Prins Pepijn I
Det zeen de väölbelaovende wäörd en tegeliekertied liefsjpreuk van oze nuuje Jeugprins van D’n Uul sezoen 2000/2001, te wete Pepijn I Pollaert oet Herte. Pepijn Gerard Mattheus Pollaert waerde gebaore op 27 meert 1989 in Remunj en hae is de zoon van twee neet gans onbekinde Uule, te wete Mat Pollaert enAnnette Engelen.
Mat Pollaert is netuurelik ein van de vaste muuziekante bie de Prinsekepel van D’n Uul en Mat is Grootmeister van D’n Uul en haet de Orde van Verdeenste van de S.L.V. Annette Engelen kint me van de Damesgarde van D’n Uul, de Kienjer-middaag van D’n Uul en noe begeleijing van de (Ex-)Jeuggarde van D’n Uul en Annette is dus neet veur nieks Ere-Dame van D’n Uul. Pepijn bezeuk de Sjteine Brök, wo hae in groep 8 bie de meisters Henk Schreurs en Paul Manod zit. Ich weit neet of d’r gaer nao sjool geit, waat ich waal weit is det d’r gaer boete sjpeelt en ‘t leefs zo döks meugelik. Wiejer zit hae nog op Scouting St.Hubertus en duit d’r gaer windjsurfe in de zomer. Ziene favoriete meziek is van “Limp Bizkit”, zien favoriete aete netuurlik petatfriet, witlof vinjt hae get minder lekker. Pepijn haet twee Adjudante oetgezoch diej hem onger zien Jeugprinssjap biej gaon sjtaon, te wete Jack Nizet en Rens Janssen, dit waas ouch gaaroet neet meujelik want ze kinne zich al van jongs aaf aan, vanaaf de peutersjpeelzaal, om persies te zeen. Jack Jacobus Elizabeth Nizet waerde gebaore op 19 december 1989 in Remunj en zit ouch op de Sjteine Brök, in groep 7. Zien hobbies zeen väöl boete sjpele, Scouting St. Hubertus, skate en skate-boarden, sjteppe en fietse op ziene BMX. “Limp Bizkit” vinjt hae ouch sjone meziek, same mit de “Red Hot Chili Pep-pers”.
Hae moog gein melkpro-dukte hobbe, waal väöl petatfriet, dao moge ze Jack sjnachs veur wakker make. Rens Arnoldus Carolina Janssen, zien angere Adjudant, waerde gebaore op 13 oktober 1987 in Herte en zit op B.C.Broekhin in de brökklas. ‘t Is neet te gluive, mer ouch hae duit gaer boete sjpele en Scouting St.Hubertus en väöl klommele aan van alles en nog get. Ouch hae vinjt “Limp Bizkit” ziene favoriete meziek. Italiaans aete vinjt Rens erg lekker, witlof en spruutjes minder. Geer heurt ‘t waal, baeter kint dit drietal neet biejein passe. Pepijn en Jack sjpele al jaore mit in de Kienjermiddaag van D’n Uul en Pepijn haet eine keer onger de Bontje Aovend Vors Naad gesjpeeld. Wiejer duit Pepijn I veur de twelfde keer mit aan de Grote Optoch, mer dit jaor dus op ziene Prinsewage. Pepijn I haet d’r eigelik al jaore op gehaop om eine keer Jeugprins van D’n Uul te waere, zegk mer al van jongs aaf aan en hae vinjt ‘t dan ouch kejtof det ‘t noe zo wied is. Hae is d’r greujts op om Jeugprins van D’n Uul te zeen, want det vinjt hae toch waal ein sjoon en gooi vereniging. Neet allein in ‘t Remunjse, mer ouch daoboete is D’n Uul bekind en ein gaer gezene gas, waat is sjoner om bie dees vereniging Jeugprins te moge zeen? Hae sjpits zich op zien oetrope es Jeugprinsvan D’n Uul, zien Jeugprinseresepsie op vastelaoveszaoterdaag, diej veur ‘t eerswaert gehaje, en de Grote Optoch in Remunj. Minder leuk vinjt hae ‘t aaftraeje, mer detvinjt gein eine Prins leuk! Pepijn I wilt mit de vastelaovend drie daag väöl plezeer höbbe en ‘t leuk make veur ederein, hae zuut dit alles es oetdaging, Pepijn wilt allein mer väöl lachende gezichter en maskes en geschmienkte luuj, want det heurt d’r ech bie mit dees vastel-aovesdaag. Daorom ouch ziene liefsjpreuk, dae aeve eigewies is es ‘t motto van D’n Uul van dit sezoen:
Kloon is sjoon, prins miene wins!
Erik Snoek