Prins Mik I
Sjtadsjeugprins Mik I
en zien adjudante Isis & Gabriel
“Same kleure veer de Vastelaovend!“
Dit jaor haet Sjtadsjeugprins Mik I ‘ne echte primäör. Wo de aafgeloupe jaore de kemissie zelf op zeuk mós gaon nao de nuje Sjtadsjeugprins, waar ’t deze keer meugelik óm zelf aan te gaeve det se heel gaer de nuje Sjtadsjeugprins wóls waere. Wie veer in ‘t ingesjikde filmke zoge det Mik oet ’t juuste Uulehout waar gesjneje, waar de keus mekkelik en flot gemaak!
Vanzelfsjpraekend geit Sjtadsjeugprins Mik I ‘t dit jaor neet allein doon en waert ’r óngersjteund door zien twee adjudante, Isis en Gabriel. Dit Jeugprinselik Gezelsjap is erg kreatief en det is te zeen in häör gezamelike passie veur teikene. Same ein hobby mer toch versjillend; zo teikent Sjtadsjeugprins Mik I ’t leefs anime, adjudant Isis geit veur sjieke dames mit biebeheurende outfits en adjudant Gabriel teikent gaer katers.
De moders van Mik en Isis zeen tweelingzösters dus ze kinne zich al vanaaf de eerste daag det ze zeen gebaore. ‘t Gezelsjap geraakde kómpleet op de kaksjool. Dao kwame ze biejein in de klas en waar ’t vanaaf de eerste daag dieke… Mik! Zo wie ze zelf zègke, höbbe ze al väöl joeks mit ein oetgehaold en mótte veer veural oplètte es Sjtadsjeugprins Mik I en adjudant Gabriel samezeen. De druim óm same de jeug van D’n Uul en Remunj veur te gaon begós te laeve in ’t jaor det Dean I (2024) waerde oetgerope.
Dit prinselik drietal waert natuurlik gesjteund door femilies mit de neudige ervaring bie
D’n Uul en es echte leefhöbbers van Vastelaovend. De elders van Sjtadsjeugprins Mik I zeen Joske Zijlstra en Thijs Eerens. Twee echte vastelaovesvierders die ’t virus op ’n gooj meneer höbbe euvergedrage aan allebeij de kienjer. Want Mik haet ouch nog ‘n zösterke Robin. Dit waert ouch veur häör ‘n sjpesjaal jaor want ‘t geit veur ’t eers mit danse mit de Kienjergarde.
Adjudant Isis kós neet baeter zeen oetgekaoze. Moder Saartje Zijlstra haet al twee keer mitgemaak wie ’t is óm ‘ne adjudant in ’t gezin te höbbe. Vader Maarten Wagemans waar adjudant bie Sjtadsprins Marnix I (2017) en broor Mees waar adjudant bie Sjtadsjeugprins Dean I (2024). Doris maak ’t gezin kómpleet en geit, net wie nichske Robin, dit jaor veur ’t eers mitdanse mit de Kienjergarde.
De elders van adjudant Gabriel zeen Shanna en Bojan. Zie wone, same mit zien jónger breurke Rafael, doonbie ’t Witte Kirkske in de veursjtad. Häör hoes zal mit de vastelaovend good te herkinne zeen! Ze viere altied same de vastelaovend en dit jaor is ’t nog sjpesjaler óm dit vanoet ‘n anger ról te gaon doon.
Teikene löp wie ‘ne roje draod door ’t sezoen van Sjtadsjeugprins Mik I, aevel is t’r nog get sjpesjaals waat trökkump en ouch te zeen is op de hoesorde. Det is ‘ne vlinder dae symbool sjteit veur Sam. Sam is ’t tweelingzösterke van Mik en is 13 daag nao de gebaorte gesjtorve. Door de vlinder trök te laote komme in de hoesorde krieg Sam toch alles mit van dit sjpesjale aventuur en ’n sjoon plaetske in ’t verhaol.
Nog ein lèste anekdote óm mit aaf te sjloete. Zo wie eder besjreve hiebaove zeen de leje van ‘t Jeugprinselik Gezelsjap 2026 beheksde teikeneers en gek op kleure. Daoróm is ‘r veur ’t thema ‘cartoon’ gekaoze en gaeve ze same mit ederein; femilie, vrunj en Sjtadsvastelaovesverening D’n Uul op eige wies kleur aan Vastelaovend!
