Prins Marc III

Van Sjnapsnaas toet Uuleprins

Zo kint me ‘t beste de nuuje Sjtadsjeugprins van 1999, Marc III, in ‘t kórt ómsjrieve.
Want veurig jaor haet hae al min of meer kinne oefene es Prins van de Sjnapsnaze, dit jaor geit d’r ‘t gans make es Jeugprins van D’n Uul. Ich höb ‘t dan euver Marcus Hermanus Marie Somers, in ‘t dageliks laeve baeter bekind es Marc Somers. Hae waerde gebaore op 19 julie 1987 in Remunj in, wiej kint ‘t ouch angers, ein Uule-femieliej.

Marc is de zoon van Jos & Gertie Somers: Jos sjleit al jaore de dieke tróm biej de Prinsekepel van D’n Uul, en Gertie is ein jaor of ach sjriefmaedje van de Bóntje Aovend gewaes. Marc haet ouch nog twee zösterkes, Kim en Renée, diej allebeij lid zeen van ós Kienjergarde.
Wiej ederein mót ouch de Jeugprins nao sjool, en Marc III duit det biej basissjool De Sjteine Brök, wo hae biej meister Henk Schreurs en juf-frouw Karin Simons in de groep zit.
Netuurelik duit hae leever get angers dan nao sjool gaon, wiej bedmintonne, voetballe biej Victoria,
kompjutere en films kieke, hae vónj ‘Titanic’ beveurbeeld ein sjoon film, maar nao aksiejfilms kiek hae ouch gaer. De meiste meziek vindj hae leuk en ouch ‘t meiste aete lös hae waal, ziene favoriet is aevel zoermoos mit roukwórs en sjtökskes sjpek en kasselerrib. ‘t Is maar det geer ‘t weit!

Ómdet hae veurig jaor Prins van de Sjnapsnaze is gewaes, dach hae det d’r geine Jeugprins van ‘n Uul meer kós waere. Daoróm waas hae heel bliej det d’r es Jeugprins van D’n Uul gevraog waerde, ‘t waas ein grote verrassing veur hem. Daonao kwaam de twiefel, want eigelik dörfde hae eet ómdet d’r toch ein bietje verlaege is, maar hae wól waal erg gaer Jeugprins waere. ‘t Leek ‘m leuk en sjpannend, zeker ómdet ‘t veur ein groot pebliek in De Appelesienerie is.

Marc had ouch mit kinne doon aan de Kienjermiddaag, maar det mót hae dan jaomer genóg misse.
Marc III haet zich veurgenaome óm ónger zien Prinssjap van deze vastelaovend ein knallend fees te make, wobiej väöl plezeer en ‘t ederein nao de zin perbere te make veurop sjtaon. Hae vinjt D’n Uul ein leuke vereniging diej biejnao euveral nao toe geit, hae haop dan ouch det d’r zo väöl meugelik mit moog gaon, want det vindj hae sjoon. ‘t Mitdoon aan de Grote optoch is veur Marc ‘t hoogtepunt van de vastelaovend , waal zuut hae erg op taege ‘t oetroope, ómdet d’r toch ein bietje verlaege en zenewechtig is.

Hae haop allein maar leuke dinger mit te moge make en te doon, wiej ‘t aanbeje van ‘t denske van de Kienjergarde, diej d’r biej gelaegeheid de Spice-maedjes wil neume. Erg gepas mit dae meziek en dans!
Netuurelik haet Marc III hulp neudig van zien Adjudante, dit jaor zeen det Guy van Cruchten en Mike Schaefer, diej ouch op De Sjteine Brök zitte. Toch kint dit drietal zich al van jóngs aaf aan, zegk maar vanaaf de kleutersjool.

Guy is 11 jaor en zoon van Leon en Sabina. Guy duit gaer voetballe en kompjutere, hae is ouch nog lid van scouting St.Hubertus oet Herte.
Mike is 12 jaor en zoon van Wiel en Karin. Ouch Mike duit gaer voetballe, en waal biej Sjwif, en kompjutere.
D’r zeen al gooj aafsjpraoke gemaak euver waem waat mót doon, de take zeen zèllefs al verdeild. Ich höb dus ouch ‘t geveul det ‘t waal good geit, mit Marc III ziene liefsjpreuk kint det eigelik ouch neet angers : Ós maak geer nieks wies, veer doon ‘t sjpelenderwies
Mich res allein nog óm Sjtadsjeugprins Marc III, zien Adjudante Guy van Cruchten en Mike Schaefer, zien elders Jos & Gertie en zien zösterkes Kim en Renee eine ónvergaetelikke vastelaovend en netuurelik ein geweldig Prinssjap toe te winse!

Erik Snoek,

Kemissie Jeugprins en Kienjergarde