” Trök euver de Brök “

Uuleprins Ghiel I: Geine Bik Brozzer,waal eine Bik Mek.

Aajste prins in Uulehistorie is eine echte ‘miensemanne’
Alles in teike van de Veursjtad en de femielie

Eederein dae get wil bereike in ‘t laeve, zol ziene loupbaan eigelik as verpleger motte beginne. Ich kin d’r twee die heel lang geleje as verpleger begos zeen en kiek waat ze bereik hšbbe: de eine is Hans Smals, aad -prins en veurzitter van D’n Uul, de angere is oze nuuje sjtadsprins Ghiel I Pijpers.

‘t Eerste waat hae vroog toen Hans Smals ‘m vroog om de eerste Uuleprins van de eeuw te waere, waas: “Bön ich neet te aad?” Ein gooj vraog mit zo’n lang sezoen veur de deur, want Ghiel is al 52 en waerd euver twee waeke, op 20 jannewarie, 53 jaor. Mit dae respektabele laeftied is de zevenenvieftigste prins tegeliek de aajste Uuleprins ooit. “Netuurlijk höb ich d’r altied van gedreump sjtadsprins van Remunj te waere. Maar omdet D’n Uul de letste jaore väöl jong prinse haet gehad, waas miene haop beheurlik gesjlonke,” guf prins Ghiel toe.

Miene kelega, de grote sjportsjriever Joris van den Bergh, sjreef vreuger al: ‘waat good is kump laat’ en die oetsjpraok haet de Wieze Uul zich in de ore geknuip wie hae Hans Smals nao Ghiel Pijpers sjtuurde. Mit deze prins haet D’n Uul, wie gebroekelik, weer ein gooj keus gedaon. Ghiel waerde in 1947, ‘t oprichtingsjaor van De Winkbuule, in Haerle gebaore. Vroedvrouw waas zuster Rulkens, jao, de tante van aad-prins Jos I. Det van Haerle vergaef ich ‘m omdet mien vrouw dao ouch gebaore is. ..

Alhoewaal zien vader van Zjwaame kump, is Ghiel verder eine echte Remunjse jong, want zien mooder is Netje van Appeven, zuster van Bair, nao Sjeng Gijsen de tweede Meun van het AAS. Aaj Remunjse miense herinnere zich zeker de Gebreurs Pijpers, grote RFC-ers die zellefs ein eige sjtraot oppe Kemp hšbbe. En Ghiel, dae eigelik Gerardus hit, is geneump nao ome Sjra van Appeven, gemeinte-ambteneer en aad-veurzitter van Sjwif, in Remunj ouch bekind as ‘Potje’.

Femilie is belangriek veur Ghiel. Dus ouch die van zien vrouw: Elies (49), ein ech Remunjs maedje, dochter van Lei en Lien Stoks, zuster van aad-prins Jos III en tante van naef Nard, in 1981 jeugprins van D’n Uul. Ein echte vastelaovesfemilie: sjoonvader Lei waas jaorelang sikkertaris van D’n Uul en goof dertig jaor achterein de prinsemšts. Zien vrouw Lien maakde altied de pekskes van de damesgarde. “Eeuwige” prins Ghiel: “Ich wil mien prinssjap dan ouch opdrage aan pap en mam Stoks.”

Naeve ziene grote leefde veur de femilie, haet Ghiel Pijpers ein groot hert veur de plek wo hae woont: de Veursjtad. In zien regeerperiejode is hae van plan de Veursjtad nao ein hoger plan te tille. Det bliek al oet ziene prinsesjpreuk: ‘Trök euver de Brögk!’ ‘t Feit det D’n Uul dit jaor op vastelaovesdinsdig de sjloetingsseremonie in ‘t Witte Kirkske hilt, is dao netuurlik neet vraemp aan. “Wit-se waal,” zaet Ghiel, “det in de Veursjtad maar leefs veer prinse vlakbiejein wone of gewoond höbbe: Mathieu Janssen, Jos Stoks, Lex Vervuurt en ich zag de gek.”

De nuuje Uuleprins trouwde in 1972 mit Elies. Ze krege twee kienjer: Femke (26) en Martijn (24). Ghiel hat Elies lere kinne in ‘t ziekehoes in Remunj. Het wirkde dao op ‘t lab en hae kontrolleerde ‘t blood bie operasies. Ghiel Pijpers is eine manne zonger ongelukke mer mit väöl ambachte.: viefteen (!) biejein. Hae haet ape verzorg, bokse gepers en motors oeteingehaold. Hae begos as verpleger, in Vinraoi, same mit Hans Smals. Later waerde hae artsebezeuker en vervolges sjpesialis veur hert-long-mesjiene. In 1986 besjlote Ghiel en Elies gans get angers te gaon doon: ze begoste in Haerle ein McDonalds aethoes. Momenteel haet Ghiel d’r drie: twee in Haerle, ein in Kirkraoi. Volgend jaor geit ‘t veerde in Landgraaf aope. Ghiel is eigelik de grootste horeca-ongernaemer van Limburg: “Väöl groter as Van der Valk!” Hae maak eine omzat van 15 miljoen per jaor en guf wirk aan 280 miense. Estebleef.

Ghiel, Elies en de kienjer hšbbe achteen jaor in Hael gewoond. Dao hšbbe ze eigelik ouch de vastelaovend pas good lere kinne. Ghiel waas dao adjudant van de prins en Elies is eredame van De Gangmaekers. Dae titel haet ‘t ech verdeend, want ‘t maakde – net als zien mooder – de pekskes van de jeugdamesgarde. Same mit Ghiel en de kienjer runde Elies jaorelang de garderobe in ‘t gemeinsjapshoes. Van de opbrings waerde lang reagejes gekoch voor de leje van de Raod van Elf. In Hael ouch waerde Ghiel lid van ‘t hoofbesjtuur van de BCL, de Bonjd van Carnavalsvereniginge in Limburg, later zellefs veurzitter. “Ich bšn neet zo eemes dae geer veuraan sjteit, ich bön meer eine regeleer en vinj ‘t leuk anger miense, leefs de geweune man of vrouw te huldige en in ‘t zunke te zitte. ”

Ondanks zien drökke baan is Ghiel ein väölgevraog besjtuurslid. Hae zit in ein groot aantal besjture in Haerle. TevŠšl om op te neume en det doon veer daorom ouch neet. Hae woont noe bekans teen jaor in Remunj, maar opvallend is det hae hiej nšrges bie is. “In Remunj mot ich mich vrie kinne veule,” is Ghiel zien leus. Mit die vrieheid duit hae trouwes ouch nog van alles. Zo sjtelt hae zien prachtig en monumentaal Achterhoes aope veur jonge en beginnende kunsteneers. Hiej waere geregeld eksposisies gehaje. Anger hobbies van Ghiel zeen muibels ontwerpe, kaoke en van aaj sjpulle nuuje make.

De nuuje prins wit det hae ein lang sezoen veur de boeg haet. Kint d’r det aan? Ghiel: “Ich doon drie keer per waek aan akwa-jogging, höb bie Otti Roethof getreind, bön gesjtop mit rauke, waerde daodoor dieker maar bön gaan oefene veur de maraton van Joe Jork. ‘t Is bie oefene gebleve…”

Hans II Straus

Personeel van de prins

Waat zien personeel betruf, haet prins Ghiel I ‘t veural in de femielie gezoch. As adjudante koos hae ziene naef Nard Stoks (30), zellef aad-jeugprins van D’n Uul en zoon van aad-prins Jos III Stoks. Nard woont in Herte en is getrouwd mit Anouck en vader van eine vief maondj aaje zoon Daan. Hij is van beroep vertaegewoordiger.

De angere adjudant is Bert Hendrix (50). Hae woont in de Veursjtad, is eigeneer van de Helenawerf en getrouwd mit Marianne, de dochter van aad-Bacchus Toon Grummels. Bert haet twee dochters: Manuela, prinses van De Sjnapsnaze in 1982, en Vivian. Hae sjteit op ‘t punt opa te waere.

Prins Ghiel koos twee sjofeurs: ziene sjoonzoon Sidney Higgs (27), gebaore in Sittard en samewonend mit Femke. Ze gaon volgend jaor in april trouwe. De angere sjofeur is Ghiel ziene zoon Martijn. Dae woont same mit Chantalle Bergmann en drief in de Brögksjtraot de Italiaanse iessalon La Bella Rossa.

Aad-prins Jos III Stoks is aan Ghiels haofhaajing toegevoeg as ‘eine saort regel-Ebus’, zaols ziene dorslustige hoogheid ‘t zellef omsjrief.