euvertuge óm ins eine keer mit te gaon,
mit de opdrach óm sjlaele laege te verkoupe (slap ouwehoeren).
Dao ging ich dan; ónwennig, mer waal ‘ne sjone aovend gehad. ‘t Jaor daonao höb ich ‘t grotendeils allein gevierd,
ich waas verkóch. Die vrieheid! Nieks mót, (bienao) alles moog. En dae flauwekul.
Heerlik! Vanaaf toen kin ich neet meer zónger en verheug ich mich op asgoonsdaag alweer op de 11de van de 11de.

 

Frank Wolfkamp (55)


In ‘t midde

Gebaore in Saasveld in Twente en oeteindelik door de leefde in Zjwame en Remunj belandj.
Is getrouwd mit Desiree Beek oet Zjwame. Haet twee kienjer: Noah (22 jaor) en Faye (15 jaor) det Jeugprinses is gewaes bie de Kaketoes.
Hobbies zeen whisky verzamele en bergfietse. Wirk bie Alliance Healthcare in Den Bosch en maak dao software veur apothekers.
Vasteloavend haet ter vreuger in Twente in de boerenkiel gevierd.
Noe geit ter al jaore nao ‘t Verkesbal, duit ter mit aan d’n optoch en vindj ter de Sjtatiefestasie geweldig.

 

Marnix I (Adams) (40)

Getrouwd mit Sylvia Lensvelt 1 Dochter: Zoe Adams (15 jaor) 1 zoon : Dean Adams (10 jaor)
Van Marnix is óngertösse alles waal bekind es Prins van D’n Uul in 2017.
Zólt geer det nog ins wille naolaeze, kiek dan in ‘t Zjwetskammezaol van 2017.

Interview in ein ech kefee

Es sjriever van dit interview waerde ich óntvange oppe Sjeidingswaeg aan de Kepel.
Spencer sjtóng op eine hook mich op te wachte.
Ich leep ónopvallend drie keer veurbie óm vervolges van de sjtoep getrokke te waere door Spencer.
Ich waerde ein sjieke sjuur ingeduujd en dao zoot ich in ‘n ech kefee.
‘t Bleek de aje tapkas te zeen van Hotel De La Station. Flesse whisky, ein sjtök of 50, loensde mich aan.
’t Waas ’t begin van ‘ne aovend wo op al dit sjriefsel is óntsjtange.

Aan de Kepel

Dochter Faye van adjudant Frank waerde Prinses bie de Kaketoes in 2018.
En häör adjudante Jolie waas de dochter van Spencer en Monique.
Dan viers se de vastelaovend es ein femielie same, mit name aan de Kepel in ’t Zandj.