2001 Crit 1 Crit Lambriex

“In alle heilige huuskes, besjuut mit muuskes”

Waat good is kump van ver

Miene aje sjportkelega Joris v.d. Bergh zaliger zag ‘t jaore geleje al: waat good is kump sjnel. Dinkend aan dees filesofie mot de prinsekeuzekemissie van D’n Uul gemeind höbbe: waat good is kump van ver. Daorom koos de almechtige en wieze Uul dit jaor eine prins dae gebaore is in Zitterd en in Sint Joos woont! En dus deen ich dit jaor veur ‘t eers bie de sentefoekser van D’n Uul ein
kilomaeterdeklarasie in. Want ich höb nog nooit zo ver motte rieje om eine Uuleprins te moge intervjoewe…

Dit waert ein biezonjer jaor veur de sjtadsvastelaovesvereniging. Ein jaor wo-in D’n Uul brik mit inkele jaorelangk ge-koesterde gebroeke. Gank mer nao: veu ‘t eers in de gesjiedenis neet meer as letste, mer veurop in d’n optoch. Ver-der: eine prins dae neet gebaore is in Remunj, waal in Remunj op Sjuiteberg 16 sjteit ingesjreve mer (nog) in Sint Joos woont. “D’n Uul sjpot mit de tradisies. Det is ‘t begin van ‘t inj. Eine Lamaeker (moelemaeker, H.S.) as Uul, sjanj,” zol aad-Vors Thijs Bingen gezag (kinne) höbbe. Det de nuuje sjtadsprins Crit (van Chretien) Lambriex (34) in Zitterd gebaore is, dao kint hae ouch nieks aan daon. Per sjlot sjting de weeg van illus-tere veurgengers as Thei Hamers in Den Haag, dae van Pierre Huyskens in Wessem en van Ghiel Pijpers in Haerle. En dae hendikep kos neet verhinjere det dit trio D’n Uul sjitterende prinse ople-verde. Dus worom zol eine jong oet Zitterd, sjtadsgenoot van Toon Hermans, Zefke Mols, Leo Horn en Jan Notermans, det neet lökke? Wobiej-se dich toch kins aafvraoge: zeen d’r gein Remunjse jonges meer te vinje die…?

De ongernaemer Lambriex (eine Mestreechse naam, zaet-t’r) dae in Zitterd twee en in Remunj drie muibelzakes haet, begos teen jaor geleje same mit zien vruike Lilian (aeve aad) mit ein tweedehands muibelzaak oppe Sjuiteberg. De zakes gingen prima zodet Crit de letste jaore ouch nuuj muibele verköp en veurig jaor bieveurbeeld in dezellefde sjtraot Teeuwen euvernoom. “Det zit good,” mot kelega en aad-prins Rens den Elzen gedach höbbe.

Toch is Crit van hoes oet geine zakeman. Hae deej in Eindhoven de lerare-opleijing. In de Lichsjtad leerde hae Lilian kinne det dao sjeikunde sjtudeerde en later in Apeldoorn sjtage leep biej TNO. Vief jaor hokde de twee same in Eind-hoven. Mer Crit (zonger h, zaet hae) zoog ‘t ongerwies neet zitte en toen zien broor, dae in Zitterd al ein muibelzaak dreef ‘m belaofde: “Ich zet dich in Remunj ouch eine winkel vol”, waas veur Crit de keus erg gemekkelik. De Zitterse jong, gebaore oppe Sjteinwaeg middenin de sjtad en naeve de jongste Golje Narrekapdrager Lei Meisen, trouwde zeveeneinhallef jaor geleje mit zien Lilian, det euveriges waal in Remunj – op ‘t ziekehoes – oet Braobantse aajers gebaore is. Lilian, klein en blondj, woonde in Berg en St. Joos. Crit en Lilian höbbe twee sjatte van blonj döchterkes: Dimfy (4) en Claire (2). Mer de waek nao Crits installasie es 58ste Uuleprins is Lilian oetgeteld en waert de derde Lambriex-naokommeling gebaore. Misjiens waal eine kroonprins! Vanaaf dae daag hit de Sjuiteberg dan ouch beSjuiteberg… En vanwaege deze heuglikke gebeurtenis haet de prins ouch ziene liefspreuk aangepas: “In alle hei-lige huuskes besjuut mit muuskes!”

Crit vertelt det hae vreuger toes van zien moder geleerd haet vastelaovend te viere. “Zie noom mich en de anger veer kienjer altied mit de sjtad in. Mer eigelik bön ich eine Einzelgänger, altied gewaes ouch.” “Klop,” zaet Lilian, “hae allein op sjtap en ich toes bie de kienjer…” Veur vastelaovendvierend Remunj mot Crit geine onbekinde zeen. Hae is lid van de Bacchusklup en waas biejveurbeeld in 1995 nog adjudant van Bacchus Jos Becks. En de Bacchusklup krieg in de toekoms netuurlik ‘t predikaat “prinse-lik”? Verder motte de vaste klantje van de Chevalier, de Amstelclub en de Baraque – allemaol buurtkefees – hem kinne vanwaege de beste houding aan ‘t buffet.

Neet allein ‘t bezeuke van heilige huuskes is ein hobby van Crit I. Hae voetbalt nog altied in ‘t tweede van Sint Joos – “al 9 jaor as sjpelverdeiler” – is lid van de Geiteklup in det dörp – “eine keer per jaor Iris II bekieke” – kiek geine tillevisie, mer zien grootste hobby is klusse. Zo is hae noe bezig mit de verboewing van de aaj boerderie in St. Joos en hae haet ouch zellef versjillende penj oppe Sjuiteberg verboewd die hae vervolges verhuurde. D’n Uul haet eine hele henjigge jong binnegehaold…

Mer wie ging det toen D’n Uul oppe sjtoep sjting? Crit: “‘t Waas ‘t lets van oktober toen Leon In ‘t Zand de winkel binnesjtapde en vroog of ich prins van D’n Uul wol waere. Nou, ich bön ech effe van de wap gewaes. Ich waas net ein mevrouw aan ‘t helpe. Die vroog of ich mich waal good veulde. Kin-se naogaon. Toes höbbe Lilian en ich de zakes op ein rieke gezat en vervolges same ein pötje gejank. Vanwaege ‘t nuuj kiendje hadde veer lever nog ein jaor gewach. Mer jao, doe höbs nieks te wille. Nae, dit hat ich nooit verwach. Ich bön neet van Remunj en d’r loupe zoväöl goje Remunjse jonges rondj.

Mer ich bön hersjtikke greuts en vinj ‘t sjitterend. En veur mich is D’n Uul al jaorelangk ein geweldige klup. Ouch de insigste vereniging wovan ich prins zol wille zeen. Ich bewonjer D’n Uul vanwaege zien vriejwilligers. De miense in de sjtad höbbe d’r gein benul van waat die allemaol doon. Ich vinj waal det D’n Uul zich meer zol motte manifestere as sjtadsvastelaovesvereniging. Misjiens det ich dao noe aan mit kin helpe?

Waat vastelaovend veur mich is? Sjtappe, aajhoore, verkleije, geweun op ein leuke meneer ‘t sjpel sjpele. Nae, zeker gein zaatlapperie. Ich verheug mich op de optoch. Veural omdet veer noe de eerste wage zeen en vervolges de sjtoet good kinne bekieke. Dan kan ich ouch ins persies telle hoeväöl prinse d’r eigelik mittrekke. Neet veur ‘t ein of ‘t anger, mer Remunj mot toch net as Zitterd eine sjtadsprins höbbe. Neetdanne?”

Zien personeelsleje haolde de nuuje prins vanzellefsjpraekend oet de rieje van de Bacchusklup. Zien adjudante zeen: Hein Jambroers (35) eine echte Remunjse jong en in 1996 Bacchus. Hein is hoof verkoup bie ein eksplwatasiebedrief in Veldhoven. Hae woont same mit Varadio Monsanto op ‘t Bergske in Remunj. De angere adjudant is Ben Janssens (39) ouch eine rasechte Remunjse en waereldberoemp as de werme bekker oppe hook van de Aoliesjtraot. Ben is ge-trouwd mit Moniek en haet drie kienjer. Als sjofeur van ‘t dorslustige trio fun-geert Erik van Pey (33) oet Maasbrach. Hae is van beroep inderdaad sjofeur en haet belaof gein alkohol te zolle drinke.

Door: Hans II Straus.