Prins Kai I

Jeugprins D’n Uul 2007 KAI d’n Eerste

Dit jaor waert Sjtadsvastelaovesvereniging D’n Uul en de Remunjse jeug veurgegaon door oze nuuje Jeugprins Kai I, biejgesjtaon door zien Adjudant Daan.

Kai I hit in ‘t dageliks laeve Kai Huijskens en waerde gebaore op 11 december 1995 in Remunj, noe woont Kai same mit zien grote broor Troy (16) en zien elders Carl en Iny Huijskens aan de Roerderwaeg in Remunj. In Herte geit oze Jeugprins Kai nao de St. Hubertus-sjool, wo hae in groep 7b zit biej meister Johan. Nao sjool gaon mót noe einmaol, mèr hae duit lever get angers, wiej voetballe biej SHH (D4) in Herte, vreuger haet d’r ouch nóg getennist biej Ace in Herte, dus Kai is bèst waal sjportief. In ’t midde van de nach kint geer Kai wakker make veur ein bekske petatfriet en zien hobbies besjtaon oet kompjoetere en tilleviesie kieke (mit name voetballe kieke), mèr meziek loestere (Hitzone) en veur deejee sjpele duit hae ouch erg gaer. Es det nóg neet genóg is haet Kai ein hamster dae loestert nao de naam Speedy, dus wiej geer kint laeze vervaelt Kai zich gein menuut van de daag!

 

Wiej Kai I gevraog waerde óm Jeugprins van D’n Uul te waere waar hae erg verras, want hae had d’r noojt aan gedach, laot sjtaon gehaop, óm Jeugprins van D’n Uul te waere. Naodet hae gevraog waerde zag hae dan ouch derek jao en hae vinjt ’t erg sjoon óm Jeugprins te moge zeen biej D’n Uul. Veur Kai is ’t waal allemaol nóg nuuj es Jeugprins van D’n Uul en biej D’n Uul, dus hae leut zich maar verrasse en alles op zich aafkómme.Dit duit d’r same mit ein Adjudant, te weite Daan Boesten.

Daan waerde gebaore op 15 augustus 1995 in Remunj en hae woont noe ouch nóg in Remunj. Daan geit nao ein anger sjool dan Kai, want Daan geit nao de Sjteine Brök in Remunj, wo hae in groep 7 zit biej meister Han. Daan duit ouch voetballe biej SHH (D3) in Herte, vreuger haet d’r ouch nóg op turne gezaete, dus ouch Daan is bèst waal sjportief en petatfriet is Daan’s favoriete aete. Zien hobbies besjtaon oet kompjoetere en tilleviesie kieke, meziek (Hitzone en Trance) loestere en Daan haet ein hóndj dae loestert nao de naam Jake. Daan Boesten is de zoon van Huub Boesten en Paula Houben. Huub Boesten is Algemein Besjtuurslid van D’n Uul en erg muuziekaal mit Big Band Boesten en ’t Huub Boesten Combo. Daan haet nóg twee aajer zösters, Renske (13) en Maud (22). Zowaal Kai I es Daan sjpitse zich ’t meiste op de Grote Optoch door de binnesjtad van Remunj, wo ziej lekker mit väöl sjlók kinne sjmiete, jao jao… Kai I en Daan haope det mit dees daag alle Uulkes zich laote heure en det ouch de kleinste Uulkes alles kinne heure, dit alles ónger häöre liefsjpreuk :

ÖPKE DÖPKE OP MIEN KÖPKE … !

Neet allein zólt geer deze liefsjpreuk döks gaon heure, mèr ouch ’t leedje “Öpke döpke op mien köpke…!”, waat Kai I en Daan zoväöl meugelik ten geheure gaon bringe, waert óngetwiefeld ein knaller, ’t leedje is op de wies van “Queen – We will rock you”. Laot uch mèr verrasse, ich bön d’r van euvertuug det veer mit Sjtadsjeugprins Kai I Huijskens en zien Adjudant Daan Boesten ein good en sjpetterend duo en Jeugprinselik gezelsjap höbbe waat ’t gans geit make in en boete Remunj! Ich wins Kai I en Daan väöl plezeer, ein sjoon vastelaovessezoen en netuurelik eine sjoone vastelaovend toe.

Erik Snoek
Kemissie Jeug D’n Uul