Joep III

2022
JoepIIIe, ‘t is weer Vastelaovend!!!

Sjtadsjeugprins, Jeugprins van D’n Uul Joep III Opheij van 2022

 

Wie ich waerde gebaore op 10 oktober 2009 waar biej ós in hoes mien vader Jeroen as adjudant van de Sjtadsprins 2010 al drök bezig mit de veurbereijinge van de Vastelaovend. Alles dreijde mien eerste maonje óm  de Vastelaovend. In de wipper zoot ich tösse de hoes-ordes van Allaar I, de vader van miene  adjudant Arthur. ‘t Ganse sezoen ging ich in de kienjerwage euveral mit haer. Mien moder Claudia parkeerde mich geweun ónger de kapsjtok. Arthur en Celeste zote toen nog in de boek bie häör moder.

Daonao höb ich eder jaor vastelaovend gevierd. Eers verkleid as kloon, daonao as prins. Same mit Arthur höb ich jaore geoefend veur dit jaor. Veer hadde toen ouch al oos  eige hoesordes. Eder jaor viere veer mit de ganse femilie en oos vrunj van sjmorges toet saoves vastelaovend. Lekker sjpringe en feeste op ‘t plein en in de kroege mit ein täötje chips oppe gaam.

Mien zöster Sophie en Charlotte, de zöster van Arthur zitte al jaore bie de dansgarde. Eers bie de Kienjergarde en noe bie de Jeuggarde. In ‘t veursezoen moogde veer daoróm döks mit D’n Uul mit. Gelökkig  vonj Dirk ‘t ei good idee óm ouch get veur de  jónges te organisere. De Uulejonges waerde opgerich en daodoor kóste Arthur en ich altied mit d’n Uul mit.

De kienjermusical, op de zóndaag veur de vastelaovend, is ein van de hoogtepunte van ‘t jaor. Celeste en ich höbbe de lèste jaore es arties mitgedaon. Same mit de anger artieste höbbe veer heel väöl lol en plezeer gehad. Veur Celeste waar ‘t dit jaor heel meujelik óm te sjwiege euver Vastelaovend want de artieste van de kienjermusical sjnapde neet det ‘t neet mit deej. Zien zöster Alexe sjpeelt waal weer mit.

Vastelaovend is veur ós ech ‘t  fees van ‘t jaor. Bie ‘t  waord Vastelaovend sjteit de ganse femilie medein  oppe kop. Veer doon euveral aan mit en höbbe al ervaring mit: de Jeugprins en de dansgarde bie de Sjnapsnaaze, de dansgardes bie D’n Uul. Optochwage boewe veur de Jeugprins. De Masterbaere, geer wit waal, die mit die blauw mötskes. ‘t Aas, De Aad Prinse van D’n Uul en van de Vlavrètters in Welte-Bensroa. De kienjermiddaag en de kienjermusical, de Sjolefestasie en de Sjtasiefestasie. Jubileumfeeste van D’n Uul, en heel vreuger zelfs de
Sjmookers en de Sirk. De vastelaovend is pas kómpleet es veer ederein van de femielie trök in Remunj höbbe.

Vastelaovend is ‘t sjoonste fees van ‘t jaor maar veer doon ouch nog anger dinger dan feeste en sjpringe.  Arthur en ich zitte op voetbal bie SHH in JO13-4. Celeste hockeyt in de D1 bie Concordia en is heel good op ‘t skateboard.

Veer zitte alle drie in groep 8 op Aan de Roer. Celeste en ich bie juf Petra en Meister Marc en Arthur bie Juf Danielle. Veer zeen blie det die  ouch van vastelaovend haje want veer zeen op maondaagmorge neet altied gans fit. Veer doon altied gaer mit de optoch van sjool mit, haopelik pas det in oos  pregram. Veer zeen ‘n bóntj gezelsjap. Ich bön toes de jóngste en höb 3 puberzösters, Sophie, Nika en Nanou. Mit mama Claudia en Tom woon ich in de Veursjtad. En mit pap Jeroen op de Aaj Boelevard.

Arthur haet veer zösters, Charlotte, Lara, Floor en Julia en eine broor Senna. Hae woont mit moder Suzanne en Remco in de sjtad en mit zien vader Allard en Chantal in Herte. Celeste haet ein zöster Alexe en woont same mit zien elders Patrick en Charlotte ouch in Remunj. Veer viere allemaol same vastelaovend en treffe ós eder jaor oppe sjtasie.

Nao maonje van veurbereijing (en det ware der heel get) kin ich neet wachte óm eindelik mit uch  vastelaovend te viere. Same mit Arthur en Celeste make veer ein groot fees. Ich haop uch allemaol taege te kómme  en uch mien hoesorde te moge  ómhange, die óntworpe is door Patrick en gemaak is door Chantal. Scan oos code en volg al oos kapriole.