Prins Jules I
JULES I REGEERT MUZIEKAAL EUVER UULERIEK
Sjoone meziek maak vastelaovend riek!
Vanaaf zaoterdaagmiddaag 5 jannewarie 2002 haet D’n Uul weer eine nuuje Jeugprins, dae waerde oetgerope in de Appelesienerie onger de Mid-daag van de nuuje Jeugprins. Dit jaor moog Jules I Geraedts D’n Uul en de Remunjse jeug veurgaon es Sjtadsjeugprins van D’n Uul. En hae is nogal get van plan, want hae haet zellefs ein eige leedje womit d’r ederein zal gaon verrasse, mer daoeuver sjtrakkes meer!
In ‘t dageliks laeve sjteit Jules I baeter bekind es Jules Geraedts en hae waerde gebaore op 21 meert 1991 in Remunj, hae is de zoon van Rob en Desiree Geraedts en insigst kiendj toes.
Nao sjool gaon mot ederein, dus ouch ein Jeugprins van D’n Uul. Jules geit nao Aan de Roer, wo hae in Groep 7 zit bie meister Ger en juffrouw Henriette. Netuurlik duit d’r ‘t leefs get angers, want neet allein duit d’r tennisse bie Ace, ouch nog hokkieje bie Concordia. Ziene favoriete meziek is van “Def Rhymz”. En zien favoriete aete is hoon, hoon en nog ins hoon.
Jules I haet d’r ouch al jaore van gedruimp en op gehaop om Jeugprins van D’n Uul te moge waere, zodet hae noe eindelik ins in ‘t middelpuntj van de belangsjtelling moog sjtaon. In ‘t jaor det ‘t motto van D’n Uul ZES EN VIEF IS ELLEF is, want D’n Uul besjteit dit jaor 65 jaor, en D’n Uul ein nuuje Vors haet, Vors Hans (Smals), is ‘t dan zo wied en is dae druim veur Jules oetgekomme. Hae wilt d’r dus ein sjoon sjpeel van make, en leut geweun alles op zich afkomme.
Daoveur haet Jules I twee Adjudante oetgezoch diej hem onger zien Jeugprinssjap bie gaon sjtaon, zodet hae ouch nieks of nemes vergit mit beveurbeeld hoesordes.
De eerste Adjudant hit Tim Berrevoets en is gebaore op 31 meert 1991, zien hobbie besjteit oet turne.
De tweede Adjudant hit Bob Houben en is gebaore op 03 september 1990 en zien hobbie is handjballe.
De take zeen nog neet verdeild tösse Tim en Bob, mer ze weite waal al persies
waat ze motte doon en ze kriege ‘t ekstra drök want ze motte eine zingende Jeugprins biesjtaon!
Wiej ich al sjreef haet Jules I ein leedje mit eige teks, gebaseerd op “Everybody needs somebody” van “The Blues Brothers” en ich mot zegke, ‘t sjwink ech de pan oet. De liefsjpreuk van Jules I haet alles mit dit leedje te make :
Sjoone meziek maak vastelaovend riek.
Erik Snoek.