Prins Guus I

Guus I eine sjportieve jeugprins

Det belaof get mit eine sjportieve jeugprins dae heel flot is oppe lange aafsjtandj. Moog ich uch veursjtèlle aan Guus Jenniskens . Hae zal de Remunjse jeug veurgaon in ‘t jaor wo in ‘t “Verbiej vluug”. Want en det vintj hae zellf eigelik waal jaomer, hae geit uch veur in ein heel kórt sezoen. Aevel hae is van plan d’r vol taege aan te gaon. Guus kump oet ein ech Uulenès. Gebaore in ‘t krankehoes van Remunj op 2 augustus 1993, woont hae in ‘t riek van de Nachtegale in Azeraoj. Zien vader Jack waas adjudant biej Prins RensI. En vader Jack is lid van ‘t dageliks besjtuur van Sjtadsvasteloavesvereiniging D’n Uul. Mooder Nicole is nog ver femilie van Huub Hammer
(erelidvan D’n Uul). Guus haet ouch nog ein zösterke Jet en woont in ein aaj sjool in Asenray.

Guus haet de vastelaovend mit de paplaepel ingegaeve gekrege. Getuge ouch zien deilname aan de optoch mit es motto: “Det is ós mit de paplaepel ingegaeve”. In de Remunjse optoch haet hae gesjitterd es einzelgänger mit “Ich kin der neet op komme”

 

Naeve sjtapelgek van de vastelaovend mót eine jeugprins ouch nao sjool en zo ouch ozze jeugprins. Guus zit in groep 8 van basessjool de Sjakel in Neel. Volgend jaor haop hae nao de brögkklas te gaon, daoveur mót hae in zien prinssjap ein Sitoo toets doon en det geit ‘m zeker lökke want deze jeugprins dreijt dao zien handj neet veur óm. Naeve atletiek is zien grótste hobbie de waterscouting aan de Rooj Brök.

 

Guus geit ‘t sjpeel neet alleein sjpele. Hiejveur haet hae twee adjudante oetgezóch. Zien eerste adjudant is Tim Spierings, eine vrundj wo hae same mit op sjool haet gezaete en dae ouch wildj is van vastelaovend. Guus wis drek det hae Tim wól vraoge en Tim zag drek jao. Tim is eine Remunse jóng, dae in Neel woont, gebaore op 22 september 1993. Tim sjpeelt saksefoon, hae riet gaer op ein paerd en hae wirk gaer op ein boerderiej van vrunj van zien elders. Es tweede adjudant koos Guus ziene vrundj Bram Vernaus. Zie kinne zich al van babie aaf aan want de moders zeen vrunjdinne!
Mit Bram deilt Guus zien grótste hobbie: de waterscouting! Daonaeve kin ich uch euver Bram nog ‘t volgende vertèlle. Bram is pas op kaokles gewaes en kin versjrikkelik good sjoeklaatmoes klaor make. ‘t Liek Guus en Tim neet verkeerd óm det es toetje te moge aete. Es hoofgerech vinje ze alle drie pannekeuk of Pizza ‘t allerlekkerste.
Bram duit ouch heel gaer tennese biej TCM en Dennemarken en hae sjpeelt piejano. Dus Guus tröf ‘t mit zón adjudante die ‘m zólle bewake es echte boddie-gards mer die ouch mit hem d’r veur zorge det d’r van tied toet tied effe ein meziekske door häör gesjpeeld waert. Want Guus zal net zo es twee van zien veurgengers ( Jules I en Jules II) ós veurgaon mit ein leedje. Ein sjwingend nummer gesjreve door zien moder op de meziek van “Queen” : “We are the champions”. Det belaof get en ich dink det deze Jeugprins ós weer good leut weite waat vastelaovend is. Hae verklap mich det hae erreg bliej zal zeen es zien geheim eindelik nao boete kump, want hae wilt ‘t waal oetsjreve euver gans Remunj: Ich bön dit jaor de nuje Jeugprins van Sjtadsvastelaovesvereiniging D’n Uul en ich bön dao greujts op!!
Es lètste wil ich de maedjes nog verklappe det ich geheurd höb det de Jeugprins en zien adjuus al op emes zeen. Aevel dink mer zo:

Cool, Vet Waem duit ós get!

Desiree Geraedts-Janssen