Prins Goof I
GOOF I VILTERS Jeugprins van D’n Uul 2011
“Alaaf, laot ós mer sjuve mit dees daag!”
Det is de liefsjpreuk van oze nuuje Sjtadsjeugprins Goof I Vilters, dae dit sezoen, same mit zien twee adjudante Luc Bothmer en Jimmy Slats, de Remunjse jeug en Sjtadsvastelaovesvereniging D’n Uul moog veurgaon es Goof d’n eerste. Mit z’n drieje höbbe ze allemaol ein uigske oppe vastelaovend en wille ze same heel väöl plezeer belaeve dit kómmende vastelaovessezoen, waat ouch nog ins lekker lank is, want Goof I zien Prinssjap doert toet begin meert.
Goof Vilters waerde gebaore op 20 jannewarie 1999 in Vinlo, ’t Jocusriek, en hae waerde getaoge op ’t Munsterplein in Remunj. Hae is de zoon van Aad Sjtadsprins Danny & Janine Vilters en Goof is ’t breurke van Beau(13), Loek(9) en Toss(8) ’t Prinselik gezin woont noew prinsherelik op de Roodakker aan ’t voetbalveldj van SHH in Herte. Goof ziene pap Danny is, wiej gezag, Sjtadsprins van D’n Uul gewaes in 2009, in det zellefde jaor is Goof Jeugprins van SHH in Herte gewaes, vanaaf det moment haet Goof Jeugprins van D’n Uul wille waere en haet d’r al kinne oefene veur ’t echte wirk. Noew dus is ’t dan zowied, Goof I is Sjtadsjeugprins van D’n Uul in ’t jaor 2011.
Oze Jeugprins geit, net wiej anger kienjer, ouch nao sjool. Goof zit in groep 8 van de Sjteine Brök biej meister Han, aevel zien echte hobbie is voetballe biej SHH in Herte in de D2, mer ouch haet d’r inkele jaore biej VVV-Vinlo voetbal gesjpeeld, jaomer genóg is d’r dao aafgevalle. Achteraaf is Goof waal bliej, want angers had d’r waarsjienlik gein Jeugprins van D’n Uul kinne waere. Goof haet ein sezoenskaart van VVV-Vinlo en hae geit same mit ziene pap waal ins kieke nao ein voetbalmetsj van VVV.
Ein anger hobbie van Goof is kómpjoetere, en dan mit name “Habbo”, zien favoriete aete is kaokwórs en de tosties van de grootmoder van adjudant Luc Bothmer. Hae hilt veral van de meziek op radio 3 en wiejer kiek d’r op tillevisie gaer nao “Benidorm Bastards” en “Jackass”.
De liefsjpreuk van oze Jeugprins is “Alaaf, laot ós mer sjuve mit dees daag!”, dit is ein kómbinasiej van voetbal en vastelaovend, zien hoesorde is dan ouch ein sjuufpuzzel en det haet netuurelik alles te make mit sjuve. Goof haet d’r óngluiflik väöl zin in en hae sjpits zich veral op ’t oetrope, de kirmes äöpene op zaoterdaag, sjlók haole veur d’n optoch, d’n optoch zellef op vastelaovesmaondaag en óm de resepsie te bezeuke van Jeugprins Marlon I van de Haofgengers, want ziene vrundj Daan Wolfhagen is dao adjudant. Goof haet ein baere kóndisiej en det mós-se waal höbbe in zón lank sezoen en mit zón drök pergram. Toch kint Goof d’n eerste dit neet allein, hae waert biejgesjtaon door twee gooj vrunj van hem. Dees twee adjudante gaon ich noew ein veur ein aan uch veursjtèlle.
De eerste adjudant hit dus Luc Bothmer en waerde gebaore op 02 december 1998 in Remunj. Zien elders heite Ger & Inge Bothmer en Luc haet ein zöster, Anne(14). De grootvader en grootmoder van Luc, Henk & Bep Bothmer, zeen gein ónbekinde biej D’n Uul, ziej höbbe vreuger jaorelank kefee “Nationaal”, oftewaal ’t Uulenès, gehad. Ouch Luc zit in groep 8 van de Sjteine Brök biej meister Han. Luc duit, net wiej Jeugprins Goof, voetballe biej SHH in Herte in de D2 (sins kórt), anger hobbies zeen kómpjoetere en fietse. Hae haet mitgedaon aan “Ride for the roses”, det is fietse veur ‘t gooj doel, en haet daomit heel väöl geldj opgehaold, maar leefs 1567 euro! Hae lös kluntjesmik en tortellini’s heel gaer, zien favoriete meziek is dae van “AC/DC”. Luc haet d’r ech zin in óm adjudant te moge zeen biej Goof I en hae sjpits zich eigelik op alles, mer vernamelik op ’t oetrope en d’n optoch. Belangriek is netuurelik det ze mit z’n drieje väöl plezeer höbbe same. Kórt veur ein voetbalmetsj van de D2 van SHH haet Goof Luc gevraog of hae adjudant wól waere, dao haet d’r neet lang euver hove naodinke.
De tweede adjudant hit Jimmy Slats en waerde gebaore op 23 september 1998 in Remunj. Zien elders heite Tonny & Conny Slats en Jimmy haet ouch nog ein zöster, Julie(14), ziej wone zón bietje ónger de tillevisietore in Remunj. Jimmy zit, net wiej Goof en Luc, ouch in groep 8 van de Sjteine Brök biej meister Han. Jimmy zien hobbies zeen breakdance en hip-hop danse, mer ouch voetballe, basketballe en kómpjoetere. Hae hilt van de meziek op radio 3 en zien favoriete aete is petatfriet. Jimmy is d’r greujts op det d’r adjudant is van Goof en vinjt ’t eine ganse eer, hae haet d’r dan ouch óngluiflik väöl zin in. Hao sjpits zich op ’t oetrope en d’n grote optoch, mer ouch op de anger bezeuke en ivvenemente. Mit z’n drieje höbbe ze d’r bezónjer väöl zin in, de take van de adjudante zeen al bienao verdeilt, dus laot ze mer sjuve en laot de vastelaovend mer kómme. Ich bön d’r dan ouch van euvertuug det dees jónges ’t gans gaon make mit z’n drieje. Ich wins Sjtadsjeugprins Goof d’n eerste van D’n Uul en zien adjudante Jimmy en Luc bezónjer väöl plezeer en ein sjitterend vastelaovessezoen toe!
Det alles ónger ziene liefsjpreuk :
“Alaaf, laot ós mer sjuve mit dees daag!”.
Erik Snoek,
Kemissie Jeugprins D’n Uul