Danny I, Vilters
“Neutjes zeen ouch lekker”

De nuje Prins van Remunj is Danny Vilters.
Geer kint ‘m! Danny is de man dae Uule en anger Remunjse miense al zo-n kleine 14 jaor vleugels guf vanoet de nao hem geneumde sjlieterie.
Hae is gewind om mit de vastelaovend paraat te sjtaon en te wirke wiej ein paerd, dus det belaof get! Gaer sjtelle veer Danny I aan uch veur.

Oze Prins waerde gebaore in 1968, in ein vootbalgezin. Zien eljershoes sjting in Wessem. Moder kwaam oet Gelderland, vader oet Rotterdam.
Danny greujde op in ‘t Limburgse landj, doon bie moder Maas, en sjprik plat es de beste. Nao ziene sjooltied volgde hae de neudige kurzesse,
mer wiej ein zaoterdaags baantje bie eine plaatselikke sjlieter good beveel, wis hae waat ‘m veugde en wo zien besjtömming loog.
Det waas ’t vak van sjlieter, in eerste instansie in ’t get wiejer sjtruim-aaf gelaege Naer en nog neet in Remunj.

Nao Remunj

14 Jaor geleje vestigde Danny zich in de sjtad en det neet zo-mer örges.
De ajere onger os weite zich te herinnere det aan Munsterplein 6 de zaak loog van Chris Gijsen, kefeehajer en sjlieter,
loodgeter en ripperatäör van träöte, zenger en arties, vastelaovesgek. De waeg nao ‘Danny’s Drankshop’, waas dus al good ingeloupe.
Vanaaf 1999 woonde Danny, vrundin Janine en de kienjer ouch baove de zaak. Janine is van gebaorte ein ‘Venloos’ maedje,
det ech Jocus-blood in zien aore haet. Same höbbe Danny en Janine 4 zone: Beau (11), Goof (10), Loek (8) en Toss (6).

Herinneringe
Danny haet ein werm herinnering aan ziene buurman zaliger, aad-Prins Pierre, dae döks ziene wage biej hem veur de deur zoot, en sjmörges, es hae de wage oet de waeg zoot, altied ein präötje kwaam make. ‘Eine geweldige vent’, zo sjprik Danny euver hem, ‘en eine hele leve miens.’ Zjuus wiej Pierre kós ouch ’t gezin Vilters mit zien gaste genete van ’t zích op ’t Munsterplein, veral saoves in de wintjer. Ein gasvriej hoes waas ’t dao aan det Munsterplein. Altied luuj euver de vloer.

Vootballer van Herte

’t Jaor 2008 brach aevel verangering. Ein promenaaj veur de deur is veur eine serjeuze sjlieter neet plezerig. De zaak waerde dus nao de Neersjtraot verhoes. ‘t Gezin van de prins woont noe in Herte, in ein sjoon nuuj hoes, nog ummer de zeute inval. Remunj waerd gemis, mer ziej wone daoveur noe waal paaf aan ’t vootbalveldj det oze Prins erg leef haet. Veer motte uch hiej vertelle det oze Prins van vootbal hilt. Vreuger waas hae de sjpits, mer taegesweurdig sjteit t’r in de gool van de veterane van SHH, ein elftal det hae zellef haet opgerich en wo ouch de adjudante en de sjefäör in sjpele. De aad-prinse Paul (Hamers) en Crit (Lambriex) doon ouch häör pertiejkes mit, net es Jeroen Vollebergh, Rick Zwart (Donderböl) en George Walker (Veldjmuus) – det is pas ein elftal!
De meer ambiesjeuse kantj van Uule-prins Danny ligk bie de jeug. De drie aajste jonges vootballe op nivo, bie de jeug van Roda JC (1x), VVV (2x) en SHH (Herte). Danny sjörg heel get aaf mit de mén, geit nao traininge, wedsjtriede en vergaderinge in de buurt. Dan is de prins aeve sjefäör en zeen de jonges de prins.
 

‘t Maedje det ‘t ‘m haet
aangedaon. Mit siegret!

Ongerwaeg
Altied ongerwaeg. Zo besjrief de prins zich zellef. Waat veer doon, det doon veer good. Det zeen de wäörd van oos nuuj first lady. Ziene sjefäör zaet ’t aevel zo: Danny sjteit altied klaor om dich te helpe. Oet eige ervaring zegke veer: oze prins is eine rustige, besjeije en sjoone gas.

De Prins en de men diej veur ‘m gaon zurge, vlnr Patrick, Mark en Edwin

Noojt gedach
Noojt haet ‘r gedach aan ein prinssjap, mer wiej ze hem vroge hoofde hae eigelik neet langk nao te dinke. Hae wil d’r mit zien vrunj ein feesje van make. De morge nao de aovend det de zaak beklonke waas en veurzitter Rob en vors Sybaer de deur oet ware, euverveel hem eine nutte druim:
’t Waas de Nach van de Nuje Prins, Danny zoot opgesjlaote in ein doos, zien vrunj aevel dronke zich d’r eine, hadde ‘t grotste plezeer, vergote hem glad-eweg, lete hem zitte, hae kos d’r neet oet, had nieks te drinke en wol toch zo gaer d’r biej zeen …! Det geit alemaol good komme.
Oze nuuje Prins sjteit op gezellig-heid. Bie det glaeske beer heurt veur hem ouch ein siegret. Favoriet merk: Gauloises Blondes. Det waert mit vastelaovend nog aeve aanpasse.

D’n insigste
De Prins geit ’t Uule-riek regere onger zeen eige en insigste naam: Danny. Eine Prins van diej sienjatuur höbbe veer nog neet gehad, dus ’t waerd oetgaaf nommer ein. Zien sjpreuk is ein sjpitse: Neutjes zeen ouch lekker. Geer moog uch zellef de döbbele baom oetdinke, mer veer vraoge oet naam van de mienselikheid noe al om eur kompassiej mit de Prins es hae sjtraks daobaove sjteit veur te gaon zonger siegret.
Danny zal zien möts mit waerdig-heid drage. Wiej ze mos waere oetgezoch – mit de neudigge Prinse ein gemértel – kwaam zo-mer ’t juuste exemplaar veur d’n daag. De Prinse-ongersjeijing is ein fleske, ‘t kos neet baeter passe. Zegk in godsnaam neet zakflacon, mèr bóksefles. Zien adjudante zeen zien beste vrunj, Mark Moors (van de verzekeringe) en Patrick Heckmann (waterbedde). Ziene sjefäör is naober en vrundj Edwin (sofwaer), dae geine dröppel drink. Good bekeke dus.

Nog meer
Waat wilt geer nog meer weite? Danny’s sjterrebeeld is de Sjteinboek, in China zol det ’t Sjaop zeen. Neet veur nieks, mer det sjteit veur doorzitte, en ’t klop: ooze Prins geit door toet wied in de morge. Beljare (Libre) is ein anger sjport wo Danny al 23 jaor mit aan de gang is. Rood is de levelingskleur. Mit eine loempia van Rasa Senang of ein sjtökske gebakke ganzelaever is deze jong edere donderdaag hersjtikke gelökkig. Ein glaeske beer sjprik van zellef, net es de siegret. Mer aje Port of goje Single Malt Whiskey of Cointreau, det is op ‘t juuste mement ouch gein sjlech voor.

Bacchus
Ein vergeliek ligk veur de handj, ‘mer ich zal Bacchus gein konkerrensie aandoon’, belaof Danny. Op de valreep van oos gesjprek vertelt hae ein verhäölke. ’t Gebeurde ein paar jaor geleje mit de vastelaovend. Wiej hae en Janine in Neel aan ’t viere ware en good op waeg ware, belde ‘t Zjwetskammezaol (Le Journal). ‘Diej moste giga-väöl höbbe.’ Waat duis-se dan es profesjonel dae mit diej daag 24/3 deens haet? Danny’s veurgenger, Math, zol zegke ‘Dao geis-se.’
‘‘t Ein fees oet kommende, mit ein sjtaekwaegeske vol drank door de anger feestende bende haer, mos-se dich det veursjtelle … De hellef waas al draaf wiej ich achterdoor aankwaam.’

Valreep
Nao ’t gewazel mitein, veer hadde al de leste op zien prinssjap gedronke, kiek de Prins de sjriever van dees intreduksie nog ins aan en vreug: ‘Nog eine? Ich zol hersjtikke greujts op dich zeen.’ Toen waas ’t antjwaord det ‘t versjtandj bevool nae, want daags daonao mos waere aangetraoje, mer ’t hert leep euver en jubelde: Gaer, Prins, nog heel väöl, op al diej sjoon memente diej nao vandaag nog komme.

JPh