Kienjermusical 2023: Aafgelas?!

Zaoterdaag 11 fibberwarie 2023
16:00

’t Is ein supergezellige bende in Sjneelandj. De Sjneekeuningin äöpent de wintjersjportspele. Sjteeds meer miense komme dao haer. Want waem wilt d’r nog vastelaovend viere?
Remunj is in de ban van de wintjersjport. Vastelaovend wird daomit sjteeds minder populair.
Maar neet biej Dex. Hae wilt gaer sjoolprins waere, dao haet hae altied van gedruimd. Maar noe liek ’t d’r op det zelfs de sjoolvastelaovend aafgelas geit waere omdet toch eederein nao de sjnee op fekansie geit.
En de Sjneekeuningin vindj det prima. Want wie meer miense geine vastelaovend viere, wie meer d’r komme wintjersjporte. Zie verdeent dan meer geldj. Zie vindj vastelaovend daorom ein bedreiging veur de economie van häör landj!
Wintjersjport of toch vastelaovend? Es det maar allemaol good kump……

Algemeine infermasie:

Zo’n 60 kienjer doon dit jaor weer mit, mit de Kienjermusical. De Kienjermusical is ein veursjtelling veur en door kienjer, mit tóneel, zank en dans.
Dit jaor neet bie de Appelsienerie, want die zeen aan ’t verboewe. Dus höbbe veer get heel sjpesjaals: de Kienjermusical Film. Netuurlik kint geer ouch dit jaor weer allemaol kómme kieke!
De film is veur de ganse femielie, grootvaders en grootmoders zeen ouch van herte wilkóm.

De veursjtèllinge zeen op 11 en 12 fibberwarie 2023 in ’t Royal Theater (de aaje bioscoop) aan de Hamsjtraot in Remunj.
Op dees daag begint de eerste veursjtèlling óm 13:00 oer. De tweede veursjtèlling óm 16:00 oer.
Nao de Kienjermusical is ‘r altied ‘ne sjone naozit, wo ónger ‘t genot van ‘n drenkske nog gezellig kin waere naogepraot.

Kaertjes koste €11,- en zeen te koup via Theaterhotel De Oranjerie in Remunj