“Vastelaovend, det zit good!”

Aad Uuleprins 1999 Rens I oet good Brons(greun) Eikehout gesjneje
Amsterdamse jong leerde Vastelaovend viere van ein ech Remunjs maedje

De zesenvieftigste is ouch de letste Uuleprins van de eeuw.
Laurentius Petrus Bartholomeus Den Elzen (40) regeert as Rens den Eerste
dit jaor euver ‘t Uuleriek ónger ‘t motto: “Vastelaovend, det zit good!”
Ziene Dorslustigge Hoogheid is Hollenjer van gebaorte: zien weeg sjting  gedach höbbe det dae aovend biej Den Elzen ein orgie aan de gang  waas. Want veur de eerste keer in de vief jaor det zie noe in die nuuj  buurt wone, deej Rens de gordiene toe. Vanwaege de geheimhajing,
begriep geer?

Prins Rens is dus gebaore in Mokum wó ziene pap in muibels deej. Later verhoesde hae mit zien elders, broor en zöster via Herten en Melick nao Remunj. Ze höbbe nog gewoond in de Bröksjtraot -biej  Pietje Machielsen baove – en oppe Mertsjtraot. Op det letste adres begós ziene pap ouch ein muibelzaak en nog later oppe Mert in ‘t aaj KOFA-geboew.Juustement: Brons Eike, want B.E. zeen ouch de veurletters van de veur- en achternaam van Rens zien vader, dae euveriges mit ein maedje oet Berg en Terblijt getrouwd is.

Ze wone same aan de Geuljanslaan en Den Elzen senior waert op 4 januari 75 jaor.Renske ging in Melick nao de legere sjool, in Berg nao de mavo en in Remunj nao de MDS, want hae wilde net as ziene pap ongernaemer waere. Op zien 21ste begós d’r as muibelverkuiper en det is hae noe nog sjteeds. Allein is hae noe same mit zien jónger broor Bart eigeneer van die sjitterende muibelzaak Den Elzen op ‘t bedrieveterrein Broekin. Dao äöpende de breurs tweeeneinhallef jaor geleje. Brons Eike hadde ze verkoch aan de gemeinte. Volges de toenmalige wethajer Peter Sijmons (AAS) kump hiej ein grand café in. Maar det mótte veer nog zeen !

1984 Waas ein belangriek jaor veur Laurens den Elzen: hae trouwde mit ‘t maedje van zien druime. Marjan Bremmers (37) hit ‘t, gebaore in de Knevelsgraafsjtraot en dochter van nemes minder dan Minus – van de Kuuper – Bremmers zaliger oet de Veursjtad, vreuger eksellent opmaeker biej Tante Bet in ‘t Pelsersjträötje en bekint van achter de kaarttaofel biej Braam. Marjan, de hellef van eine tweeling, klein, dónker en sjarmant, is eigelik óngerwiezeres, wirkde diek drie jaor biej Dre Peters’ Trompetter en holp Rens ouch nog ein jaor in de zaak.
‘t Echpaar Den Elzen haet teen jaor langk aan de Kepel gewoond. Mer es-se ginge sjtappe, deje ze det in gans Remunj. Döks in ‘t Veldj, beveurbeeld in ‘t Walhalla maar ouch in de binnesjtad biej de Amstel Club, King George of in de Veldjsjtraot. “Es veer in ‘t Veldj oetginge, vroge ze mich waal ins of ich d’r nieks veur veulde prins te waere biej de Veldjmuus. Ich höb noojt jao gezag omdet ich mich d’r neet riep veur veulde”, vertelt Rens. En Marjan zag altied: “Doe waers geine prins, want dan höbbe veer nieks aan de Vastelaovend.” Want waat d’r ouch te doon is en wo ze ouch haer gaon: Marjan en Rens zeen altied same. “Veer höbbe eigelik nemes neudig, veer höbbe genóg aan ós tweetjes. Veer höbbe eigelik ouch gein vereniging neudig. Allein veer twee. Mit ós tweeje höbbe veer zellefs ein zaate hermenie ónger de naam ‘Veer doon ‘t gaer’. Zellefs mit ein eige vaandel!” Rens vertelt ‘t vol trots. Mer hae guf ouch toe, det ein vastelaovesvereniging eine prins neudig haet, es veurtrekker, es de man dae ‘t sjpeel leijd.”Man, haaj op. Inj oktober sjting Ton Nizet van de keuzekemissie van D’n Uul veur de deur. Of ich prins  wilde waere. Ich wis ech neet waat ich heurde. Höb ‘t Marjan vertelt det ónger de zónnebank loog. Det gluifde mich neet en haet de vol-gende morge Ton Nizet gebeld!” Rens sjöd nog altied ziene kale kop es d’r trökdink aan dae aovend.
Toen Marjan eindelijk euvertuug waas van de planne van D’n Uul, goof ‘t Rens greun leech: “Veer höbbe mit de Vastelaovend al zoväöl mitgemaak, allein dit nog neet.” En ouch: “Es-ze dit neet duis, höb-se later sjpiet.”

Rens bekint det hae ein waek haet mótte naodinke alveures hae D’n Uul zien jaowaord goof. “‘t Is nogal get. Prins waer-se neet zo-maar. Dao mót serieus euver gedach waere en van alles gere-geld, zakelik en mit de kienjer en zo. Prins van D’n Uul, gooije morge. Det ze mich daoveur vraoge? Ich kiek d’r ech taege op. Zes waeke lang sjtaon ich in ‘t middelpuntj, in de sjienwerpers.
Miense kienjer, waat ein eer! Ich veul mich ech gesjtreeld. Nae, dit had ich noojt verwach.”
De nuuje Uuleprins is geine ónbekinde in de Remunjse vastelaovend. Al heel lang duit-ter mit aan de optoch, meistal as einzelgenger. Sinds veurig jaor is Rens ouch aktief bezig in de vereni-ging en duit hae de produksie van de kienjermiddaag. “En det blief ich doon, ouch es ich prins bön!”
Verder is hae lid van “Remunjse Zake”, ein club Remunjse ongernaemers die zich inzitte veur geite veur Pole, rame veur de Kathedraal en ‘t Heksehuuske van Louis Scheepers.
Kins-se eine Hollenjer vastelaovend lere?, vroge veer Marjan Den Elzen.
“Nae,” zag ‘t metein, “behalve eine en dae zit biej mich toes!”
Rens is de eerste Uuleprins in ‘t Vorsloze tiedperk. Zien neuchtere reaksie:”Mót kinne!” En wie kiek hae aan taege ‘t feit det-ter de leste prins van de eew is? “Veer höbbe in eeder geval gein millenniumprobleem!”

Wie zuut Rens zien prinssjap? “D’n Uul haet in ‘t verleje döks gans sjtielvolle prinse gehad. Ich wil ‘t angers doon, ich wil eine carnavaleske prins zeen, want eigelik is ‘t toch ein sjertsfiguur, neetwaor? Verder wil ich midde tösse ‘t volk sjtaon, want de prins is-ter veur de miense! En waat ich sjtrakkes ‘t allersjoonste zól vinje: es ich same met de maedjes van de garde, de prinsekepel en de raod van ellef de Oranjerie binnetrek mit de sjienwerpers op mich gerich! Det liek mich zo sjoon.” Ouch Marjan sjteit taegeswaordig in de sjienwerpers. Same mit zien vriendinne Marleen van de Beek en Marjan Breuer vorme ze ‘t trio “De Sansaveria’s” die sjteeds meer optraeje wobiej ze bekinde sjlagers pleebekke. Beveurbeeld op de Vrouwluujzitting op 24 jannewari in Herteheym. Netuurelik duit Rens neet allein mer in muibels. In ziene vrieje tied haet hae de neudige hobbies: hae kaok gaer (ves en Italiaans), is lid van Nautilus en bezig mit ‘t opknappe van eine sjpeedboot, duit gaer zeezeile van en nao Ingelandj – “kotse wie eine reiger” – en hae golf waal ins in Brunssum.

HANS II STRAUS

Prinselikke adjudante

Uuleprins Rens I koos twee vrunj es zien adjudante. Sjaak Jenniskens (37) is eigeneer van PerCom: automatisering aan de Keulsebaan. Hae woont in Aseraoj, is getrouwd en haet twee kienjer(kip,hondj en geite) en nog get kop-pien van dees pagina’s.
De angere adjudant is Wilbert Reijnen (32), hae is de buurman van de prins en det is mesjien waal ins erg gemekkelik. Wilbert is accountmanager biej de veurige bank van aad-prins Harrie III Bak (1960), is getrouwd en haet eine hondj.
Sjefäör Ton de Wit (48) oet Neel is ouch eine kammeraod van Rens, wirk in de metaal, is getrouwd en zorg d’r veur det Ziene Dorslustige Hoogheid veilig weer toes kump.