Vórs

Vórsvrieje gedachtes

Vórsvrieje gedachtes 2024/2025

Geachde Uuleleje en zakelike partners van D’n Uul, laezers binne en boete ‘t Uuleriek,
D’n Uul haet dit sezoen gekaoze veur ‘n jaormotto wobie al sjtiekem veuroet waert gedruimp; ‘Nog
eine en dan…’, bedach door Norbert van Dooren en mit de verbinjing nao oos jubeleijemjaor in
2025. Marjo Peters óntworp de jaormedalie. D’n Uul kiek dus al veuroet nao oos jubeljaor 8×11 én
de oetreiking van de Gouden Narrekap. Organisatorisch sjteit bienao alles op de rit en waert ’r
gewirk aan wiejere detaillering. De ‘kerngroep 8×11’ en ‘hoofriddaksie 8×11-book’, ’t Dageliks en
Algemein Besjtuur höbbe same de liene oetgezat en op de Algemeine Leje Vergadering is
geklassjeneerd en ’t mandaat veur de oetveuring verleend. Det is de verbinjing mit 2025 mer
netuurlik sjlaon veer 2024 neet euver en laes geer noe ‘t 116de Zjwetskammezaol. Weer aan hoes
versjpreijd bie ‘11.111’ gezinne in ‘t Uuleriek en, soms wiet, daoboete. Dieke merci aan de
hoofriddaksie en alle mitwirkers veur dit prachtige Zjwetskammezaol én aan Scouting St. Hubertus
veur de versjpreijing.
Op 6 jannewarie höbbe veer de 79ste Sjtadsprins van Remunj oetgerope en geïnstalleerd. De
‘kemissie Nach’ haet same mit ‘de Oranjerie’ get sjieks en geliek ouch get unieks geprizzenteerd. Nao
‘ne hektische tied veur ‘de Oranjerie’ mit ‘n prachtig rizzeltaat van de verboewing, is gesjtart mit ‘ne
nuje opzat. De floer van de theaterzaal waerde opgeheug en d’r waar ‘ne bezónjer ambiance
gekrejeerd veur ‘de Nach’, ‘n unikum kwa lokasie. Door eine net zo good sjilderende ‘adjudant van
Rembrandt’ es de echte Rembrandt, waerde nao lang wachte vanoet de ‘Nachwach’ de Sjtadsprins
en zien adjudante gesjilderd. Dao sjting hae, Ziene Dórslöstige Hoogheid Joep I Seuren mit zien
adjudante Ruben Kuijper en Sjtadsprinselike breurs René Seuren & Pieke Seuren. Sjtadsprins Joep I
geit ós veur ónger ziene liefsjpreuk ‘Neet toete, blaoze!’.
Trökkiekend nao kelenderjaor 2023 ware d’r in ’t aafgeloupe Vastelaovessezoen mer ouch dit sezoen
in november, sjoon nuuj belaevinge. Nao lange gedege veurbereijing waerde de 1e edisie van ‘In de
Sjpegeltent’ oet de gróndj gesjtamp, D’n Uul haaj weer get nuujts! Op twee daag, drie feeste in ‘n
bezónjer sjoon entoeraasj en mit väöl grandeur: de Sjtadsprinselike resepsie euverloupend in ’t
Prinsebal op zaoterdaag en ’t Matinee op zóndaag. Nao gooj evaluasies waert dit suukses doorgezat
mit kómmend sezoen ouch invölling op vriedaagaovend; ’t Bedrievebal. Sjpesjaal veur besjtaonde en
potensjele zakelelike partners die same mit häör personeel ‘ne sjone feesaovend wille belaeve. Alles
all-in veur ‘ne vaste pries en me krieg ‘ne prachtige aovend in ‘n bezónjere setting. Nog ‘n aantal
kaarte veur ’t Bedrievebal en ‘t Matinee is te kriege vieje www.dn-uul.nl. De Sjtadprinselike Resepsie
en ’t Prinsebal zeen netuurlik weer zónger antreepries te bezeuke. Mer waat te dinke van de
geweldige 1e ediesie van KUUL, ’t Katers-Uul-Leedjessjpektakel wo de titel ‘Vastelaovessjlager van
Groot Remunj’ op ’t sjpel sjting. Mer leefs 17 inzendinge oet ‘groot Remunj’ nao inkele jaore
sjpraeke en veurbereije door de Katers en D’n Uul SAME! Dé twee vereniginge op gróndjgebied van
Remunj (en Neel) die op Vastelaovesleedjes-gebied zón traddiesie en historie kinne. Väöl terech
greutse en blieje gezichte op 5 november in de Sjter in Neel en veer dinke det ouch väöl Uule- en
Katerleje die neet meer ónger ós zeen, greuts zeen op dess samewirking. Dit jaor zeker ‘n vervolg!
Jaomer genóg waar d’r in 2023 ouch ‘n jaor is oze Ere-Kanunnik, vreugere Daeke van Remunj en
Plebaan Daeke van oos Moderkirk St. Christoffel, Monsigneur Theo Willemssen gesjtorve. Daeke
Willemssen waerde alóm geresjpekteerd veur zien hertelikheid, toegankelikheid en is mennig
Vastelaoveskirkdeens mit gepasde en carnavaleske humor veurgegaon. Ouch sjting hae D’n Uul
gevraog en óngevraog bie mit raod. Veer gaon Theo erg misse.
Dit sezoen is ‘n gans kórt sezoen wiewaal Aad Sjtadsprins Math I zelfs nog ‘n waek kórter had in 2008.
Nao de Nach zeen d’r vief waekinje inklusief ’t Vastelaoveswaekinj en mit de Vastelaovesdaag ‘toet

det ’t weer Asgoonsdaag is’. Det is ‘n organisatorische mónsterklus óm dan alles inein te fiespernulle.
Gelökkig is oos jubeleijemjaor 2025 dao-in taege ’t langste sezoen waat kelendertechnisch kint. Mer
D’n Uul zól netuurlik D’n Uul neet zeen es veer weer oetpakke mit ‘n gans sjoon pergram.
Majestueuze dank aan ’t Algemein Besjtuur, alle kemissieveurzitters mit häör kemissies en
mitwirkers. Chapeau, zónger uch zól D’n Uul neet kinne bringe waat veer bringe!
Oos gewaardeerde TC verhoes nao ‘n lange zeuktoch binnekórt nao ‘n nuuj óngerkómme aan de
Sjipperswal. Daoróm dit jaor get logistieke probleme en ouch ’t tummere en versiere is aeve lastig.
Mer zie veurzeen netuurlik de binnesjtad van Uulevlagge. D’n Uul itteleert en de
Uuleprizzentasieruumte zeen dit jaor jaomer genóg ‘n jäörke neet geäöpend, waal mit ‘n gooj raeje.
’t Pandj wo-in ’t permanent Uule-mezejem geit kómme waert noe verboewd en daonao waert
gesjtart mit de aafboew en inrichting. Det doon ‘n aantal versjtenjige en entoezjaste Uule van de
kemissie Historie & Archief ónger leijing van oze Ere-Archivaris Louis Wolters, same mit de TC. Dit
jaor brink de kemissie van inkele Aad Prinse weer twee aovende Lachenderwies en veer gaon
vertroewd trök nao oos eige Appelesienerie ofwaal De Oranjerie ómdet de verboewing dao gans
vaerdig is. Ouch de Kienjermusical geit weer trök nao häör vertroewde sjtek mit ‘n óngetwiefeld
prachtig verhaal en sjoon veursjtèlling. De Verkesaovend is geweun zowie det heurt Verkesechtig op
’t Sjoolpaad.
Leje kóste veur alle Uule-aktievieteite weer eerder kaarte koupe en ouch taege legere prieze, dus ‘n
lidmaotsjap van D’n Uul haolt me d’r altied oet. Bedink uch neet en waer veur mer(!) € 22 lid van D’n
Uul! Boete ‘ne perseunlike Zjwetskammezaol en Uulewapper mit Uule-jaormottopin toesbezorg,
maak geer dan gebroek van ALLE angere privileges. Op www.dn-uul.nl sjteit alle info euver
ivvenemente, aktievieteite, kaertjes en ónger de roje knoep ‘lid waere’kint geer lid waere. Ouch
technisch blieve ver vernuje, d’r is op oos site noe ’n eige verkouppertaol veur kaarte én veer zeen
mit Uule-merchandise gesjtart.
De Sjtichting Sjtasiefestasie zorg det op twee daag ’t grótste fees waat veer kinne weer waert
neergezat. ’t Pavveljoen sjteit d’r en is oetgebreijd. De zakelike partners en vastelaovesgekke die det
wille, waere hiej in de watte gelag. De lèste keer mósde veer jaomer genóg ‘nae’ verkoupe aan inkele
zakelike partners, leje en geïnterseerde luuj. Det wille veer veurkómme, dus sjtuur veur de lèste
kaarte ’n berich nao sponsor@dn-uul.nl Behalve ’t organisere van ivvenemente, zorg D’n Uul det de
Vastelaovend waert oetgedrage. Op sjole, in Remunj, in Limburg en op bezeuk bie ‘de ajer luuj’ die ós
de Vastelaovend höbbe geleerd. Ouch neet weg te dinke is oos Sjnapsnazebal sjpesjaal veur de
kienjer. Óm bie de kienjer te blieve, d’r is ‘n gans nuuj lichting entoezjaste Uulejónges en de
Uulejónges van ’t eerste oer zeen doorgesjtruimp nao ’t Gajus. Oeioei,waat geit det gaeve… In ’t
8×11- jubeleijemjaor gaon zie volgend jaor ‘n fees veur de jeugdige organisere. Mer waat zeen veer
blie det oos Kienjer- en Jeuggarde zo netjes en braaf zeen…
Veer druime nog eine keer Vórstelik trök nao 2023. Greuts ging Aad Sjtadsjeugprins Jimi I van Rey mit
aad adjudante Tijl en Sam ós veur woveur oze grote dank. Sjoon wie zie mit de kienjer en jeug van
D’n Uul en Remunj höbbe gefees! Ouch nog eine keer ‘ne grote merci aan Aad Sjtadsprins Spencer I
mit Aad Adjudante Emiel, Marnix en Frank. Nao de langste wachkamer in de Uule-historie oojt, höb
geer laote zeen oet ’t goje Vastelaoveshout gesjneje te zeen. Dao naeme veer nog eine keer
sjpraekwaordelik de möts veur aaf! ‘n Bezónjere merci aan Robert! Same mit oos twee Prinselike
Gezelsjappe, Prinsekepel, Damesgarde en jeugdige gezelsjappe gaon veer de Vastelaovend sjinke en
same belaeve. De Vastelaovesvierders winse veer väöl Vastelaovesplezeer en vergaet neet:
Vastelaovend viert ederein op zien eige wies… mer waal SAME!

Vórs-veurzitter Dirk I Franssen


Vórsvrieje gedachtes 2022/2023
Geachde
Uuleleje, zakelike partners van Dn Uul, laezers binne en boete ‘t Uuleriek.

Veer kinne ós weer vrie veule! Vrie veule óm ein gans Vastelaovessezoen te belaeve. D’n Uul haet ein passend jaormotto: Veul dich vrie!’ det bedach is door Luuk Hendriks. Marjo Peters óntworp de jaormedalie. Dieke merci nao de redaksie enmitwirkers veur dit sjieke 115de Zjwetskammezaol. Weer aan hoes versjpreid bie ‘11.111’ gezinne in ‘t Uuleriek en daoboeteóm t Vastelaovesgeveul oet te blieve drage. Dank aan Scouting St. Hubertus die det weer veur Dn Uul organisere.

Dit jaor kómme oos Vórstelike druime, geschreve in ’t Zjwetskammezaol van 2021 oet. Nao lang wachte höbbe veer de 78steSjtadsprins van Remunj oetgerope en geïnsjtalleerd. Kómplimente aan de nuuj kemissie Nach en aan oos Technische Kemissie. Zeker ouch aan de Oranjerie, want ouch in eine hektische tied sjtèlde zie de Salle de Fête aan ós besjikbaar. D’r is get prachtigs neergezat tiedens dees Prinsenach, merci! Begeleid door de Sirkusdirrektäör, Damesgarde en Aad Prinse Klupkwaam hae ónger trómpetgesjal es ‘Prins op ’t witte paerd nao veure; Ziene Dorslustige Hoogheid Sjtadsprins Spencer I Hinzen. Mit zien adjudante Emiel Kamzol, Marnix Adams en Frank Wolfkamp geit Spencer I ós veur ónger zieneliefsjpreukVergaet neet te leave!’. t Vastelaovessezoen is gesjtart mit waat al de 3de edisie van de11devande11dehaaj mótte zeen. Mer waat in ‘t vaat zoot verzoerde neet. Gans Limburg haet kinne genete van ein geweldige 1ste edisie in t UuleriekRemunj. Chapeau Sjeng Kraft Kompenei, D’n Uul is greujts op oos samewirking! Veer höbbe dit jaor eine moderneUulesjlager. Jaomergenóg kwaam dae neet live toet sjtandj via de Remunjse Vastelaovessjlager Kómpetisie’. ‘t Geluif is d’r det dit in 2023 waal weer lök. Mesjien waal in ein verassende samewerking

Naeve Vórstelike druime ware d’r ouch dreuvige momente. Aad Sjtadsprins 1969 Ghiel I Pijpers Trök euver de Brök, is van ós haer gegaon. Altied sjting hae vaerdig óm t Achterhoes veur D’n Uul besjikbaar te sjtèlle. Ouch Marij Hammer-Hendriks, Eredame van D’n Uul, is ós óntvalle. Ein drievende krach achter de kestuums van de Bóntje Aovende, mer ouch oppe bühne dudelik zichbaar in ein van häör rolle. Daonaove sjteun en toeverlaot van Aad Sjtadprins en Erelid Huub II Hammer in zien aktieve Uulecarrière. Soms gaonUule in aktieve deens’ van ós haer. Hans Thomassen, Senator en Grootmeister van Dn Uul,is neet meer ónger ós. In de 70-er jaore adjudant van Aad Vórs Thijs I Bingen zaliger. Later besjtuurlik en organisatorischaktief in de vereniging, lèstelik es Praeses van de Senaat. Ghiel, Marij, Hans en alle leje die ós óntvalle zeen, gaon veer erg misse!

D’r sjteit uch dit sezoen weer väöl sjoons van D’n Uul te wachte. De TC veurzuut de binnesjtad van Uulevlagge. Ónger de titel D’n Uul itteleert zeen de ittelazjes weer aangekleid en is de Uule-prizzentasieruumte geäöpend. Dit jaor waere twee aovendeLachenderwies gebrach door de kemissie van Aad Prinse van D’n Uul. Vanwaege de Oranjerie-verboewing waert oetgewekenao t Forum in t Katerriek. ’t Pergram is es vanaajds vol kwaliteit. De Katers gove goodkeuring en t zól ós neet verbaze eszie mit häör gasvrieheid, twee aovende de Kater op ’t Betjesplein ómdrejje richting Remunj, óm de luuj welkóm te heite. Koupmit zo’n ‘Kater-gasvrieheidvia www.dn-uul.nl de lèste kaertjes. Ouch veur de Kienjermusical en Verkesaovend is de kaartverkoup gesjtart. De Kienjermusical is in ‘t aad Royaltheater. Ein kreatieve filmproduksie van en veur kienjer. De Verkesaovend zowie det heurt ein bietje Verkesechtig aan de Kapel op ’t Sjoolpaad. Leje kóste veur de Uule-aktiviteite eerder kaarte koupe. Veur ’t eers taege legere pries, dus waer veur mer(!) € 22 lid van Dn Uul! Want behalve eine perseunlikeZjwetskammezaol en Uulewapper thoesbezorg, maak geer dan van ALLE anger privileges gebroek. Ouch technisch blieveveer vernuje, want volgend jaor kump d’r op oos site ein eige verkoup-portaal veur kaarte én Uule-merchandise.

Dit jaor is t zo wiet, nao lange onzekerheid mer daomit ouch gedege veurbereijing kint ‘In de Sjpegeltent’ van sjtart. SHOWTIME, D’n Uul haet weer get nuujts! Verrassend en betouverend mit de sjiek van vreuger in ein modern jeske. Twee daag, drie feeste: de Sjtadsprinselike resepsie, ’t Prinsebal en ’t Matinee. Op 28 jannewarie sjmiddaags de Sjtadsprinselikeresepsie en saoves ein sjpetterend Prinsebal. Op 29 jannewarie ‘n sjiek matinee veur dames én here in gala. Mit väöl grandeurwaert geer de ganse middaag gefêteerd. Nog ein beperk aantal kaarte is te kriege via www.dn-uul.nl

De Sjtichting Sjtasiefestasie zorg det veur oos grótste fees ‘alles op Rölkes löp’. ’t Pavveljoen sjteit der ouch weer en is oetgebreid. Nog meer vastelaovesgekke waere hiej in de watte gelag. De lèste keer mósde veer jaomergenóg nae verkoupeaan inkele zakelike partners, leje en geïnteresseerde luuj. Det wille veer veurkómme, dus sjik veur de lèste kaarte ’n berich nao sponsor@dn-uul.nl

Behalve ’t organisere van ivvenemente, zórg D’n Uul det de Vastelaovend waert oetgedrage. Op sjole, in gans Remunj, in Limburg of dao boete, nao ’t Lerang en op bezeuk bie ‘de aajer luuj’ die ós de Vastelaovend höbbe geleerd. ’t Is belangriek óm det te doon, mit (klein) dillegasies, mer soms ouch mit oos grote oettrèkkend gezelsjap. Veer kieke oet óm weer mit alle gezelsjappe die D’n Uul riek is op sjtap te gaon, netuurlik mit oos Prinselik en Jeugprinselik Gezelsjap in ‘t middelpuntj.

Veer druime nog eine keer Vórstelik trök nao 2022. Dieke merci aan alle kemissies en mitwirkers die in meujelike tied SAMEin ein paar waeke höbbe laote zeen waat Vastelaovend is. In bezunjer de kemissie PR en de sjponsorkemissie. Zie haje geinemekkelike tied en zeen dit jaor wiejer gegaon mit professionalisering, waat zien vruchte dudelik aaf begint te werpe. Gank zo wiejer!

Greujts ging Aad Sjtadjeugprins Joep III Opheij mit adjudante Celeste en Arthur, D’n Uul, gans Remunj en bienao gans Limburg veur. Zóngerkelegahaet Joep de zjwaore taak dae op zien sjouwers loog volbrach. Gánk der mer aan sjtaon, daonaeme veer nog eine keer sjpraekwaordelik de möts veur aaf!

D’n Uul bewaegt, greujt en kiekt al veuroet nao 2025, ós jubeljaor 8×11 en de oetreiking van de Gulden Humor. Organisatorisch sjteit al väöl op de rit en waert d’r gewirk aan invulling. De kerngroep 8×11’ en hoofredaksie 8×11-bookhöbbe mit ’t Dageliks en Algemein Besjtuur al good geklassjeneerd euver wie det allemaol deroet kint gaon zeen. Veer kieke veuroet mit ’t oug op verbinjing mer ouch óm de Vastelaovend te blieve versjterke.

Same mit de Prinselike Gezelsjappe en ‘t ganse oettrèkkend gezelsjap, alle kemissies en hel wirkende Uule gaon veer Remunjen Limburg weer eine sjone Vastelaovend sjinke. Alle Vastelaovesvierders winse veer väöl Vastelaovesplezeer ónger oos jaormottoVEUL DICH VRIE!. Veer haope det ederein zich euveral op eder vlak vrie kint blieve veule. En vergaet neet:Vastelaovend viert ederein op zien eige wies mer waal SAME!

Vórs-veurzitter Dirk I Franssen


Vórsvrieje gedachtes 2021/2022

Geachte Uuleleje, zakelike partners en sjpónzore.
In ’t bezunjer de ruum 22.222 laezers van ‘t Zjwetskammezaol 2022 in oos Uuleriek,

‘Vaerkrachtig veuroet!’ blief Sjtadsvastelaovesvereniging D’n Uul d’r veur gaon, om de Vastelaovend oet te drage. Al is d’r in 2022 veur ‘t tweede jaor op rie eine angere Vastelaovend dan veer oos allemaol winse. Vaerkrach toonde veer toet aan vandaag én laote veer ouch de kómmende tied zeen. Juus noe óm veur groot en klein, Uul of Uulin, mer veural alle Vastelavesvierders det geveul oet te drage. Om d’r gein misversjtandj euver te laote besjtaon; ouch tiedes grote taegesjlage is d’r Vastelaovend. ’t Is väöl meer dan massa-ivvenemente veur (teen) doezendje miense, Vastelaovend kint väöle vórme van sjpass en plezeer ouch in kleinere setting. En Vastelaovend in de zomer, dao dingke veer nog gaar neet aan, want Paose viere veer neet in september en Kirsmes neet in april. De tradisie van Vastelaovend is gans angers ontsjtaon om veur ’t Vaste nog ins flink oet de bantj te sjpringe en same óngerein te feeste, dao haje veer aan vás. Waat neet wilt zegke det D’n Uul gein aktiviteite, verbonje aan de Vastelaovend en oos eige doelsjtellinge, tösse Asselegoonsdaag en 11/11 organiseert. Det geit ouch zeker gebeure. Mer det is get angers dan suggesties es of de Vastelaovend mer aeve nao de zomer kint waere verzat. Det is gein opsie, waert gein opsie en geit ouch neet gebeure! D’n Uul bleef en blief daorom ‘Vaerkrachtig veuroet!’ gaon.

‘Vaerkrachtig veuroet!’ bleek in november al det ’t Vastelaovendgeveul blief besjtaon. Netuurlik waas de pien groot det veur ‘t tweede jaor op rie ‘de11devande11de’ neet in Remunj kós plaatsvinje. Veural veur ’t besjtuur en alle vriewilligers van de Sjeng Kraft Kompenei eine mokersjlaag mervanwaege de nouwe samewerking ouch veur de betrókke Uule.D’r sjting get sjieks klaor mit ruumte veur eine ‘Uule-touch’. ’t Leep angers, mer behalve pien waas d’r ouch plezeer, want tóch waas d’r op 11/11 gezellige Vastelaovessfeer in Remunj. Ouch waas d’r nao jaore van aafwezigheid bie D’n Uul weer ein echte leedjeskómpetisie. De Remunjse Vastelaovendsjlager Kómpetisie waas ein sukses, leedjes en D’n Uul heure biejein! Eine daag later zote veer bie de Katers in Neelen ware dao getuge van eine sjpetterende leedjesmiddaag. Oet alles bliek dus det de behoefte aan Vastelaovend, ouch in meujelikke tied, blief besjtaon. Mesjien zólle de Katers en D’n Uul ein lans kinne braeke en de henj in ein sjlaon op leedjesvlak, waem zal ’t zegke…??? Ouch kint ‘t gein kwaod om (positief) kritisch te blieve kieke binne en boete oos eige vereniging, waat angers of baeter zól kinne. D’n Uul zal dao altied häör verantjwaordelikheid in blieve naeme om det op ein positieve meneer besjpraekbaar te make.

‘Vaerkrachtig veuroet!’, óndanks ‘t gemis det veur ’t tweede jaor op rie eine Sjtadsprins óntbrik. Det is in de gesjiedenis van oos vereniging neet eerder veurgekómme, alein in de versjrikkelikke oorlogsjaore. ‘t Prinselik Gezelsjap sjting gans klaor omdet ’t d’r medio 2021 good oetzoog. Aevel de waereldse perbleme laote zich neet sjture en veer mósde angere koerse vare. Ein kórter sezoen mit minder aktiviteite is jaomer mer gein onoplosbaar perbleem want ’t geit neet óm kwantiteit mer kwaliteit.  Opnuuj is vanoet alle heuk in Uule-kemissies flexibel nao meugelikheje gekeke. Neet alein veur oos zelf of veur de beougde Sjtadsprins. Mer óm d’r veur álle Vastelaovendvierders alles aan te doon óm Vastelaovend te bringe, zeen veer toet ’t oeterste gegaon en höbbe bewös neet (té) vreug de handjdook in de ringk gegoojd. Onortodox zeen Uule-tradisiejs van de letste teentalle jaore, óm oos Prinse begin jannewari oet te rope, euverbaord gegooid en nao fibberwari gesjaove. Zo is sjtrategisch sjpeling gekreerd óm aktivieteite angers te órganisere en besjloetmomente op te sjuve. En jao, óndanks det d’r intern begriepelikkerwies ouch waal ins angere geveules ontsjtinge. Dao zeen veer good en mit resjpek veur elkaar mit ómgegaon! Daorom wille veer veur ‘t onoetpöttelikke wirk en pozitivisme op dees plaats waalgemeind dánk zegke aan alle aktieve leje en vriewilligers in alle kemissies en gezelsjappe binne en gelieerd aan de vereniging, oos zakelikke partners en sjpónsore, oos Algemein en Dageliks Besjtuur. Zónger uch SAME waas die flexibiliteit gaar neet meugelik gewaes, dieke merci daoveur!

‘Vaerkrachtig veuroet!’ puzzele toet waat maatsjappelik en organisatorisch verantjwaord is. Neet blieve veuroetsjuve want op enig moment mótte besjlissinge waere genaome. ’t Mót daobie kwalitatief get veursjtelle waat D’n Uul duit mer ouch waat veer oos Prinse beje. ‘t Perspectief veur ein kwalitatieve invölling van Sjtadsprins waas neet meer meugelik.. In 2023 kriege zie ein nuje en haopelik volwaardige kans! Neet minder greutsj zeen veer op ein besjloet, waat op dit moment al oetgeveurd is: in einthemasetting primair gerich op kienjer en jeugdige haet D’n Uul op zondaag 6 fibberwari Joep III Opheij, mit boezemvrundj Arthur Schmitz en gooj vriendin Celeste Maes es 2 adjudante, oetgerope en toet 55e Sjtadsjeugprins van Remunj en Jeugprins van D’n Uul geïnsjtalleerd. Mit ein sjpetterend Jeugprinselik Gezelsjap vol Uuleblood es sjtraolend middelpuntj, wilt D’n Uul focusse op de doelgroep dae t bienao twee jaor zo meujelik haet, kienjer en jeugdige. In de Uulefemilie zeen väölkienjer aktief in de Kienjergarde, Jeuggarde, Uulejónges en de Kienjermusical. Mer dingk ouch aan oos ganse Oetrekkend Gezelsjap en de res van de vereniging die al twee jaor op rie weinig kint doon. Mit Hoogheid Joep III same mit adjudante Arthur en Celeste veurop es sjtraolend middelpuntj van de ganse vereniging in deze meujelikke tied, kinne veer ouch noe zoväöl es meugelik ’t Vastelaovesgeveul oetdrage. Det is D’n Uul ‘aan zien sjtandj verplich’ en is belangriek veur de toekóms van de vereniging! Daobie kint Sjtadsjeugprins Joep III in eine tied det d’r (veur kienjer en jeugdige) weer meer kint, esboegbeeld fungere veur (alle kienjer en jeugdige in) de ganse Remunjse (Vastelaovend-) samelaeving.

‘Vaekrachtig veuroet!’ mit väöl kreativiteit blieve veer op alle gebied en mit alle technische meugelikheje aktiviteite en inisjatieve in ein fiespernölle óm ’t Vastelaovesvuur te laote branje en wo D’n Uul dees waeke de essensie van Vastelaovend mit wilt oetdrage, op momente spesjaal gerich op kienjer en jeugdige. Zake die kórte veurbereijingstied of ein relatief mekkelikkeorganizasie höbbe, zodet flexibiliteit meugelik is. Zelfs veur oos normaal ómvangrieke oetdaging de Sjolefestasie en Sjtasiefestasie, waert ein alternatieve aktiviteit veurbereid. Mer ouch de ganse binnesjtad is al door ós TC same mit de BIZveurzeen van Uulevlagge. De kemissie historie&archief kleijde al twee etalages aan om luuj kinnes te laote make mit oos rieke Uuleverleje. En in aanloup nao de verboewing-sjtart van de Hamsjtraotlokasie toet ein permanente Uule-fanstore mit museum’, is d’r mit dank aan de pandjeigenaere noe al ein Uule-expozisieruumte gehoesvest.

‘Vaekrachtig veuroet!’ blief D’n Uul d’r veur gaon, omdet Vastelaovend noe einmaol mit aafsjtandj ’t sjoonste is. En vergaet ‘t veural neet; Vastelaovend viert ederein op zien eige wies… mer waal SAME!

Vórs-Veurzitter Dirk I Franssen


Vórsvrieje gedachtes 2020/2021


Geachde Uuleleje, sjpónzore en partners. In ’t bezunjer alle doezendje “extra” laezers
van ‘t Zjwetskammezaol 2021 in oos Uuleriek,

Tja, wie zólle veer dit jaor ’t leefs höbbe wille äöpene…? Mit ’t beneume van ein prachtige Nach wo de 78e Sjtadsprins van Remunj en Prins van D’n Uul en ein waek later de 55e Jeugprins van oos vereniging zeen oetgerope…? Mit de oetverkezing van eine sjieke Uule-sjlager tiedes eine suksesvólle hersjtart van de Leedjesaovend…? Mit ein geweldige Uule-akademie wo alle aanwezige Uule- en gás-sjtudente eine hoogsjtaonde ‘kleine pure Vastelaovend-aovend’ belaefde…? Mit ein trökblik nao alle Remunjse en Limburgse Vastelaovendvierders tiedes de geweldige 1e edisie van de “11devande11de” in oos REMUNJ…? Mit de sjtart van ein lange intense samewirking tösse De Sjeng Kraft Kompenei, D’n Uul én de gemeinte Remunj…? Mit aktiviteite van oos oettrèkkend gezelsjap en Senaat in november…? Mit de Raod van XI en alle kienjer, maedjes en dames van oos gardes die nao väöl oefene, zich weer kósde laote zeen…? Mit oos Prinsekepel mit blauw lippe van ’t oefene…? Mit de Uulejónges mit häör kattekwaod…? Mit inkele “veuroet-druime”…? Mit de 12e Lachenderwies gebrach door de Aad Prinse…? Mit de twee oetverkochte Kienjermusicals wo bienao 9×11 kienjer ein prachtige veursjtèlling bringe…? Mit eine Verkesaovend wovan de volgende daag neet ederein meer wit waat der gebeurt is…? Mit ein unieke Sjole- en Sjtasiefestasie, van de Sjtichting Sjtasiefestasie én D’n Uul veur gans Vastelaovend vierend Remunj én Limburg…?

Al dees druimgedachtes hadde eigelik wirkelikheid mótte waere. Maar de waereldse probleme diej in 2020 zeen óntsjtaon en jaomergenóg in 2021 nog door zólle gaon zote alles op ziene kop. Mit väöl pien in ’t Vastelaoveshert haet D’n Uul besjlaote geine Vastelaovend te viere mit ivvenemente, publieke aktiviteite, Sjtadsprins en Sjtadsjeugprins. Det is nao 1946 nooit meer veurgekómme. Aevel höbbe veer ouch ein tradisie euversjteigende én maatsjappelike verantjwaordelikheid nao de samelaeving. Veer zeen dan ouch greutsj op waat veer waal höbbe bereik: mit alle Uulekemissies en hélwirkende Uule sjteeds pozitief veuroet kieke vanoet ein gróndjhajing van waat waal zól kinne. Per aktiviteit of ivvenement en es geheel, toet det besjloete mósde waere genaome. Det der op 12 oktober ein unaniem besjoet waerde genaome goof krach en vertroewe én sjtraolde tegeliekertied einheid oet. Kórt gezag: D’n Uul sjleup mit ein oug aope toet 11-11-2021 zodet mit inkele bewus gekaoze “Uulepareltjes” det anger oug ouch aope geit en zelfs oehoe gerope waert en de vleugels waere oetgesjlage. Dit óm de Vastelaovend werm te haje in Remunj en in gans Limburg mit ’t jaormotto bedach door Roel Hendriks: ‘Vastelaovend, mit aafsjtandj ’t sjoonste!’

Mit dit jaormotto gaeve veer eine chapeau nao de (hoof)redaksie en mitwirkers veur deze prachtige 113e Zjwetskammezaol. Same mit de Uulewapper neet allein veur leje en sjpónzore, mer ouch veur ‘11.111’ gezinne in ‘t ganse Uuleriek mit hoes aan hoes verspreijing en soms zelfs daoboete óm juus noe ’t Vastelaovesgeveul oet te drage. Ouch maatsjappelik mit de versjpreijing door de hendjes van de scouting St. Hubertus. Veer zeen greujts op de kemissie die ein feeswaekinj in ein sjpegeltent mit op zaoterdaag de Prinseresepsie en… ’t Prinsebal aan ’t veurbereide is. Hiemit herlaeve de Bals oet de rieke Uulehistorie. Op zóndaag in sjtielvolle zitting veur dames én here, eine primäör in Remunj.

Boete Uulepareltjes zeen der ouch gedachtes euver momente wo veer mit ein traon en pien in oos Uulehert aan trökdinke. Aad Sjtadsprins 1969 Huub I van Ool mit ziene liefsjpreuk “Hi, Ha, höffe maar”, is van ós haer gegaon. Nao zien Prinssjap haaj Huub twelf jaor de veurzittershamer in deils ónröstige tieje. Hae waar kertrèkker óm D’n Uul ein aopener gezich te gaeve en haet fóndemente gelag woop de vereniging nog altied drejt. Huub waar Grootmeister, Ereveurzitter en Senator van D’n Uul. Ouch höbbe veer ein traon gelaote óm ’t sjterve van Eredame Bep Bothmer, gasvrouw van oos vermaarde Uulenés. Ed Allers, hélwirkend
in aktieve deens, veurzitter van oosTechnische Kemissie (TC), sjtórf op 69-jäörige laeftied. Ed fungeerde letterlik es kroepaolie binne en veur de ganse TC. Veer zolle Huub, Bep, Ed en anger leje die ós óntvalle zeen heel erg misse!

Nao dreuvige gedachtes, höbbe veer gelökkig nog straolende pareltjes wo D’n Uul in deze tied toch de Vastelaovend ‘viert’. De kemissie Kienjermusical bedach eine “online challenge” óm veural de kienjer die normaal mitdoon in de veursjtèllinge, toch get leuks te kinne laote doon. De ganse binnesjtad waerde door oos TC same mit de BIZ weer veurzeen van hóngerde Uulevlagge, geweldig! ‘D’n Uul itteleert’ kleijde weer twee etalages in de binnesjtad aan óm luuj kinnes te laote make mit oos rieke Uuleverleje. Ein lokasie kreeg bewus ‘t thema ‘45-‘46 de 1e Vastelaovend nao de oorlog, Sjtadsprins Rein I Pijls mit ziene sjpreuk; ‘Veer laeve nog…. waem duit os get”. Merci aan ónger angere oze Ere-archivaris Louis Wolters, Rob Vastert, Marjo Allers, Senatore en de Technische Kemissie! Klapsjtök van ’t nuujts op 2 jannewari: D’n Uul sjtart op de ‘etalaasj-lokasie’ mit ein permanente ‘Uule-fanstore’ en museale invulling. Dank aan de pandj-eigenere veur de samewirking. ’t Waert nog wiejer oetgeboewd, dees nuje aanwins veur Remunj!

Veer ware in dees Vórstelike gedachtes flót oetgedruimp es der nieks waas bedach, geregeld, georganiseerd, gefiespernöld, nemes kreatief bezig waas gewaes, neet waas vergaderd en der neet soms ins duchtig waas gesjtraeveld. Daoróm kieke veer mit ein bezunjer greujts geveul nao ’t väöle wirk van alle organiserende kemissies, oos facilitaire kemissies TC en PR, al oos hélwirkende Uule oppe achtergróndj, oos ganse oettrèkkend gezelsjap en Senaat, oos AB en DB en netuurlik de kemissie Lachenderwies van de Aad Prinse Klup. Gánk der mer aan sjtaon in deze tied, dao naeme veer oprech en mit väöl waardering eine keer sjpraekwaordelik de möts veur aaf!

Dieke merci aan Aad Sjtadsprins Vito I mit adjudante Ayrton, Joep, Ramon SAME mit Aad Sjtadsjeugprins Cas I mit adjudante Tijs en Keane. Chapeau wie zie D’n Uul in 2020 zeen veurgegaon. Zo is ’t brökske nao oos lèste Vórstelike gedachte gelag… De Sjeemprins(e)! Wie sjiek is ‘t det D’n Uul es enige Vastelaovesvereniging toch ‘ne (Sjeem)Prins(e) kint laote sjtraole! In deze Zjwetskammezaol laes geer det eindelik ’t tiedperk van de Sjeemprins is aangebraoke. Vanoet de achtergróndj in alle sjtilte en ein trökgetrókke laeve kinne zie nao 41 jaor eindelik laote zeen wo zie zo lang op höbbe geoefend. De offiesjele insjtallasie veur groot Remunj mótte veer nog planne, mer waat ós betruf waert det ein tiedperk van 1 jaor. Estebleef dan weer weg oet ‘t ‘tiedelike abnormaal’ en trök nao ‘t geveul waat alle Vastelaovesvierders wille… want geer weit ‘t; ‘Vastelaovend, mit aafsjtandj ’t sjoonste!’ En vergaet neet: Vastelaovend viert ederein op zien eige wies… mer waal SAME!


Vórs-veurzitter Dirk I Franssen


Vórsvrieje gedachte 2019/2020

Geachde Uuleleje, Uulesjponzore en langere laezers van ’t Zjwetskammezaol 2020,

“Veer laote de kirk in ’t midde” bedach aad Prins Ton I Spätjens veur ‘t jaormotto van Sjtadsvastelaovesvereniging D’n Uul in 2020! Ein verwiezing nao ‘t 800-jaorig jubeleum Munsterkirk, dae midde in ós Uuleriek steit. De jaormedalie haet Ton same mit Marjo Peters vormgegaeve. ’t Thema waerde ouch gebroekt tiedens de “Nach van de Nuje Sjtadsprins”. Komplimente aan de ‘kemissie Nach’ en de Technnische Kemissie, die same in de Oranjerie veur ein prachtige entoeraasj verzorgde. Es hoge Kirkleiders waerde ’t Prinselik Gezelsjap nao veure gebrach op ein ludieke wies onger leijing van oze eige Erekannunik, Daeke Rob Merkx. Ontdaon van häör kleijaasj sjtinge zie sjtraolend en sjpringend oppe buhne; Dorslustige Hoogheid Sjtadsprins Vito I Campos, same mit zien drie adjudante Ayrton Campos, Joep Wolfs en Ramon Neijnens. Ein greuts Prinselik Gezelsjap veur ‘t Vastelaovendsezoen 2020!

Op 10 november is ós sezoen gesjtart mit Aad op Nuuj oppe Mert. Grote ópkoms en gooj sfeer zorgde veur sjoon ambiance. De kersverse Uulesjlager ‘Veer gaon los’ van Erwin Linssen, brach extra schwung. Ein waek later de Uule-akademie die super sjnel oetverkoch woor en ein blieverke is gewaore. Veer dingke det de tied riep is om, meer miense de kans te gaeve om ein kaart te koupe, ein kompliment veur dees kemissie!
Al in oktober haaje veer ein nuuj aktiviteit. De sjponsorkemissie organiseerde ein ‘sjponsor-netwerk-event’ in kesjteelke Hattem. Zeer suksesvol wodoor väöl sjponsore kinnes höbbe gemaak mit D’n Uul. De sjponsorkemissie hilt de benj werm mit potensjele nuuje en besjtaonde partners.
Veer kieke ouch nog aeve truuk op 2019. Ein langk sezoen mit hiej en dao get waat ouch ein bietje mis ging. Aevel es veer truuk kieke dan ware de Uulefestiviteite gesjlaag en veulde veer os ein Uulefemilie! Bezunjer waas de nuuj invölling van ’t Sjtadsprins-aaftraeje oppe dinsdaag. Boete op sjtraot wo de Vastelaovend ouch heurt. Mit ein gooje aafsjtumming mit de Bacchusklup, sjapeau det gaon veer weer zo doon. Veer wille Aad Sjtadsprins Marc II, adjudante Alexander, Jos, Berry en Regelnaef Dave same mit Aad Sjtadsjeugprins Danique I, adjudante Job, Vinn en Regelzöster Bibi grote dank zegke. Chapeau wie Marc II en Danique I letterlik SAME es pap en zoon, mit häör gezelsjap D’n Uul zeen veurgegaon. Spesjale dank aan Shoshan. Gangk der mer aansjtaon; ‘vrouw van’ Marc II en ‘Keuningin-mooder’ van Danique I. Tropewaeke in de winjter ware ‘t.

Helaas blieve sjtökke van 2019 ouch mit verdreet in ós gedachte, drie aktieve Uule zeen ós taege ’t inj van ’t jaor in 22 daag (…???, det göf rilllinge…) óntvalle. Thomas van Etten, lid van ós Algemein Besjtuur én de Raod van XI is plotseling en väöl te vreug gesjtorve. Thomas waas bekind bie de jeug es pappa van gardemaedjes Maud & Sara, es man van ós Kienjergarde-begleidster Marijn en es lid van de Jeugprins Keuze Begeleijings Kemissie.
Op 4 november kwaam ’t heftige berich det ‘oze Naad’, Rene Imkamp, plotseling en te vreug van ós haer waas gegaon. Bienao 40 jaor waas Naad in leidende funksiejs belangriek veur ós vereniging. Neet veur nieks waas hae ‘Broor van D’n Uul’ en Erelid. D’n Uul haet väöl aan Naad I, Prins in 1980, “Waat meint geer det hiej te doon is?”, te danke. Veural zien perseunlikheid, gevraogde én ongevraogde advieze gaon veer heel erg misse!
Drie daag later kwaam ’t dreuvige berich det Kim Beelen plotseling en väöl te vreug gesjtorve waas. Veur väöl luuj waas Kim neet zo bekind mer oppe achtergrondj wirkde zie hél veur D’n Uul. Es ein van de drievende krachte aan de decors en kostuums van de Kienjermusical, zo kósde alle kienjer sjtraole oppe buhne. ’T is zjwaor mer D’n Uul zal Thomas, Naad en Kim nooit vergaete!

Dit sezoen sjtaon veer veur nuuj oetdaginge. Behalve ’t versiere van de binnesjtad mit Uulevlagge, waere dit jaor ouch inkele etalages aangekleijd. “D’n Uul etaleert” leut miense kinnes make mit ós rieke Uuleverleje, dank aan onger angere ós TC, ozze Ere-archivaris en BIZ-binnesjtad. D’n Uul en de Sjtichting Sjtasiefestasie zeen same in gesjprek mit NS om de aankleijing van de sjtasie verder oet te breije. Om bie de Sjtasiefestasie te blieve; veurig jaor waas der veur ‘t eers “ein pavveljoen” baove “bar 1”. Neet om decadent te doon, mer om partners/sjponsore de kans te gaeve op ein anger wies de Sjasiefestasie te belaeve. Leegdrempelig en in Vastelaoveskleijaasj netwirke en feeste. Ein sjot in de roos; kommende Sjtasiefestasie is gans “oetverkoch”. Meugelik kommend jaor ouch op de Sjolefestatie!
De kaartverkoup löp zowieso in ’t algemein erg good. Veer boje ós leje sjpesjaal de kans om nóg eerder mit veurrang kaarte te bemachtige. Det waas ein groot sukses want de Verkesaovend waas al sjnel veur de helf oetverkoch. De 1×11 jubeleumedisie van Lachenderwies, door de Aad Prinse Klup georganiseerd is weer drie aovende oetverkoch, chapeau en wo blief det matinee…? De veurverkoup veur de prachtige Kienjermusical löp al wie eine trein. Dit alles is aanleijing om te kieke of ein verkoupportaal oppe site meugelik is. ’t Brögkske is gemaak; waer veur (mer) € 22,- per jaor lid van D’n Uul en behalve deze prachtige Zjwetskammezaol krieg geer väöl meer privileges. Zo sjtaot geer op pole position om de ivvenemente van D’n Uul te bezeuke. Veur ós jeugdige Vastelaovesvierders is in 2020 ouch van alles te doon. Spesjale aandach geit nao de Kienjergarde mit ein party vanwaege häör 6×11 jubeleum. De Uulejónges zeen gegreujd nao 15 men, det waert ein sjpektakel…! Meer euver de Kienjer- en Jeuggarde, de Uulejónges, ‘t Sjnapsnaazebal en netuurlik ozze Sjtadsjeugprins mit zien gezelsjap laes geer in de Uulewapper. Ouch waert der al naogedach euver 2021. Ós Algemein Besjtuur ongerzeuk en wirk aan ein anger opzat van de Sjtadsprinsresepsie, meugelik in kombinasie mit ein “waekinj-fees”, zo blief D’n Uul zich vernuuje. Ouch de eerste aanzitte richting ‘t 8×11 jubeleum in 2025 zeen al gezat!

’T is dudelik det D’n Uul volop greujt, bewaegt en gans vaerdig is om de Vastelaovend te viere, dieke merci aan alle kemisies en mitwirkers! Same mit de Prinselikke Gezelsjappe, ‘t ganse oettrekkend gezelsjap, alle kemissies en hélwirkende Uule gaon veer Groot Remunj en Limburg eine sjone Vastelaovend schinke. Alle Vastelaovendvierders wille veer alvas väöl Vastelaovesplezeer winse onger ós jaormotto ‘Veer laote de Kirk in ’t midde’. Aevel, vergaet ‘t neet; Vastelaovend viert ederein op zien eige wies… mer waal SAME!

Vórs Dirk I


 

Vórsvrieje gedachtes 2018/2019

Beste Uuleleje, Uulesjponzore en laezers van dit Zjwetskammezaol,

Sjtadsvastelaovesvereniging D’n Uul is weer wakker, nao de feesdaag is de aaftrap gegaeve veur ein lank Vastelaovessezoen! Ein prachtige Nach van de Nuuje Sjtadsprins mit ’t thema Sirkus. Nao eine helle kenónsjlaag sjteit de Nuuje Sjtadsprins dao greujts te sjtraole. Dórslöstige Hoogheid Marc II Brouns same mit adjudante Alexander Bongaerts, Jos van Rey (jr.), Berry Gossens en regelnaef Dave Mevissen; geneet der van! Dit lank Vastelaovessezoen guf ós ekstra väöl tied óm oos Vastelaovesgeveul te kinne deile mit alle Vastelaovesvierders in Remunj en gans Limburg. Mit es jaormotto ‘deil dien Vastelaovesgeveul!’, bedach door de moder van aad Sjtadsjeugprins Sjors I Smeets, Esther Verhagen, wo ein sjoon jaormedalie bie óntworpe is door Marjo Peeters. Alles van deze tied zit in ’t motto en de medalie. Van social media via ein duumpke of hertje van eine like oppe medalie, toet ’t waord ‘deile’. Deile duis se SAME, veer make der same eine geweldige Vastelaovend van!

Wo veer ouch greuts op moge zeen is de äöpening van oos nuuj Vastelaovessezoen. Aad op Nuuj ofwaal de 10e van de 11e waas mit eine grote opkóms en eine goje vastelaovessfeer ein geweldig sukses. De Uulesjlager van Patrick Roger mit ‘Miss Vastelaovend’ sjpetterde. ’t Leedje sjteit in de finale van ’t Midde Limburgs Leedjes Festival en haet ouch de halve finale van ’t LVK gehaold op 12 jannewarie. Waem wit waat der nog meer in zit…
Miss Vastelaovend is veur ós ouch eine link nao Ingrid Breugelmans. Ein Uulemaedje det es ’t Vastelaovesgezich van 2019 van L1, eigelik dus oos Miss Vastelaovend is, in kombinasie mit de titel van de Uulesjlager. Danke L1….!

Es Vórs kieke veer ouch nog aeve truuk op ’t aafgeloupe Vastelaovessezoen. Ein kort sezoen wo de ganse Uulefemilie aan bod kwoom op alle Uulefestiviteite. Aad Sjtadsprins Rogér II mit adjudante Marvin, Joost en Ruud en Aad Sjtadsjeugprins Enzo I mit adjudante Sjors en Stijn, ’t waas prachtig óm uch in ’t middelpuntj van D’n Uul te zeen sjtraole. Haaj die sjoon momente es herinnering veur altied bie uch, zowie veer altied sjoon herinneringe aan uch zólle höbbe!
Helaas zal 2018 ouch oppe meis sjlechte meneer veur altied in oos gedachte blieve. Gelökkig kump ‘t neet döks veur det ein aktief lid in funksie midde oet D’n Uul van ós haer geit. Mer 2018 waas verdorie (ekskuus veur ‘t waordgebroek) waal zo’n jaor. Op 4 augustus 2018 kwoom Ronald Klaver óm ’t laeve bie ein fataal auto-óngelök. Ronald waar op 7 jannewarie 2018 noch toet Grootmeister van D’n Uul beneump vanwaege al zien verdeenste veur ‘t Algemein Besjtuur, oze Raod van XI en es kertrèkker binne de Jeug en bie de Jeugprinskeuze- en Begleijingskemissie. Ronald, D’n Uul mót helaas verder zónger dich mer der zal altied örges ein sjoon Uulesjter aan de hemel sjtaon te sjtraole. En in det sjtraolend leeg drage veer de herinneringe aan dich altied bie ós…! Van hiejoet nog ins de waalgemeinde courage aan Carla, Max en de femilie. D’n Uul zal der altied veur uch zeen!

Dit Vastelaovessezoen waert biezunjer mit de Sjtasiefestasie, in 2019 2 x 11 jaor en mit ein sjpesjaal invölling in ’t pergram vanwaege det jubileum. ‘t Is oos eige en grótste Uulefees waat veur ein sjpektakel in Vastelaovend vierend Limburg zorg op dae zaoterdaag en mit netuurlik op vriedaag de
Sjolefestasie. Wiewaal oos Sjtadsprinse der nog neet aan wille dinke geit ’t aaftraeje op Vastelaovesdinsdaag ouch biezunjer waere. Ein nuuj invölling op dae lèste Vastelaovesdaag, oppe Roerkade/Roersingel naeve en nao ’t Bacchusdrieve. Op ’t allerlèste moment van de Vastelaovend, ’t Vastelaovesgeveul deile boete op sjtraot. Ouch is ’t geweldig det de ganse binnesjtad veurzeen waert van Uulevlagge. Oos ganse riek waert vanaaf 2019, de kómmende jaore in samewirking mit de BIZ en mit hulp van de TC volgehange mit de nuje Uulevlagge in kiosk-formaat. Waat good is óm te zeen, is det der ouch al waert naogedach euver nuuj ivvenemente in 2020.

Nog neet alles kan gezag/gesjreve waere, mer de kans is groot det der ein anger opzat van de Prinseresepsie kump en in samewirking mit ‘ein anger organizasie’ ein ‘waekinj-fees’ kump. In de loup van 2019 heurt geer dao meer euver. Zo blieve veer bie D’n Uul vernujend bezig want de waereld dreijt mer door wo-in veer ’t Vastelaovesgeveul blieve deile. In det perspektief is ’t ouch sjoon óm te zeen det de Aad Prinse Klup ein nuuj konsep bedach haet mit eine Swarée op 23 fibberwarie in Kesjteelke Hattem. Chapeau!! En wie sjoon det binne oos Jeug, behalve de Kienjer- en Jeuggarde, vanaaf dit jaor ouch jónges aktief gaon waere. De ‘Uulejónges’ gaon zie heite in de laeftied van zes toet óngeveer twelf jaor.
Ein sjoon begin van ein prachtig nuuj ‘Uule’- ongerdeil van ‘t oettrèkkend (jeug-)gezelsjap en geer gaot häör zeker taegekómme! D’n Uul is vaerdig óm ’t Vastelaovesgeveul te gaon deile.

Eine dieke merci nao alle kemissies en mitwirkers die es vriewillegers de henj oet de moewe sjtaeke. Veer zeen der van euvertuug det ós Prinselike gezelsjappe D’n Uul op ein Uulwaerdige wies zólle veurgaon. Same mit ’t ganse oettrèkkend gezelsjap, alle kemissies en helwirkende Uule gaon veer in Remunj en Limburg weer eine sjone Vastelaovend make. Alle Vastelaovesvierders wille veer dan ouch alvas väöl Vastelaovesplezeer winse ónger oos jaormotto ‘deil dien Vastelaovesgeveul!’. Aevel,

Vastelaovend viert ederein op zien eige wies… mer waal SAME!


Vórs Dirk I

 


 


Vórsvrieje gedachtes 2017/2018

Bèste Uuleleje, Uulesjponsore en laezers van dit Zjwetskammezaol.

D’n Uul is “Vaerdig veur Vastelaovend”. Es geer dit namelik laest, dan zeen oos 2 Sjtadprinselike gezelsjappe inmiddels oetgerope en bekind, sjpringe zie mit Prinsekruuts, möts, vaere en scepter in ’t róndj en gaon zie D’n Uul veur. Mer veurdet veer same ’t geveul van Vastelaovend gaon belaeve wil ich es Vórs ouch nog aeve trök kieke op ’t aafgeloupe Vastelaovessezoen en det trök kieke doon ich mit väöl plezeer.

De beste herinneringe höb ich es ich trök dink aan de momente det oos sjitterende Prinselike gezelsjappe der mit ‘t ganse oettrèkkend gezelsjap en veer es Uulefemilie der dus same op oet trókke.
Aad Sjtadsprins Marnix I en Aad Sjtadsjeugprins Niek I, ’t veulde es ein eer óm same mit uch en eur adjudante (en matterjaalmeister) D’n Uul te moge veurgaon. Aevel geer waas es Sjtadprinselike gezelsjappe in 2017 ‘t sjtraolende middelpuntj. De daag det veer mit 3 bösse, jao want de Prinselikke Stadts-Garde ging ouch mit, nao Baek ginge typeerde veur mich ’t meiste ‘t sezoen 2017. Allemaol SAME; mit de Kienjergarde, Jeuggarde, Damesgarde, Prinsekapel, Raod van XI, Senaat, Dageliks Besjtuur en dus mit de Prinselikke Stadts-Garde es gaste. De ganse Mondial in Baek sjting mit aope móndj te kieke en te loestere nao ós. Te kieke nao de danse van oos gardes, te loestere nao oos PK, en dus baovenal te kieke nao oos sjtraolende Prinselike gezelsjappe. Det is Vastelaovend en ouch veur 2018 is D’n Uul “Vaerdig veur Vastelaovend”!

Helaas waas 2017 neet allein mer positief. Net wie in 2016 zeen der in 2017 väöl te väöl “echte Uule” euverleje en oos óntvalle. Aevel wie veer die meuilike momente höbbe gedeild en belaef teikent ouch oos prachtige vereniging. Neet allein in veursjpood mer ouch in taegesjpood same elkaar sjteun gaeve, same ’t verdreet verwirke en de familie óngersjteune. Óm dan dae taegesjpood toch mit twee positieve Vastelaovesgedachtes aaf te sjloete wil ich nog aeve sjtilsjtaon bie Vastelaovesdinsdaag. 2017 zal veur altied herinnerd blieve es sjtart van ein nuuj tradisiej, dao zeen veer good in bie D’n Uul. Veer ere en gedinke oos euverleje Erelid en Aad Prins Huub II Hammer veur alles waat hae veur D’n Uul haet gedaon, mer veural waat hae decennia lang veur oos Jeugprinse haet gedaon.
Daoróm waert vanaaf Vastelaovend 2017 bie ’t aaftraeje van de Sjtadsjeugprins, daezelfde Jeugprins gedecoreerd mit de Kommandäör in de Orde van Huub Hammer. Ein prachtige óngersjeijing es ‘kopie’ van de Vórs Lowie dae oze Sjtadsprins bie zien aaftraeje krieg, mer dan in zilver. Ein herinnering aan eine prachtige miens! Vastelaovesdinsdaag waas de eerste keer det dit plaatsvónj en ’t waas veur mich ein grote eer óm es Vórs same mit Marij Hammer veur de eerste keer dees óngersjeijing oet te reike. Ouch eine angere zeer belangrieke en invloedrieke Uul ere veer. Erelid, Aad Prins en Senator Jos III Stoks waert vanwaege zien väöle inzat veur D’n Uul en in ’t biezunjer ’t mitsjrieve van de Zjwetskammezaol en later ’t digitalisere van al die Zjwetskammezaole herdach.
Det is gebeurd door alle Zjwetskammezaole, die ouch door hem zeen gedigitaliseerd, in sjtappe van 11 sjtöks op oze Uulesait digitaal toegankelik te make. Zo blief oos historie laeve, ouch in de moderne tied! Ouch det is Vastelaovend en D’n Uul is “Vaerdig veur Vastelaovend”!

D’n Uul is Vaerdig veur Vastelaovend! Sjtadsprins Rogér II en Sjtadsjeugprins Enzo I zeen same mit häör adjudante in eder geval erg good veurbereid op häör taak. Allebei de keuze- en begeleijingskemissies op veurhandj alvas dank daoveur! Ouch alle kemissies en mitwirkers binne D’n Uul zeen veer väöl dank versjöldigd. Grote dank veur al die helwirkende Uule, want geer zorg der veur det oos PrinselikeGezelsjappe ein sjitterende ervaring gaon mitmake die zie nooit meer zólle vergaete!
Helwirkende Uule zitte veer netuurlik ouch in ’t zunke. Aafgeloupe sezoen haaj ich de eer óm names D’n Uul Brenda Meijs te bevordere toet Eredame en op de Algemeine Lejevergadering Harry Allers toet Erelid te beneume. Terechte waarderinge veur echte Uule. Det hilt neet op want aafgeloupe zondaag tiedes de Interne Prizzentasie moch ich, zónger anger helwirkende Uule tekort te doon, mer leefs 2 dames (Margje Spätjens en Carla Klaver) toet Eredame en 3 here (Koen Janssens, Marcel Favre en Ronald Klaver) toet Grootmeister bevordere. Zo is D’n Uul “Vaerdig veur Vastelaovend”!

Ich bön dervan euvertuug det de Prinselike gezelsjappe van Sjtadsprins Rogér II en Sjtadsjeugprins Enzo I same mit häör adjudante, D’n Uul op ein Uulwaerdige wies zólle veurgaon. Same mit ’t ganse oettrèkkend gezelsjap, alle kemissies en helwirkende Uule gaon veer Remunj en Limburg weer eine sjone Vastelaovend bringe. Alle Vastelaovesvierders wil ich dan ouch op dees plaats, alvas väöl Vastelaovesplezeer winse ónger oos jaormotto “Vaerdig veur Vastelaovend”. Aevel, ederein op zien eige wies… mer waal SAME!


Vórs Dirk I



Vórsvrieje gedachtes 2016/2017

Bèste Uuleleje, Uulesjponzore en laezers van dit Zjwetskammezaol.

Es ich dit sjrief, is ‘t kort nao ein héél zjwaor Uuleweekend. Sjterker, truuk kiekend op gans 2016 dingk ich det ‘t veur D’n Uul behalve eine sjitterende Vastelaovend, eigelik ein jaor mit eine gitzjwarte randj waas. Gitzjwart vanwaege de rasechte Uule die ós dit jaor óntvalle zeen, det waas neet nieks veur de Uulefemilie.Vastelaovend viers se mit ein lach en ein traon. Det beteikent neet alein sjpass en plezeer, mer ouch verdreet en treurnis same deile. En juus in det same deile sjuult de krach van ós sjitterende vereniging. Ouch op meuilike momente veur elkaar klaor sjtaon, elkaar sjteun gaeve en same ’t verdreet verwirke. Helaas waas det dit jaor te dök neudig. Mer ouch ’t same verwirke van al det verdreet teikent de krach van ós Uulefemilie.

Truuk kieke op Vastelaovend 2016 doon ich mit väöl plezeer en neet allein ómdet ich mien eerste sezoen es Vórs mit höb moge make. Nae, veural óm te zeen wie ós sjitterende Prinselike gezelsjappe der same mit ‘t ganse oettrèkkend gezelsjap en de ganse Uulefemilie ein sjitterend Vastelaovenssezoen van höbbe gemaak!
Aad Sjtadsprins Stefan I Cox en Aad Sjtadsjeugprins Sjors I Smeets, ’t veulde es ein eer óm same mit uch D’n Uul te moge veurgaon. Biej eige ivvenemente mer ouch op “boetelandse reize”. Dan waas geer es Sjtadsprins en Sjtadsjeugprins same mit uch adjudante (en adjudant-koetsier…) ‘t sjtraolende middelpuntj. Geer höb in dit korte sezoen uch enthousiasme in Remunj en gans Limburg zichbaar euver gebrach, chapeau!

‘t Waas aevel veur ós Prinselike gezelsjappe gaar neet meugelik óm zo te kinne sjtraole zónger alle kemissies en mitwirkers binne D’n Uul. Veur al die helwirkende Uule grote dank, want geer höb der veur gezorg det ós Prinselike Gezelsjappe ein Vastelaovenssezoen höbbe mitgemaak waat zie nooit meer zólle vergaete!
‘t Jaor 2016 waas bezunjer ómdet der van die väöle helwirkende Uule terech ein deil in ‘t zönke zeen gezat en óngersjeije zeen. Zónger emes te kort te doon, waas ’t sjoon óm te zeen wie ein greutse Eredame en twee sjtólse Grootmeisters in ’t middelpunt sjtinge te sjtraole. Spesjaal waas ‘t óm op de Algemein Leje Vergadering in juni eine zeer bezunjere Uul, dae dit döbbel en dwars verdeent, toet Erelid te moge beneume.

Haopelik beejt 2017 ós Uulefemilie neet allein minder treurnis, mer veural väöl sjpass en plezeer en ein heel sjoon Vastelaovenssezoen. Sjtadsprins Marnix I Adams is same mit zien adjudante (en rmatterjaalmeister…) in eder geval erg good veurbereid op zien taak. Det zal zeker ouch zo gelje veur de Sjtadsjeugprins en zien adjudante. Allebei de keuze- en begeleidingskemissies op veurhandj alvas dank daoveur! Ich bön dervan euvertuug det de Prinselike Gezelsjappe D’n Uul op ein Uulwaerdige wies zólle veurgaon. Same mit ’t ganse oettrèkkend gezelsjap, alle kemissies en helwirkende Uule gaon veer Remunj en Limburg weer eine sjone Vastelaovend bringe.
Alle Vastelaovesvierders wil ich alvas väöl Vastelaovesplezeer winse ónger ós Uulemotto ’t Uulemaske pas ederein. Aevel ederein op zien eige wies… mer waal SAME!

Vórs Dirk I


Vórsvrieje gedachtes 2015/2016

Es ich dit sjrief, is ’t de middaag veur Sinterklaosaovend. Ouch is ‘t twee waeke nao mien insjtallasiej toet 7e Vórs van Sjtadsvastelaovesvereniging D’n Uul en wil ich uch vaöl dank zegke veur dae sjitterende aovend, wó ich vaöl van uch de handj höb moge sjödde. Dae aovend waas Uulwaerdig, Uulegezellig en veural SAME!!

Tiedes ‘t sjrieve dink ich al veuroet en det ’t nog mer aeve is toet 2016. Det beteikent det sjnel de “2e helf” van sezoen 2015-2016 van sjtart geit mit ’t belangriekste waekinj van ós sjitterende vereniging.
Vanwaege ’t korte sezoen ein waekinj mit zowaal De Nach van de nuuje Sjtadsprins en de Middaag van de nuuje Sjtadsjeugprins. Ich kiek dao es Vórs al mit heel vaöl plezeer nao veuroet!
Es geer dit laest dan weit geer inmiddels waem de 2 Prinselike gezelsjappe zeen die ós mit ’t viere van de Vastelaovend in ‘t Uuleriek en wied dao boete, veurgaon.
De wirkgroepe van “de Nach” en “de Middaag” gaon evaluere en de wirkgroepe van Uule-ivvenemente die de kómmende 4, 5 waeke plaatsvinje zitte de kómmende tied de sjpraekwaordelike puntjes oppe i.
Ich wins alle wirkende Uule oppe veur- en achtergróndj daobiej heel vaöl sukses en bön der van euvertuug det geer der get sjoons van gaot make zódet veer allemaol same de Vastelaovend kinne viere en oetdrage.
In dit korte sezoen sjteit ós Oettrekkend Gezelsjap ein bómvol Wanjelprogramma te wachte.
Same mit ós Prinselike gezelsjappe gaon de Kienjergarde, Jeuggarde, Damesgarde, Prinsekapel, Raod van XI en soms óngersjteund mit wiesheid vanoet de Senaat op paad óm D’n Uul in Remunj en Limburg de Vastelaovend te bringe.

Ich bön der in eder geval heel greuts op det dit ‘t eerste Vastelaovessezoen is wó in ich es Vórs, D’n Uul es vereniging moog veurgaon en det ich daoróm dees wäörd moog sjrieve.
Oeteraard gaon de Sjtadprins en Sjtadsjeugprins biej ’t oetdrage van de Vastelaovend veurop, want Vastelaovend, DAO dreijt ’t óm! Ederein op zien eige wies… mer waal SAME!!

Väöl Vastelaovesplezeer gewins,

Vórs Dirk I


Dirk Franssen nuuje Vors van Sjtadsvastelaovesvereniging D’n Uul Remunj!

Oppe vergadering van ’t Algemein Besjtuur van D’n Uul op 22 juni 2015, waas ein van de agendapunte “Verkeezing Vors van D’n Uul”.
Nao ’t aaftraeje van Vors Sybaer I in november 2012 en 3 “Vorsvrieje seizoene”, waas d’r eine kandidaat voor de funksie van Vors van D’n Uul in de persoon van Dirk Franssen.
Hae maakte nao de Vastelaovend van 2015 biej ’t Algemein Besjtuur bekind gaer kandidaat te wille zeen en dao mit sjtarte de prosedure zowiej die volges ’t Hoeshaajelik Riggelement van D’n Uul gevolg deent te waere.
Konform ‘t Hoeshaajelik Riggelement van D’n Uul waert in de eerste vergadering van ’t Algemein Besjtuur nao de Algemeine Leejevergadering de verkeezing van Vors geangendeerd mits en veur zowiet det d’r eine kandidaat is. Dit waas noe ’t geval omdet Dirk Franssen zien kandidatuur in ’t veurjaor van dit jaor bekind haet gemaak.

Dirk is geine onbekinde binne D’n Uul. Naodet in 2006 ’t SJAB ( ’t Samewirkend Jeug Algemein Besjtuur) is opgerich, waas Dirk de eerste veurzitter van dit “Jeugbesjtuur”.
In 2007 trooj Dirk toe toet de Raod van XI en waerde Dirk op de Algemeine Jaorvergadering gekaoze toet ’t Algemein Besjtuur van de vereiniging.
In 2008 waerde Dirk verkaoze in ’t Dageliks Besjtuur en sinds 2010 vervuld hae de funksie van Sirremoniemeister.
D’n Uul is biejzunjer greuts detter nao ’t aaftraeje van Vors Sybaer I en de dao nao 3 “Vorsvrieje seizoene” , eine nuuje Vors van de vereiniging is gekaoze in de persoon van Dirk Franssen.

Op zaoterdaag 21 november 2015  waerde ónger ein plechtige, besjlaote sirremonie in Kesteeltje Hattem Dirk Franssen toet nuuje Vórs van D’n Uul geinsjtalleerd. Nao aafloup kos ein eder Vórs Dirk I fillesietere op zien resepsie.
Gesjterk door de Vórstemöts, de vaere van de Vórs, Vórstekitting en Vórstescepter.
Vórs Dirk I sjteit, mit zien 34 jaor, te book es de jóngste Vórs van D’n Uul.