Prins Damiaan I

2013

Ich kiek nog eine keer of nemes mich haet gezeen… Sjtiekem loup ich nao ’t hoes. Veurdet ich achteróm nao binne gaon, kiek ich of ech nemes door de rame kiek…. ‘t Mót netuurlik allemaol geheim blieve. Nemes moog nog weite waem de nuuje Sjtadsjeugprins van D’n Uul waert….  Soms veuls se dich ‘ne geheimagent dae sjtiekem miense in de gate mót haje, mer det is ‘n gans anger verhaol. Geer wilt netuurlik weite waem dae nuuje noe is. Ich zal ‘t uch dan mer flot vertèlle…

Damiaan I Bertrams Sjtadsjeugprins van D’n Uul 2013
Det is de naam van oze nuuje Sjtadsjeugprins dae same mit zien twee adjudante en gooj vrunj Jort Drenthen en Jules Breuer de Vastelaovesvereniging D’n Uul en netuurlik de Remunjse jeug veur moog gaon!  In ‘t jaor mit es motto ’t Geit veuroet, zal oze Jeugprins dao zeker aan biejdrage. En neet ‘n bietje… Nae, hae geit d’r in vlege! Sjtadsjeugprins Damiaan I, baeter bekind es Damiaan Bertrams, is ‘ne sjportieve Remunjse jóng van 10 jaor. Gebaore in Remunj aan de kantj van de Roer op vastelaovesdinsdaag 2002. En dit jaor op vastelaovesdinsdaag waert hae elf jaor!  Damiaan is de zoon van Koen Bertrams en Raissa Pietersen en hae haet nog ein ajer zöster, Philine. De femiliej Bertrams woont in ‘t hoes wó Damiaan gebaore waerde. Achter de Kepel, aan de Roer, sjuuns taege euver aad Jeugprins Jesse I.  Pap Koen Bertrams waas vreuger ‘ne echte zeeman, mer noe is hae leraar netuurkunde en wiskunde in Blerick. Mam Raissa is ‘n ech Amsterdams maedje det wirk biej Philips in Eindhoven. Geer kint Raissa mesjiens waal van de Kienjermiddaag. Philine, de grote zus van Damiaan is 13 jaor geleje gebaokre in Remunj. En dan höbbe ze ouch nog 2 kippe, 2 knien en get vèskes in de Roer diej achter ‘t hoes sjtruimp.

Damiaan zit same mit zien twee adjudante op Aan de Roer in groep 7a biej Juf Marianne Schoolmeesters; det is nog ins ‘ne toepasselikke naam veur ‘n juf!  Hae haet heel get hobbies: hockey biej Concordia in de D1, tennis biej NIP, zeile biej Maas en Roer en piano sjpele (Damiaan krieg les van de pap van aad Adjudant Justus Jansen). Es se zo väöl hobbies höbs, is d’r neet väöl tied euver veur anger dinger. Mer zo aaf en toe kiek hae nao de tillevisie: ‘t Klokhuis, ‘t Jeugjournaal en Spangas zeen zien favoriete programma’s.  Oppe kompjoeter sjpeelt hae gaer Mindcraft en ziene favoriete meziek is noe van Alicia Keys en Robbie Williams. Zien zöster vertèlt det hae diej nummers altied mit zink.  Pap zorg toes meistal veur ’t aete. Damiaan hoof neet perse friet of pizza. Nae, geweune Hollandse kós vindj hae ’t lekkerste; dao kins se ‘m veur wakker make. En zegk noe zelf, es se zo drök bös mit sjporte kins se alle energie gebroeke toch?  Oppe vraog of hae missjiens de nuuje boewmeister van Remunj geit waere zaet Damiaan netuurlik nae, kiek maar ins good nao ziene sjpreuk. ‘t Liek ‘m waal gaaf óm piloot te waere en in ‘ne sjtraoljaeger te vlege. Det is netuurlik ouch versjrikkelik gaaf! Hae haet zelf al 2 keer gevlaoge. Eine keer wiej hae nog heel jónk waas en ‘n paar jaor geleje nao Venetië.

De adjudante van Damiaan zeen Jort Drenthen en Jules Breuer. Ze zitte same op sjool en biejein in de klas. Jort is de zoon van Rolf en Marloes Drenthen. Hae voetbalt biej SHH in de E8. Jules is de zoon van Hans en Marie-Anne Breuer. Zien hobbies zeen piano sjpele en tennis biej NIP.  Damiaan vindj ’t te gek óm same mit zien vrunj dit jaor de Remunjse jeug veur te gaon. “Jules en Jort maake mich kompleet. Same gaon veer d’r veur!”  De sjpreuk höbbe ze same verzónne en de proklamasiej höbbe ze same opgesjtèld. Ze gaon d’r dit jaor invlege, det kins se waal zeen. Ouch de hoesorde is gans in sjtiel.  ‘t Jaormotto van D’n Uul is dit jaor “t Geit veuroet”. Damiaan I zal dit jaor mit veuroet gaon ónger de liefsjpreuk: