Prins Rik I
Rik I Hendrix
Sjtadsjeugpr ins van D’n Uul 2012
Det is de naam van oze nuuje Sjtadsjeugprins, dae dit sezoen same mit zien twee adjudante én bèste vrunj Dante Reijans en Mees Ypma de Remunjse jeug en Sjtadsvastelaovesvereniging D’n Uul moog veurgaon es Rik I. In ’t sezoen det “Hiej is ’t te doon!” ’t motto van D’n Uul is, zal oze Jeugprins perseunlik d’r ins veur gaon zorge det Remunj ein bón(d)tje sjtad geit waere. Ederein mót zich kleije in rood, gael of greun en bóntje pekskes en mötskes drage, en hae wil ouch gein zoer gezich meer zeen de kómmende vastelaovesdaag. Sjtadsjeugprins Rik I, in ’t dageliks laeve baeter bekind es Rik Hendrix, waerde gebaore op 03 meert 2001 in Remunj. Rik is de zoon van Arnold Hendrix en Elly Ververs en hae haet nog ein grotere broor, Stan(15). Ze höbbe twee hoesbeeste, hóndj Ties en goldvès Guppie. ’t Gezin woont noew prinsherelik in ein vernaam pandj aan de Frans Douvesjtraot, wo Rik ouch is opgegreujd.
Pap Arnold Hendrix is ein echte Remunjeneer en gein ónbekinde biej D’n Uul, hae is lid én
sikkertaris van de Raod van XI en ouch lid van de sjponsorkemissie van D’n Uul.
Wiejer haet Arnold ’n eige zaak in de binnesjtad van Remunj, ze verkoupe metse, gewaere etc.,
oftewaal greij veur de jach- en sjeetsjport.
Mam Elly Ververs waerde gebaore in ’t riek van De Vreigeliers oet Haele, maar nao ein paar jaor
is Elly in Remunj kómme wone.
Elly geit normaal gesjpraoke altied vastelaovend viere mit de kienjer in Remunj, det zal dit jaor waal aeve get angers gaon.
Broor Stan toet sjlot is in 2008 Jeugprins van de Rattekas gewaes, dus Rik haet toen al good
kinne kieke waat ein Jeugprins zoal mót doon mit de vastelaovesdaag.
Ouch de Jeugprins mót nao sjool, Rik bezeuk de Sjteine Brök en zit in groep 7 biej meister Guido
en juffrouw Nicole.
Rik haet nogal get hobbies, hokkieje biej Concordia in de D1, golfe biej Burggolf, voetballe, boete sjpele en wanjele mit hóndj Ties.
Hae sjpeelt ouch nog piano in ’t CK-tejater en duit d’r gaer “Mindcraft” op de kómpjoeter sjpele.
Zien favoriete aete is werm aete, heel gaer vernamelik de ries mit ragout van mam Elly ( resep kint
geer kriege biej Elly ).
Rik hilt veral van de meziek op 3FM, maar ouch van de ceedee “Blaosmeziek” van “Gé Reinders”
en de meziek van “André Hazes”, op de tillevisie kiek d’r gaer nao “Sponge Bob Square Pants”.
James Bond is ’t óngerwerp van de liefsjpreuk en de proklamasiej. De hoesorde van Rik I haet
netuurelik ouch alles mit James Bond te make, net wiej de Middaag van de nuuje Jeugprins.
De adjudante zeen ouch allebeij in sjmoking en Rik in rokkestuum, dus det zuut d’r obbentop
sjiek oet!
Rik haet d’r eigelik noojts ech euver naogedach en biej sjtil gesjtange óm Jeugprins te waere, de
verrassing waas dan ouch erg groot det ze ‘m kwame vraoge óm Jeugprins van D’n Uul te waere.
Nao efkes naogedach te höbbe haet d’r jao gezag, maar dan waal mit zien twee bèste vrunj naeve
zich es adjudante.
Rik haet d’r bezónjer väöl zin in, hae sjpits zich veral op ’t oetrope, d’n optoch op vastelaoves-
maondaag en netuurelik de Sjole- en Sjtasiefestasie.
Ich gaon noew Rik zien twee bèste vrunj, diej es adjudant gaon fungere, ein veur ein aan uch
veursjtèlle.
De eerste adjudant hit dus Dante Reijans en hae waerde gebaore op 15 juulie 2000 in Remunj.
Zien vader John Reijans haet same mit Aad-Uuleprins Kes I ( Roger Kessels ) in de Zaate Hermeniej Windjkrach 11 gezaete, dus Dante haet de vastelaovend waal van doonbiej mitgemaak en van hoes oet mitgekrege. Ouch Dante zit ingroep 7 van de Sjteine Brök biej meister Guido en juffrouw Nicole.
Hobbies van Dante zeen voetballe biej SHH in Herte in de D4, breakdance, boete sjpele en kómpjoetere. Zien favoriete aete is petatfriet en pizza en hae loestert gaer nao de meziek op 3FM. Op tillevisie kiek d’r nao “Nickelodeon”, “The Voice Of Holland” en “Expeditie Robinson”. Dante vinjt ’t sjoon det d’r adjudant waert biej Jeugprins Rik I en erg sjpannend. Hae haet dan ouch derek jao gezag toen Rik ‘m vroog of d’r adjudant wól waere. Dante sjpits zich vernamelik op d’n grote optoch en op de Sjolefestasie, belangriek hiejbiej is det ze mit z’n drieje väöl plezeer höbbe, zowaal es Jeugprinselik gezelsjap en es bèste vrunj.
De tweede adjudant hit Mees Ypma en waerde gebaore op 08 oktober 2000 in Leiden, mit 2 jaor is de femieliej in Remunj kómme wone. Zien elders heite Fokko en Stephie Ypma en Mees haet nog ein broor, Ole(14). Fokko Ypma sjpeelt biej de veterane van SHH in Herte ( Vets ), wo-in o.a. Aad-Uuleprinse Crit I (Lambriex), Paul II(Hamers), Danny I(Vilters) en Hans IV(Rademakers) sjpele. Vastelaovend viere kint Mees waal, hae geit altied nao de sjnapsnaze en nao de optoch kieke.
Mees zit ouch in groep 7 van de Sjteine Brök biej meister Guido en juffrouw Nicole. Mees zien hobbies besjtaon oet zeile, skieje, voetballe(neet meer biej SHH), teikene, gitaar sjpele in ’t CK- tejater, kómpjoetere en logere biej zien grootvader en grootmoder in Zjwame en dan lekker “Rummikub” sjpele. Op tillevisie kiek Mees veral nao “The Voice Of Holland” en “Sponge Bob Square Pants” en hae hilt van de meziek op 3FM, zien favoriete aete is pizza. Mees is d’r greujts op det d’r adjudant is van Rik en vinjt ’t ein ganse eer, maar netuurelik ouch sjpannend óm alles waat geit kómme dit vastelaovessezoen. Hae vinjt de sjmoking erg sjiek en “cool” en Mees sjpits zich ’t meiste op ’t oetrope en d’n optoch door Remunj.
Mit z’n drieje vórme ze dit vastelaovessezoen 2012 ’t Jeugprinselik gezelsjap van Sjtadsvastelaovesvereniging D’n Uul en zeen ’t ouch nog ins de bèste vrunj en höbbe ze d’r bezónjer väöl zin in, dus laot de vastelaovend mer kómme. Hiej is ’t te doon mit Sjtadsjeugprins Rik I ( Hendrix ) en adjudante Dante Reijans en Mees Ypma en ich wins ze dan ouch heel väöl plezeer en ein bezónjer sjoon vastelaovessezoen toe.
Det alles ónger ziene liefsjpreuk :