Sjtadsjeugprins Fenn 1 en adjudante Floor en Jurre

 

Veer zeen Fenn van Vastelaovend!!

 

Waat haet sjtadsjeugprins Fenn I zien best mótte doon óm ’t sjoonste geheim van sjtadsvastelaovesvereiniging D’n Uul neet te verraoje. In juli waerde Fenn gevraog óm de nuje sjtadsjeugprins van D’n Uul te waere in ’t jubileum jaor 8×11. En “jao” waerde flotter gerope dan det de elders häör vraog kóste aafmake.

Op 23 juni in 2013 is Fenn gebaore in ’t Lerang en hae woont noe ónger de tillevisietore. Dus es de tore noe de kleure rood, geel en greun oetsjtraolt is det extra sjpeciaal. Fenn vintj de vastelaovend de sjoonste tied van ’t jaor en det kint ouch neet angers as veer nao zien gezin en femilie kieke. Veer kinne waal sjtelle det opa Ben, grootmeister van D’n Uul, uleblood haet doorgegaeve aan zien kienjer en kleinkienjer. De aajdste zoon van Ben, Marc II waas in 2019 sjtadsprins. Nicky waas in 1998 Sjtadsjeugprins en dochter Janou, mooder van Fenn, waas dansmarietje bie D’n Uul. Maar dao hilt ’t neet op want de vader van Fenn, Nick Opbroek, waas jeugprins bie de Lemkes in Häör. Yfke is de ajer zus van Fenn.

 

 

 

Vanaaf ’t jaor det Danieck sjtadsjeugprins waas is ’t prinselik blood flotter gaon sjtruime. Vol bewónjering keek Fenn nao ziene grote naef op de buun bie de sjolefestatie. Det waas ouch de eerste keer det Fenn taege zien elders vertelde det hae ouch sjtadsjeugprins wól waere. Dae wins kump dit jaor oet en dan ouch nog ins in ‘n jubeleijemjaor. In ein jubeleijemjaor waert altied trök in de tied gekeke maar dit gezelsjap kiek noe aeve veuroet in de tied. Drök bezig mit de veurbereijinge en bedinke wieväöl miense nao ’t oetrope kómme, langs de waeg sjtaon mit de optoch of waem de angere jeugprinse gaon waere.

De adjudante ware flot oetgekaoze. Alle drie zitte ze op de basissjool aan de Roer maar neet bie-ein in de klas. Floor kint Fenn al vanaaf de luiers en ze höbbe same al döks vastelaovend gevierd. Same mit häör elders nao de femieliehaof gaon vónje ze ouch erg sjiek.Det waas ein vastelaoves-feesje zónger sjmink maar det hadde ze zelf flot opgelos. Kiek maar ins nao de foto. De elders van Floor zeen Madelon Evers-Goedemans en Ruud Evers, en zie zeen ouch heel gooj vrunj van de femielie. Same de gangmaekers op minnig feesje en de mama’s höbbe ouch väöl jaor, mit de vrouwluujzitting georganiseerd. Ruben is de grote broor van Floor.
Jurre is al vanaaf  de kleutersjool ziene beste vrundj. Same kuite in klas en ederein veur de gek haje. Eine keer waas de juffrouw ze kwiet en waat bleek…., ze hadde zich versjtop in de klas en nemes kós ze vinje. Voetbal is zien grote passie en ’t leefs sjteit Jurre edere daag op ’t voetbalveldj. De vader en moder van Jurre zeen Steffie Pieper en Paul Beurskens. Siebe is ’t jonger breurke van Jurre.

 

 

 

’t Jeugprinselik gezelsjap wilt zich gaer nog perseunlik veursjtelle aan uch dus kiek flot op ’t volgende blaedje.