Veurzitter

Veurzitter Joep I Seuren

Wie greuts det ich drie jaor geleje waas wie det ich gevraog waerde es Sjtadsprins, Prins van Sjtadsvastelaoves vereiniging D’n Uul, wie greuts det ich noe weer bön det geer – es ALV – mich gekaoze höbt es eure nuje veurzitter van D’n Uul. Ein sjieke vereiniging die mich ech aan de pens geit. De sjone traddiesies, verhaole, protocolle, sjponsore, al die vriewilligers en neet te vergaete de meziek.  D’n Uul is meer den ’n Vastelaovesvereiniging, ’t is ein kultureel ankerpuntj, ‘ne sossosjale verbinjer en ’n laevend symbool van traddiesie en identiteit.

’T Zeen grote sjoon om te vulle, – noe zeen die mit mien 42 al rap groter – ,mer die oetdaging gaon ich gaer aan. Daomit zól ich den ouch metein van de gelegenheid gebroek wille make om Dirk van ganser herte te bedanke veur zien insjpanninge die hae – es veurzitter – want hae blief netuurlik nog Vórs! Veur D’n Uul geleverd haet. Ich kiek oet nao oze samewirking en bön der van euvertuug det – gezeen oze eerdere samenwirking ein aantal jaor geleje – det waal good kump.

Zo wie al eerder in de vergadering ter sjpraoke is gekomme is der de kommende 11 jaor genog te doon. Ich bun greuts op al die miense die mitgewirk hubbe aan de brainstorm euver de toekoms van D’n Uul. Dao is ein sjiek dokument oetgekomme welk veer de kommende jaore es leidraod zolle gebroeke om de vereiniging door de verangerende tieje te loodse. Det doon veer toekomsgerich, vernujend en veural same. Same verder boewe op ein sjtevig fundament van al ’t sjoons waat D’n Uul al te beje haet.

Ich ronj aaf – zónger miene liefsjpreuk – en mit heel väöl zin en motievasie in waat geit kómme.