Prins Steef I

In dit erg korte vastelaovessezoen (de vastelaovesdaag zeen op 3, 4 en 5 fibberwarie 2008) haet de Jeugprinsekeuzekemissie (Jpkk) van D’n Uul gezóch nao eine uters sjportieve en euver ein baere kóndisiej besjikkende Jeugprins. Vanaaf ’t moment van oetrope op zóndaag 6 jannewarie toet aan ’t aaftraeje op vastelaovesdinsdaag 5 fibberwarie zeen mer ein paar waeke, dus mót de Jeugprins väöl resepsies bezeuke en biej ivvenemente perzent zeen. De Jpkk kwaam oet biej Steef Eijck, dae dit sezoen D’n Uul en de Remunjse jeug moog veurgaon es Sjtadsjeugprins Steef d’n eerste. Steef I haet twee gooj vrunj van hem es adjudante oetgezóch, te wete Sten van der Sluijs en Chico Spee, mer dao kóm ich later in dit artiekel op trök. Noe eers trök nao oze Jeugprins Steef I.

Steef Eijck woont in Remunj en waerde op 7 december 1995 ouch in Remunj gebaore, hae is de zoon van Rogier en Carian Eijck. Steef haet nog ein breurke, Pie, en ein zösterke, Iva, ‘nen tweeëijige twereling, diej 10 jaor aad zeen. De femieliej Eijck hilt van vastelaovend viere. Rogier en Carian bezeuke väöl vastelaovesivvenemente van D’n Uul en Carian organiseert ouch nog ’t fees in de Rattekas mit, wo Steef in 2005 Prins van is gewaes, dus haet Steef alvas kinne oefene! Iva danst biej de kienjergarde van D’n Uul en Pie waert dit sezoen regeleer biej Steef I, Sten en Chico.

Ouch eine Jeugprins mót nao sjool, Steef zit in groep 8 van de Sjteine Brök biej meister Henk Schreurs en juffrouw Karin Simons. Zien echte hobbies zeen voetballe, boete sjpele, hokkieje biej Concordia (nao alle waarsjienlikheid waert d’r ingedeild biej de C3) en windjsurfe biej Van Nierop. Wiejer hilt Steef van James Bond films en van de meziek op radio 3, hae lös gein sjpruutjes, aevel waal lasagne. Hae wilt gaer ein moes (veldjmuuske?) höbbe, mer zien elders vinje det veurluipig nog neet good.

Steef haet altied al gaer Jeugprins van D’n Uul wille waere, want es klein jungske leep d’r achter leje van de Raod van XI aan óm te vraoge of hae Jeugprins moogde waere, waat ‘m noe dan ouch is gelök. Steef verheug zich netuurelik ’t meiste op zien oetrope en ouch sjpits hae zich op d’n optoch door Remunj op vastelaovesmaondaag, waal kiek d’r noe al op taege zien aaftraeje op vastelaovesdinsdaag, mer zo wied is ’t gelökkig nog lang neet. Oze Jeugprins Steef I haet twee adjudante oetgezóch, diej ich noe efkes aan uch gaon veursjtèlle.

De eerste adjudant hit Sten van der Sluijs en waerde gebaore op 21 november 1995 en woont in Remunj. Sten zien elders heite Hans en Marié-José van der Sluijs, Sten haet nog ein zöster van 14, Laura, en ein grote broor van 17, Floris. Laura haet vreuger ouch biej de kienjergarde van D’n Uul gedans. ’t Vastelaovesgeveul haet Sten van zien elders mitgekrege, dus haet hae erg väöl zin in dit kómmende sezoen. Sten zit biej Steef in de klas, waal waar ’t veur hem ein grote verrassing det Steef ‘m vroog óm adjudant te waere. Sten zien hobbies zeen voetballe, gitaar sjpele, hokkieje biej Concordia in de C1 en wielrenne (in de zomer op de waeg en sjwintjers in ’t veldj). Sten haet ’t wielrenne veurluipig aafgezag óm zich gans op zien adjudantsjap te richte.
Verder hilt Sten ouch van James Bond films en Maffi a films en van de meziek op radio 3, sjpruutjes en bloomkool lös hae neet, pizza aevel waal.
Ouch Sten verheug zich ’t meiste op ’t oetrope en d’n optoch, vanzelf wilt d’r ’t aaftraeje euversjlaon.
De tweede adjudant van Steef I hit Chico Spee en hae waerde gebaore op 18 juulie 1995 en woont ouch in Remunj. Chico zien elders heite Mario Spee en Josje Toatubun, hae haet nog ein grote broor van 21, Bing, en ein ajer zöster van 24, Ela. Chico hilt waal van vastelaovend viere, mer ouch veur hem waar ’t ein grote verrassing det Steef hem vroog óm adjudant te waere.
Chico zit biej Steef en Sten in groep 8 van de Sjteine Brök, zien hobbies besjtaon oet boete sjpele, hokkieje biej Concordia in de C3, kómpjoetere, karte en krosse. Biej Chico toes is ’t eine echte beesteboel, want zie höbbe veer huunj en nog ein paar vèsse. Hae loestert gaer nao repmeziek en kiek nao films wo-in hel mit outos waert gereje. Boeremoos mit sjpek en lasagne vinjt Chico lekker, sjpruutjes en vès neet, allich es me toes vèsse haet. Chico verheug zich ’t meiste op de kienjermiddaag en d’n optoch. Mit z’n drieje gaon dees jónges ’t gans make in dit kórte sezoen, wo-in ’t motto van D’n Uul “kleur bekinne…” is.
Dit motto vinjt geer ouch trök in de hoesorde van Jeugprins Steef d’n eerste, want det zeen kleurpotloje. De adjudante van Steef höbbe kleijing in James Bond sjtiel, dus det geit d’r sjoon oetzeen.
Ich wins Sjtadsjeugprins Steef I, adjudante Sten en Chico en regeleer Pie ein sjitterend vastelaovessezoen toe en bezónjer väöl plezeer.
Det alles ónger ziene liefsjpreuk :

STEEF, VASTELAOVEND ESTEBLEEF!!!

Erik Snoek,
Kemissie Jeug D’n Uul