Kienjermusical
Kienjermusical 2025
Beestefestasie
Eine keer per jaor kómme de beeste van Remunj van de Kade gans nao de Munsterbaog… Vol mit huunj.
Al 88 jaor is Remunj ’t kloppend hert van de Limburgse Vastelaovend! Teminste veur miense… Hoesbeeste waere toesopgesjlaote en kriege gaaroet nieks mit van ’t sjoonste fees ter waereld.
Mer beeste höbbe ouch rech op Vastelaovend vinje Diva, Precious en Gucci, de sjiekste sjiekewawa’s van Remunj. Same mit ruige Rico, de hóndj mit de grótste sjpierbundelsvan Remunj en zien crew troemele ze alle beeste van Remunj op veur de eerste Beestefestasie. Det waert feeste wie de beeste en mesjien waal ‘n Vastelaovesromance.
‘ne Échte Vastelaovesmusical mit al ‘t jeugdig akteer- en danstalent van D’n Uul, gloodnuje leedjes én väöl RemunjseVastelaovesmeziek van vreuger en noe!
De veursjtèlling is veur de ganse femielie. Opa’s, oma’s, ederein is van herte wilkóm! Op 23 fibberwarie zeen d’r twee veursjtèllinge bie Theaterhotel de Oranjerie in Remunj.
Kienjermusical 2024
Zón 60 kienjer oet Remunj van 6-16 jaor doon dit sezoen weer mit, mit de Kienjermusical, ’n produksie van Sjtadsvastelaovesvereniging Dn Uul. De Kienjermusical is ’n veursjtèlling veur en door kienjer mit toneel, zang en dans. Nao de coronajaore en veurig jaor de verboewing, dit jaor gelökkig weer op ’t grote en nuje toneel van Theaterhotel de Oranjerie.
Rio aan de Roer
’t Verhaol.
’t Is ’n groot fees op de zölder van Fleur. Morge höbbe de maedjes sjoolvastelaovend en daonao gaon ze veur ’t eers allein nao de Sjolefestasie op ’t Sjtasieplein. Helemaol te gek netuurlik det alle vrunj bie Fleur in de sjtad kinne blieve sjlaope op de aje zölder.
Ze verheuge zich enorm op de Sjolefestasie en óm alvas in de sjtumming te kómme, downloade ze de Vastelaoves Challenge App. Doe mós elf challenges doon en dan kins se ‘n gratis show winne van diene favoriete Vastelaovesarties.
Vol entoezjasme waert ‘r mit de eerste challenges gesjtart. Mer dan gebeurt ‘r get wodoor de maedjes obbins in ’t Carnaval van Rio terech kómme in plaats van in Remunj.
Wie mót det noe? Kómme ze toch nog op tied trök in Remunj veur de Sjolefestasie? Es det mer allemaol good kump…
Datum, tied en kaartverkoup
De veursjtèlling is veur de ganse femielie. Opa’s, oma’s, ederein is van herte wilkóm! Op 4 fibberwarie zeen d’r twee veursjtèllinge bie Theaterhotel de Oranjerie in Remunj.
De eerste veursjtèlling begint óm 13:00 oer. De tweede veursjtèlling is óm 16:00 oer.
Nao de veursjtèlling is ‘r nog tied veur ‘ne gezellige naozit wo ederein ónger ’t genot van ’n drenkske nog lekker kan naopraote.
Kaertjes koste per sjtök € 11,- veur leje van D’n Uul en € 12,50 veur neet-leje en zeen te koup bie de resepsie van Theaterhotel de Oranjerie in Remunj.
——————————————————————————————————————
Al heel get jaore prizzenteert Sjtadsvastelaovesvereniging D’n Uul de Kienjermusical ( vreuger Kienjermiddaag geneump).
De Kienjermusical is eine veursjtelling veur en door de kienjer mit teneel, zangk en dans op ’t grote podium van Theater de Oranjerie in Remunj.
Zo’n 60-80 kienjer, in de laeftied van 6-16 jaor oet Remunj en ómsjtreke rippetere eder jaor vanaaf september veur deze veursjtelling.
Wil se meer weite euver de Kienjermusical of wil se mitdoon?
Kiek ins oppe sociale media of mail nao: kienjermusical@dn-uul.nl
Insta: @kienjermusical_dn_uul_remunj
Facebook: https://www.facebook.com/KienjermusicalDnUul
Youtube: https://www.youtube.com/@kienjermusicaldnuul5946
TikTok: @Kienjermusical
ben jij tussen 6-16jr en hou je van #musical, #toneel, #zang en/of #dans? En wil jij stralen op het nieuwe grote podium van TheaterHotel De Oranjerie Geef je dan op via: kienjermusical@dn-uul.nl
