De Jeuggarde is ’n garde besjtaonde oet ‘ne groep meide tösse de 12 en 16 jaor. In 2007 is de Jeuggarde aangesjlaote bie ‘t oettrèkkend gezelsjap van D’n Uul. Veurdet de Jeuggarde mit moogde mit de res van de vereiniging hoot zie de ex-Jeuggarde. De ex-Jeuggarde waar in ‘t laeve gerope óm es breujviever veur de Damesgarde te dene. Dees garde trainde op zaoterdaagmiddaag baove bie ‘Reijnen Muziek’ aan de Singel. De ex-Jeuggarde dansde bie de bezeuke van de vereiniging, bie ‘t Lerang, Camillus en bie de Kienjermiddaag. 

In 2007 moogde de ex-Jeuggarde zich aansjloete bie ‘t oettrèkkend gezelsjap van D’n Uul. Dit is ónger angere meugelik gemaak door de inzat van Wilma en Marcel Favre, Gerda Schuman en Aad Vórs Sybert I van Keeken. Ouch waerde de naam verangerd nao de Jeuggarde.

Dees garde had netuurlik ouch pekskes neudig. Dees waerde óntworpe door Sonja Hermans en door ‘n aantal Uuledames gans zelf gemaak. Hieveur waerde euveriges ‘t hoes van Monique Janssen gebroek.

Door de jaore haer haet de Jeuggarde versjillende trainers/ trainsters gehad en de dans zelf haet ouch ‘n aantal verangeringe doorgemaak. De Jeuggarde had eers ‘ne showdans en nao ‘n paar jaor moogde dees meide ouch ‘ne gardedans danse. Det vónje de jóng dames heel erg sjoon. De meiste maedjes sjtroume vanoet de Kienjergarde door nao de Jeuggarde óm vervolges wiejer te gaon nao de Damesgarde.

Óngertösse is de Jeuggarde ‘n vas óngerdeil van de vereiniging en haet de Jeuggarde zelfs ‘n wachlies van maedjes die gaer bie ós wille kómme danse.