Allard I (Schmitz)
Allaar Alaaf!

“Nur vom Feinsten” en doorgaon toet ’t gaetje – Wiej sjoon ’t toch is om eine Remunjse jong te zeen in de bleuj van zien laeve – wiej ooze nuuje Prins, Allard I, Schmitz!

Oze nuje veurgenger sjrief zich Allard Schmitz. Allard is 31 jaor, eine röstige, besjaafde gas. Oojt mósde hae oet Remunj vertrèkke, mer nao veer jaor is hae trökgekómme ómdetter det wól, haet d‘r zich “gesetteld” en wil noojt meer weg.
Gaef ‘m ins óngeliek. Hae woont in hertje sjtad, aan ein van de sjoonste sjtraote, in ein mit sjmaak ingerich hoes. Hae laef dao same mit Suzanne Vaessen, zien vrundjin, en döchterke Charlotte, det 2 waert mit de vastelaovend. En wiej ’t zo oetkump waert in de zomer oppernuuj de ooievaar verwach en zólle ze mit zien vere zeen.  Allard haet de beste vrunj diej me zich winse kint. Same mit de vrouwluuj zeen ziej eine hechte troep.
Sins ein jaor is hae eige baas. Es door de wol gevèrfde boewkundige regelnaef is hae drök bezig veur partekelere en bedrieve, diej hae gaer alles oet de hènj nump waat mit boewe te make haet.  Allard haet zien zaekskes dus prima óppe riej sjtaon, neet in de lèste plaats ómdet hae dit jaor baovenop det allemaol ouch nog ins Prins is.  De Prins en zien maedje zeen vastelaovesvierders van ’t zuverste water!

De Sjuur
Allard Hubertus Elisabeth Schmitz waerde gebaore in 1978, ’t jaor van de WK-finale en de opzeenbarende gijzelinge. Zien weeg sjtóng in Maerem. Opa en Oma hadde dao ein kefee: De Sjuur. De Oude Borg, wo ziene Pap zellef ouch nog ein tied gewoond haet, waas de sjpeelplaats van zien kienjerjaore. Hae wit nog alles euver de vastelaovend es menke. Mit keep, septer en möts rende hae verkleijd es Prinske door De Sjuur. Euver det saort dinger gesjpraoke …

Amersfoort en trök
Wiej zien elders oetein ginge vertrok hae op zien 8ste mit zien Mam en zöster nao Herte. Op zien 13e kreeg ziej ein baan in Amersfoort! De jóng verhoesde mit. Zien “ballingsjap zól veer jäörkes doere. 17 Jaor waas hae wiej hae besjloot óm trök te gaon nao zien gebaortesjtreek ómdet hae zich hiej meer op zien gemaak veulde. Es prakties ingesjtèlde jóng vónj hae al flot ziene waeg in de Boewkundige sjoling aan de MTS.

Greuje in ‘t wirk
Daonaeve waas ’t aanpakke. Allard ziene eerste baas waas ein instjallasiebedrief. Nao ein paar jaore kwaam Allard aevel biej Tom Loven terech, wo zien krach herkind waerde. Zien gaaf kreeg de ruumte óm zich flot te óntwikkele, in de praktiek van ’t bedrief en in de sjoolbanke. De Prins sjöpde ’t toet “logistiek manager” van ’t aannaemingsgedeilte en droog op ’t lès de verantjwaordelikheid veur ’t planne van ’t werk van 70 miense. Alles kwaam op ziene bero biejein: teikeninge, miense, matriejale, ’t kóntak óngerein.
Allard kiek voldaon trök op ziene tied biej Loven, wo d’r euverigens ouch Vors Sybaer leerde kinne. ‘t Waas ein fantasties bedrief. Sjoon ware projekte wiej ’t inrichte van de Remunjse sjtumlokale, ‘t hoog water, en verboewinge zo es Hamers, Doedels, ‘t Kelderke, de Kieksjop en Halfords, óm mer get te neume. Aevel ouch boete Remunj haet d‘r al duchtig sjpaore naogelaote.

Eige baas
Inj 2008 zag Allard ziene wirkgaever “tabee” óm veur zich zellef te beginne. Tom had ‘t bedrief verlaote, ‘t bedrief waas verangerd en de tied waas riep óm toch ins get veur zich zellef te beginne. Hae waogde dus de sjprunk en dao haet hae gein sekonde sjpiet van gehad. Hae maak noe ónger eige naam boewprojekte veur partekelere en bedrieve. Projekte diej get ekstraas van ‘m vraoge en wo drök op sjteit, det zeen veur hem de krinte in de mik. Dan waere de sjpraekwaordelikke moewe opgesjtruip. Het perfeksjonisme det Allard Schmitz aan de daag ligk waert door de klantje ongeluifelik gewaardeerd.

Zate hermeniej
Vanaaf ’t jaor detter toeskwaam maakde Allard serjeus werk van ziene vastelaovend. Vanaaf det mement haet d‘r geine vastelaovend euvergesjlage.
De eerste tied vierde hae ’t fees nog in Maerum mit zien naeve. Dao zoot d‘r ouch eine tied in ein zaate hermeniej diej geine naam had. De hermeniej had eine trómmeleer dae noojt van ophaje weite wòl. Op ’t inj van de daag ging zien geroeffel de luuj zo op de zenewe wirke det me ‘m de trómmelsjtekke aafnoom en doormidde brook. Mit plekbandj waerde de klöppelle weer aaneingezat en ’t fees ging roeffelend wiejer. Dae trómmeleer waas hae.

Obere
Róndj 2000 waas Allard mit de vastelaovend döks te vinje achter de gaam van Allebenäör en De Post. “In de horeca wirke mit de vastelaovend is gaaroet neet vervaelend. Achter de gaam höbse ein idiejaal plaats óm dich ’t gans sjpeel ins good te bekieke”, zaet t‘r.
In diej jaore gebeurde ’t ouch det hae op vastelaoveszaoterdaag örges op sjtraot ein aad camouflage-net vónj. Es sjtroek verkleijd leep hae daomit drie daag door de sjtad.

Suzanne

Weer ein paar jäörkes wiejer leerde Allard zien maedje kinne, en mit Suzanne kwaam ein sjone troep vastelaovend vierende vrunj in zien laeve wovan d’r noe drie zien adjudante waere.
Suzanne is ein door en door Remunjs maedje det de kos verdeent es sjeijingsavvekaot biej Hameleers, Van den Boomen en Stevens avvekaote. ‘t Is eine echte vastelaovesgek det in zien wilj jaore achter de Uuleprins aanjoog óm gekös te waere, det biej eder Masterbaere-bàl van de pertiej waar, det mit zien vrundjinne ein rol aafsjprook en diej ’t gans fees door volheel. Eine keer ware ze sjoonheidsjpesjalis. Toen haet ’t de Prins de naegel geknip en gelak. Dae Prins waas Sybaer I.
Suzanne loog mit 40 graode koors in ‘t bed wiej Allard gevraog waerde of hae Prins wól waere. ‘t Waas in eine sjlaag baeter wiej ’t det van hem heurde. Waat eine kedo: “eine Prins gans veur dich zellef “!

Pergram
Es veer de nuje Prins vraoge wiej zien vastelaovespergram d’r normaal gesjpraoke oetzuut, haolt t‘r ins deep aom en begint t‘r te vertèlle (waat hiejnao kump is ein langk verhaol det hae toch kórt hilt): “Donderdaagaovend Kwartjesbal in de Amstelclub. Vriejdaag nao ‘t wirke nao de Sjolefestasie. Zaoterdaag mitwirke aan de SjtasieFestasie en daonao door nao de Amstel en de Tram óm te viere. Zóndaagmorge kóffie drinke en ein bótterhemke aete mit vrunj, vrouwluuj en kienjer biej Braam oppe beugelbaan. Daonao deenblajertrèffe biej de Tram en daonao de resepsie van de Prins. Kuukskesmaondaag sjprik vanzellef, Optòch kieke en dan toet wied in de nach op sjtap. Dinsdaags de Sirk, de Tram, Bacchus, aaftraeje Jeugprins, aaftraeje van de grote Prins, en óm twee oere nao de Amstelclub wo ederein zich tröf veur de ontlajing. Dao is ’t dan baeregezellig. Goonsdaags heringesjèlle in Amstel, Uulenès of de Tram. En altied doorgaon toet ’t gaetje: det mót!” Sjoon is det ‘r onnog zaet: “Veur mich moogde ’t röstig langer doere.” …

Veurgenger

Allard geit Remunj regere ónger eine nog neet oetgegaeve naam: Allard I. In zien liefsjpreuk, “Alaar Alaaf”, sjpeelt hae mit ziene naam. Allards hoesorde is ein liene zèkske mit houter boewsjteinkes, ein verwiezing nao zien vak.
De Prins zal waere biegesjtaon door drie Adjudante: Roel Stroeken, Jeroen Opheij en Lars Heuvelmans, bekinde Remunjse sjtraotvèrkes, Uule en Aad-Masterbaere (!). In väöl zake (hoes koupe, trouwe, kienjer kriege) zeen ziej ‘m veurgegaon, aevel in ein dink neet: Allard is noe Prins, veurgenger van de heel bups. Prins en Adjudante zalle ’t fees aevel aangaon es vrunj en ouch de maedjes zalle häör pertiejke mitsjpele. ‘t Euverligk en veurbereijinge höbbe al väöl plezeer gebrach. Sjeffäör is de
Prins zien sjoonvader, John Vaessen.

Vol verwachting
Es veurgènger in ’t Vastelaoves-sjpeel wil ich d’r op de juuste memente zeen en de miense enthousias make. Geer kint d’r zeker van zeen: ich zal alles d’r oet haole. Det zaet Allard. Zinge kint ‘r, danse is gein perbleem en hae geit door toet ’t gaetje. Ein bietje pien, det heurt d‘r biej …

Perseunlik
Aan ’t inj van dit verhaol nog get perseunlikke dinger.

• Sjterrebeeld: Kreef.
• Lekkerste aete: De “spareribs” van Faubourg, en boete de Franse keuke nieks biejzónjers behalve eigelik alles.
• Elfde van de Ellefde: Kölle (en blieve sjlaope).
• Meziek: Van klassiek toet Kölsje teun (diej leedjes kint hae allemaol).
• Fekansie: Sjpaanje, Cote d’Azur.
• Sjport: vreuger handjbal, noe tennisse en golf.
• Auto: Range Rover (aevel veurluipig nog effe Volvo).

Uule, sjpits Uch op deze vastelaovend en op deze Prins. Allard I zal Uch veurgaon zo wiej hae zellef is. Hae geit d‘r gans veur, hae guf zich helemaol, regelt alles veur Uch, mit ‘t oug veur de klein dinger en geveul veur trediesie, en zal es fiene miens ouch mit sjmaak regere.
Deze vastelaovend waert “nur vom feinsten!” Dao kint geer op boewe!

JPh