Prins Enzo I

2018
VEUL ‘T RITME, PAK DE BEAT. ‘T IS WEER VASTELAOVESTIED.

VEUL ’T RITME, PAK DE BEAT. ’T IS WEER VASTELAOVESTIED.

Dit is de liefsjpreuk van oze nuje Sjtadsjeugprins Enzo I Tinnemans.
Hae geit dit sezoen same mit zien adjudante Sjors Triepels en Stijn Peters de Remunjse jeug en de ganse Sjtadsvastelaovesvereniging D’n Uul veur es Jeugprins “Enzo de eerste”. ’t Zeen echte vrunj en wille daoróm ouch same de Vastelaovend viere.

Enzo I is in ‘t krankehoes van Remunj gebaore op 10 augustus 2006. Es zoon van Mark en Peusie Tinnemans. De prinselike femilie woont aan de Hambaek. Pap is in ’t dageliks laeve leraar op Lyceum Schöndeln. En mam is directeur van De Steenen Brug.

Enzo I zit op de Montessori sjool in groep 8 bie meister Ron. Dit is ein combi klas mit groep 7. En dao zit Stijn ouch in. Sjors zit in groep 8 op Aan de Roer.
Ze zeen alle drie gek op meziek make. Enzo I sjleit t’r gaer duchtig op los op zien drumsjtel, det toes aan de Hambaek in de woonkamer sjteit. Stijn is ouch gek op drumme. Terwiel Sjors zien muzikale talente leut heur oppe piano en de pénspiano.
Enzo I duit wiejer ouch nog aan turne en aikido. Det is ein vechsjport. Mit turne duit hae ouch mit aan wèdsjtriede. En es t’r van al die insjpanninge hónger haet gekrege it t’r ’t leefste pasta.

Bie Enzo I toes höbbe se ouch ein femiliehobbie: namelik “HOMELAND”. Det is ein sjpannend sjpel wo in de sjried taege ’t terrorisme ein hoofrol sjpeelt. Mér ze höbbe ouch nog heel väöl anger sjpelkes óm oet te keze.

Enzo I is noe 11 jaor aad en viert al 12 jaor Vastelaovend. Hae haet ’t mit de paplaepel ingegaeve gekrege. Al es kleine jóng ging d’r verkleid es prins mit pap en mam op sjtap. Netuurlik is t’r ouch väöl bie de Sjnapsnaze in ’t Witte Kirkske gewaes, wo d’r ’t altied super nao ziene zin had.
Ouch de Vastelaoveskirmes vindj hae gaaf óm nao toe te gaon. De Booster en de Breakdance vindj hae de gaafste attraksies.

’t Waert mit dees drie muziekale vrunj zeker eine knallende Vastelaovend. Häöre sjpreuk haet dan ouch alles mit meziek te make.

VEUL ’T RITME, PAK DE BEAT. ’T IS WEER VASTELAOVESTIED.

Mit deze sjpreuk geit ENZO de eerste mit zien adjudante Sjors Triepels en Stijn Peters de vastelaovend in.