Jimi I

Alles paletti?
Confetti!

Jimi van Rey gebaore op 26 oktober 2011, sjtraolt, es hae ziene liefsjpreuk oetsjprik.
Gebaore in ‘t zekehoes in Remunj en de eerste laevesjaore doorgebrach in Azerao in ‘t Nachtegaleriek, greujt Jimi veural ‘boete’ op. In 2015-2016 geit moder Danny, zelf opgegreujd in ‘t Donderbölriek, vlak bie de ECI, en vader Jos, zelf opgegreujd in ‘t Katerriek in Neel en Aad Ajudant van Prins Marc II (2019), in ‘t Hammerveld wone en waert Jimi ‘ne echte sjtadsjóng. Óngertösse woont Danny mit häöre vrundj Niek en zien kienjer Lucas en Louis in Vlórp en woont Jos same mit Charlotte in ‘t Hammerveld. ‘ne Gezellige boel!

Pap en mam wirke in de sjtad. Danny haet ‘n damesmodezaak in de Neersjtraot, Jos wirk in ‘t vasgood. De Sjteine Brök waert Jimi’s basissjool en Azerao blief in zien hert wo Jimi inkele daag door de waek bie kienjerdaagverblief ‘de Beestenboel’ waert óngergebrach, net wie zien zösterke Valerie. Jimi is de grote broor van zösterke Valerie (9 jaor). Jimi zit in groep 8, Valerie in groep 6 van De Sjteine Brök en ‘t dans bie de Kienjergarde. Broor en zös zeen good aan ein gewaag en viere vanaaf jónge laeftied al gaer Vastelaovend!

Jimi is veural gek op voetbal en mit vrundjes aafsjpraeke en drop oettrèkke of eigelik ‘sjoje’, en dan netuurlik ‘t leefs mit zien adjudante Tijl en Sam, ouch groep 8-gangers van De Sjteine Brök. Jimi is ouch aanveurder van de JO12-3 van SHH wovan vader Jos ouch trainer is.

Tijl, ‘ne ‘Uulejóng’ en zelf ‘n verdedigend talent bij SHH JO12-1, is de zoon van Frits en Kim Criens- Allers, gein ónbekinde binne D’n Uul. Frits sjrief ónger angere veur de Uulewapper. De tweelingzös van Tijl, Tirza, dans ouch net wie Valerie bie de Kienjergarde.

Sam, zelf ’ne gedreve handjballer en skiejer, is de zoon van de horecaóngernaemers Michel en Ankie Schlicher-Janssens en kleinzoon van Aad Prins Thei IV (1998).

‘t Trio is altied in veur ‘n feesje en is blie det ze de Vastelaovend op ‘n normale meneer kinne viere. Ze kieke d’r nao oet. Veur jónk en aad, haaj dien handj op dien glaas, de kónfettie boys gaeve gaas!

Prinse wins Jimi I