Prins Joost I
Joost I Kruijssen, Prins van Sjtadsvastelaovesvereniging D’n Uul
Femielieman, vereinigingsmiens, teamsjpeler
‘Same, is neet allein’
Nao jaore van sjpeculere is ’t noe zowiet: Joost I is de nuje veurgenger van D’n Uul! Geine ónbekinde binne de vereiniging, want hae maak al 8 jaor deil oet van de Raod van 11. Wie bezunjer, det hae juus in dit 8×11 jubeleijemjaor es prins veurop moog gaon. Mit ziene sjpreuk vertaegewaordig hae ’t thema det dit jubeleijem centraal sjteit: verbinjing. En waem baeter óm dit oet te drage es ‘ne echte vereinigingsmiens?
Verrassingseffek bie ‘t interview
Nao de 11e van de 11e zól, vanoet mien nuuj rol in de redaksie van ’t Zjwetskammezaol, mien eerste interview mit ‘ne Uuleprins plaats vinje. “De nuje wilt det gaer bie dich toes in Aoke doon”, zag miene pap Aad Sjtadsprins Crit I Lambriex, dae dit jaor veurzitter van de PKBK is. “Waem is det dan?“ vroog ich ‘m nuujsjerig. “Dao kin ich nieks euver zègke“. Allèh dan, det zólle waal nuuj geheimhajingsregels van D’n Uul zeen, dach ich. De Bundesnachrichtendienst is d’r nieks bie!
Waal appaart, want wie pap in 2001 zelf prins waerde, sjreef Hans Straus nog in ‘t Zjwetskammezaol det hae veur ’t eers ‘n kilomaeterdikklerasie mos indene bie de sentefoekser van Den Uul, veur ein interview in Sint Joost, note bene. Mer good, as dae nuje nao Aoke wilt kómme, dan doon v’r det.
Op ‘ne vriedigaovend in november zoot ich, nao nachte sjlech sjlaope van de zenuwe, te wachte. Drie kerteer nao de aafgesjpraoke tied ging eindelijk de bel, doe kins dich veursjtelle wie zenewechtig ich intösse waas. Vol sjpanning sjting ich in de deuraopening te wachte, en nao baove kwaam nemes minder as… miene eige zjwaoger, Joost Kruijssen(36), mit zien gezelsjap! Det waas aeve ’n verrassing; toet det moment had ich nog nieks door. Gein wónjer det d’r zo raodselechtig waerde gedaon euver det interview– Joost wól det ’t verrassingseffèk groot waas. Gelökkig waas ’t dus neet erg det zie te laat ware, want ‘ne houp vroage kóste veer drek euversjlaon.
Van verwerming toet bolderker
Joost waerde 36 jaor geleje gebaore op de Charles Ruyssjtraot in Remunj, as tweede van veer kienjer en de insigste jóng tösse drie zösters. Al flot verhoesde ’t gezin nao ‘t Katerriek, wo hae opgreujde aan de Julianalaan naeve de Vriesshop.
Zien moder Maud is gebaortig van Remunj, gebalde in ‘t Katerriek, terwiel vader Hans oorsjprónkelijk oet de ‘Kruikenstad’ kump. Op zien twellefde verhoesde Hans mit zien gezin nao Remunj, wo zie vader filiaalchef bie Van Den Brekel op de Mert waerde. Gelökkig maar, angers had hae Maud mesjiens gaar neet lere kinne en hadde veer noe neet zónne sjieke prins gehad. Allebei de elders höbbe gewèrk as óngerwiezer in ‘t basisóngerwies, pap op Basissjool de Zonnewijzer en mam op versjillende basissjole in Remunj en omsjtreke. Noe genete ze allebei van häör pensjoen.
Wiewaal ’t gezin gein lid waas van ‘n vastelaovesvereiniging, zoot Hans waal bie Klaatsachteraaf. Dees klub kwaam regelmaotig bie-ein bie de Amstelclub en organiseerde de Aajhoor competiesie en de heringe bokaal op asgoonsdaag. Lid van ‘t eerste oer waas Bibi Bierbaum, de Bins. Bie Klaatsachteraaf zoot ouch ‘n gruupke aad Uule, wie Ton Spätjens, Harry Verheeze zaliger, Huub Hammer zaliger en Jo de Bock zaliger. Later, wie Joost en zien zösters Eefje, Silke en Karlijn mitginge mit de vastelaovend, kwame ouch zie döks bie de Amstelclub. De kienjer hadde dao häör vas plekske op de verwerming, wo zie alles kóste euverzeen.
Toet groep 4 zoot Joost op basissjool de Sjakel, waonao hae ziene sjooltied vervolgde op Basissjool Leeve. Dao oefende hae al vreug zien prinselike kwaliteite oet: as sjoolprins ging hae mit de sjpreuk “clown, piraat of prins, eine sjone vastelaovend is miene wins” mit ‘n bolderker door ’t dörp.
Prins in de praktijk
Nao de middelbare sjooltied op Schöndeln ging Joost nao ’t Cios in Sittard en sjtudeerde aaf es orthobewaegingsagoog. Probeer det maar ‘ns drie keer flot achterein te zègke. Daonao trok hae nao Nijmegen om fysiotherapie te sjtudere. De eerste twee jaor pendelde hae nog op en neer vanoet Remunj, maar besjloot oeteindelijk op kamers te gaon. Nao zien sjtudie kwaam hae weer flot trök nao Remunj en begós in 2013 as fysiotherapeut bie Fysio Moves in Herten. Dao werk hae noe al 1×11 jaor en is hae vanaaf 2020 mede-praktijkhajer, same mit Robbert Fleer. Det kump good oet, want mit al det sjpringe zal ‘ne fysiotherapeut in ’t prinselik gezelsjap vas good van pas kómme. Naeve zien werk haet hae nog de master manuele therapie bie de SOMT in Kerpen, Pruuses aafgeróndj. De nuje wèt dus van aanpakke, in de praktijk én op de buun.
Team veur ‘t laeve
Taegewaordig woont Joost same mit zien vriendin Dimfy Lambriex (28) en dochter Feline Kruijssen (0) op Roerzicht. Dimfy, aad damesgarde-maedje en dochter van aad Sjtadsprins Crit I Lambriex, is supervisor Audit bie accountantskantoor RSM in Heerlen en bezig mit de opleijing toet registeraccountant. ’t Waas dan ouch neet gek det het nao al zien Uulejaore bie de kienjergarde, de jeuggarde en de damesgarde aan de sjlaag ging es penningmeister bie D’n Uul, waat ’t noe al ruum 6 jaor duit. Veurig jaor waerde het zelfs beneump toet Eredame van D’n Uul. Mit die kilomaeterdikklerasie zal ’t dus waal goodkómme!
Joost leerde Dimfy kinne op 10 November 2013, bie Aad op Nuuj op ’t Munsterplein, wie toepasselijk. Hae kwaam dao dae zondig mit zien hockeytas haer óm zich nog eine te drinke, en dao zoge zie zich veur ‘t eers. Later waerde hae häöre hockeytrainer (volges hem om häör hockeytechnieke te verbaetere, maar dao zal vas meer achter gezaete höbbe). Óngertösse zeen zie al 11 jaor samen.
In september 2024 krege Joost en Dimfy häör döchterke Feline, det al binnen 24 oer nao de geboorte as lid bie D’n Uul waerde aangemeljd Waarsjienlijk is det ’t jóngste lid van de vereiniging ooit. Ongetwiefeld waert de vastelaovend ouch bie hem mit de paplaepel ingegaote.
Verbinjing door (sjoon)femilie
Wie Joost en Dimfy zich leerde kinne, zoot Dimfy mit häör zösters Claire Lambriex en Luna Lambriex nog bie de damesgarde. Häör moder Lilian Lambriex waas begeleidster van de damesgarde en pap zoot bie de Raod van 11. De ganse femielie Lambriex waas dus eder waekinj in ’t vastelaovessezoen mit D’n Uul op paad. Joost had toen de keus: allein toesblieve of mitgaon. Nao ein paar keer mitgaon zónger offiesjele rol, dach hae “as ich d’r toch bie bön, kin ich net zo good bie de raod gaon”. En zo geit ’t gebeure. Óngertösse zit hae al ach jaor same mit sjoonpap Crit in de Raod van 11.
Waat Joost ’t sjiekste vinjt aan de vereiniging? ’t Femieliegeveul. “Hie waert de vastelaovend ech oetdrage. D’r waert vanalles georganizeerd en zo waere tradiesies in sjtandj gehaje. ”Waat ’m ouch aansjprik is det bie D’n Uul jónk en aad same op paad gaon. In ziene begintied bie de raod waas Joost de jóngste, waat bes aeve winne waas Maar juus die mingeling van versjillende generaties maak ’t sjiek. Noe d’r inmiddels get meer jóng gaste in de Raod zitte, zuut Joost zichzelf es veurluiper, dae as eerste die brök tösse jónk en aad wis te sjlaon.
Naeve de Raod is Joost ouch in versjillende kemissies van D’n Uul actief. Zo is hae betrokke bie de organisatie van de prinseresepsie in de Sjpegeltent (dit jaor haet hae dus zien eige resepsie georganiseerd) en organiseert hae ouch de oetreiking van de Gouden Narrekap, die in 2025 in Remunj plaatsvinjt.
De Køttekløtsjers
Sinds 2013 zit Joost bie de De Køttekløtsjers – ein klub die aaf en toe de kløtsj kwiet is en d’r van hilt óm te kløtsje. Zie zeen “offiesjeel” opgerich in 2013 door e sjtel aad teamgenote van Heren 1, maar volges häör is de klub “ónoffiesjeel” al in 1840 opgerich. Wie det persies zit, moog Joost weite. De Køttekløtsjers treffe zich altied op vastelaoveszaoterdaag veur ein sjtevig óntbijt, om vervolges same nao de sjtasiefestasie te gaon. Mit häör blauwgesjminkde gezichte en bóntjès aan herkint geer häör drek.
Keuning van ‘t middeveldj.
Ouch bie hockeyclub RHC Concordia is Joost al lange tied neet meer weg te dinke, óndanks inkele poginge óm ’t get röstiger aan te doon de leste jaore. Zelfs nao ein kort oetsjtepke nao de hockeyclub in Venlo keerde hae weer trök nao zien roots bie de Remunjse club. Óngertösse is hae erelid van Heren 1, wo hae nog altied mitsjpeelt. Op ’t middeveldj dribbelt hae edere taegestenjer veurbie mit zien henjige technieke. Mit ’t team is ’t ouch döks ’n kwestie van doorzakke op vriedigaovend nao de training. Op ’t veldj of daoboete, Joost is eine teamsjpeler pur sang.
De vraog
In augustus kreeg Joost ’n bericht van Aad Sjtadsprins Roger I Geurtz: “Morge höbbe v’r vergadering veur de Gouden Narrekap, kinse daobie zeen?” Zo kortdaag had Joost eigelik geine tied, maar Roger bleef aandringe en zag det ’t óm priesaafsjpraoke ging, wo Joost as organisator van de feesaovend bie mós zeen. “Witse waat, dan sjluuts doe get later aan”. Waat Joost neet wis, waas det Roger bie zien berich ’n döbbelrol vervulde: zowaal as veurzitter van ’t 8×11 Jubeleijem Kernteam, as ouch as lid van de PKBK.
Wie Joost aankwaam bie ’t Arresthoes en de 4 here van de PKBK (Crit I Lambriex, Roger I Geurtz, Hein Jambroers en Uuleveurzitter Dirk I Franssen) zoog zitte, wis hae geliek woróm ’t zo belangriek waas det hae mós kómme. “Die vraog is netuurlik sjiek, maar dan geit d’r toch waal get door diene kop.” Dimfy waas op det moment hoogzjwanger, zie hadde net ’n verboewing achter de rök en ware pas verhoes. Hae mos d’r dus aeve euver naodinke.
Toes kroop hae taege Dimfy aan in bed, het veulde zich dae aovend neet gans lekker “Doe liks naeve de nuje prins van D’n Uul” zag hae, wo op Dimfy geliek ’n träönke leet, zo sjiek vónj ’t det. Joost waas gans van de wap en is toen ’s aoves laat nog ’n rundje gaon hèlloupe om zien gedachte op orde te kriege. Hae vónj ’t altied al ’n sjiek idee óm prins van D’n Uul te waere, mer geit det dit jaor waal allemaol passe? Maar ja, doe waers maar eine keer gevraog.
De adjudante
De adjudante mós hae toen ouch al rap gaon vraoge. In ’t kader van ’t samezeen en de verbinjing kwaam Joost al gauw oet bie vrunj, femielie, hockey en voetbal. Det twee van dees men d’r gein böl versjtandj van höbbe wie ’t d’r bie D’n Uul aan toegeit is neet erg, Joost haet haor persies oetgelag waat häör te wachte sjteit.
Es eerste vroog hae Lars Horbach (36), mit waem hae meer as 20 jaor same haet gehockeyd. Binne ’t prinselik gezelsjap kinne zie zich ’t langs.
Lars is leecharchitect en woont mit zien vrouw Milou Horbach (34) en kiendjes Roos (3) en Fleur (0) in Remunj. Wiewaal Lars taegewaordig geine intensieve vastelaovesvierder is, vinjt hae ’t waal sjoon om de tradiesies aan zien kienjer mit te gaeve. Wie Joost van de zomer bie hem langskwaam óm zogenaamp get te bringe, en ‘m toen vroog of hae ‘m ein vastelaovessezoen lank de vot wilt gaon naodrage, mós hae dao aeve euver naodinke. Joost waas getuge gewaes bie Lars ziene broelof, “noe höbse de kans om get trök te doon”. Gelökkig zag d’r toen jao. Hae geit binne ’t prinselijk gezelsjap de rol van sentefoekser en menke van de tied vervölle en zal ouch deils as sjefäör mitgaon.
De tweede adjudant, Roel Schenk (44), is al 9 jaor same mit ’t zösterke van Joost, Silke Kruijssen (34). Wiewaal zie de deur neet platloupe bie-ein höbbe zie ’ne goje bandj en as Remunjeneer begriep Roel de vastelaovend. Roel werk es teamleider facilitair in ’t Laurentius ziekenhoes en woont mit Silke en kiendjes Krisje (5) en Suus (2) in ’t Katerriek. Daonaeve is hae lid en mit-oprichter van V.V. de Kers. Muzikaal gezeen hilt Roel meer van de modernere vasteleaovesmeziek mit ’ne goje beat, maar kint hae ouch zeker genete van ’n sjoon sjtökske live meziek. Hae is de regelnaef binnen ’t prinselik gezelsjap en geit d’r veur zorge det alles op rölkes löp.
Martijn Wolters (38) kint Joost vieja sjoonpap Crit, dae vreuger al bevrundj waas mit de pap van Martijn, lange Frans, ouch geine ónbekinde van D’n Uul. Frans sjpeelde jaore de trombaone bie de prinsekepel. Minnigein zal zich nog herinnere wie hae döks mit zien ouge toe op zien trombaone sjpeelde en de sjoonste klanke oet zien sjuuf haolde. In de gezamelike passie veur ’t Duitse voetbal vónje Martijn en Joost zich en zie bezóchte same al väöl sjoon voetbalpötjes, veural in Dortmund en Mönchengladbach. Daobie sjproke zie al ’n aantal jaor geleje aaf det Martijn adjudant zól waere as Joost ooit prins waerde. Martijn waas in 1997 jeugprins van D’n Uul (mit mich as prins, geit alles nao wins) en haet later ouch get jaore bie de Raod van 11 gezaete. Hae vonj ‘t ’n heel eer det d’r door Joost gevraog waerde en zag nao gans kort euverlik mit zien vrouw Ankie Wolters (37) dan ouch geliek jao. Martijn woont mit Ankie en kiendjes Julen (11), Viènne (9) en Lorèn (4) in ’t riek van de Gangmaekers, euver de Maas in Hael. Es eigeneer van ’t voetbalreisbureau Voetbal Retour organizeert hae voetbalreize nao boetelandjse voetbalwedsjtrieje en leut hae miense onvergaetelike voetbalervaringe belaeve. Martijn zal zich binne ’t prinselik gezelsjap veural mit de PR bezighaje.
Ein sjiek moment vónj Joost ‘t offiesjeel vraoge. Naodet hae offiesjeel gevraog waerde door Vors Dirk I, sjprook Joost zien aansjtaonde adjudante kort toe. Daobie leet hae zelfs ein träönke. Det gebeurt, as v’r Dimfy mótte geluive, neet gauw.
Mit de maillot onger de badjas
Väöl later maak Joost ’t nuujts bekind bie zien femielie. De ganse femielie Kruijssen zoot bie-ein, wie Roel vertelde det hae dit jaor adjudant geit waere. Det zal waal bie de Katers zeen, dach ederein. Op det moment ging Joost aeve weg óm get te haole en trok baove sjtiekem ziene prinsemaillot en -laarze ónger ziene badjas aan. Wie hae op de meziek van D’n Uul in dae outfit nao ónger kwaam, wis ederein (behalve pap Hans, dae had ’t pas later in de gate) geliek waat d’r aan de handj waas. Hie en dao waerde ein träönke gelaote, ein ónvergaetelijk moment.
De krach van same
De sjpreuk ‘Same, is neet allein’ is teikenend veur de nuje prins. Al van jóngs aaf aan haet hae ’t samezeen en samewerke lere waardere, veural es teamsjpeler bie de hockey. Op de vraog of dae sjpreuk ’n döbbelzinnige beteikenis haet, antjwaord hae nae. Dae spjreuk kinse euveral op toepasse, of se noe as hockeyteam samesjpeels, as prinselik gezelsjap same dien rol vervöls of as D’n Uul same de vastelaovend oetdreugs, ’t dreijt d’r allemaol óm des se ’t same duis. Daobie pas det ouch perfek bie ’t jubeleijemmotto van dit jaor.
Traditie en perseunlijke beteikenis in de prinselijke attribute
’t Samezeen kump ouch trök in de hoesorde van Joost, wo ein silhouet van ‘t prinselijk gezelsjap opsjteit. Daonaeve zeen dao väöl traditionele elemente in verwerk. Zo is de ómtrek van ‘t aje Uulelogo van 1948 gebroek, aevenas de ról mit tekst oet 1937 en lettertypes van ’t logo oet ‘t jaor 1952 en ‘t 8x11jubeleijemlogo. De Remunjse skyline moog netuurlik ouch neet óntbraeke, en ómdet Joost vanoet toes nao de tilleviesietore kiek, sjteit dae dao ouch tösse
Ouch op ’t prinsekruuts is, in de geis van ‘t samezeen, ’t silhouet van ‘t prinselijk gezelsjap te vinje. Op de linkerkantj sjteit de Raod van 11 möts, ’t logo van Fysio Moves en ‘ne hockeysjtik. Rechts ’t logo van D’n Uul, ’t sjtadswaope van Remunj en netuurlik ‘8×11’. Om ’t aaf te make sjtaon óngeraan de veurletters van Dimfy en Feline. ’t Bezónjere aan dit prinsekruuts is det ’t gelaserd is en vervolges mit de handj ingekleurd, ’n unieke aafwerking die toet noe toe nog nemes haet gehad.
Veur de prinselike sjteek is Joost mit Dimfy, Vors Dirk I en ziene adjudant Theo op ‘ne zaoterdig nao Korstenbroich gewaes. Nao get twiefels euver ’t sjtiksel kwaam de verkuiper mit get nuujts aan, det Joost medein aansjprook. ’t Sjtiksel róndóm de bandj is ’t zelfde as det van de Raod van 11 sjteek, maar waat de prinsesjteek angers maak, is det de punt nao veur sjteit in plaats van nao achter. Op de kantj van ’t Uulelogo sjteit ouch nog ‘8×11’ in góldj gesjtik. Ouch de óngertösse gankbare driekleur van vastelaovend rood, gael en greun kump trök in ziene sjteek.
De hoesorde van Sjtadsprins Joost I is op zien verzeuk sjpesjaal ontworpe door Dave Janssen. Dave is gebaore in Remunj mér inmiddels woonachtig in Hilversum. Hae is geine onbekinde bie Sjtadsvastelaovesvereniging D’n Uul. Dave is in 1993 jeugprins gewaes van de Sjnapsnaze, toen dit nog ein apaarte vereiniging waas. In ‘t jaor 1994 is hae adjedant gewaes van Aad Sjtadsjeugprins Joep Willems.
Mit zoväöl tradiesie in zien hoesorde, prinsekruuts en sjteek sjtraolt de nuje dus ouch oet wo ’t dit jubeleijemjaor allemaol om dreijt: verbinjing.
Vastelaovend same
Op de vraog wo hae ’t meis nao oetkiek dit sezoen, mót Joost aeve naodinke. Mit de Raod haet hae al van ’t ganse verke gevraete, maar as prins belaefs se alles vanoet ’n gans anger perspectief. De Nach van de Nuje is netuurlijk ’n hoogtepunt– nao al die maonje van veurbereijinge moog hae zich dan eindelik offiesjeel prizzentere. Ouch ‘t jubeleijemweekend waert zeker sjiek, mer det is veural ‘n vereinigingsaangelaegenheid. De optoch zal extra sjpesjaal zeen, want as prins sjteise dan net get hoger as mit de raod.
Mer dan sjuut ‘m nog get te binne. Waat hae ’t allersjiekste vinjt is as d’r mit de ganse vereiniging – jonk en aad – same waert oetgetrokke. Mit twee vol bösse op paad, en as se dan örges binnekums, kump d’r ech get binne. De zale zeen dan te klein, de miense weite neet waat ze mitmake en d’r waerd gekeke van: “kómme d’r noe nóg meer Uule binne?”. Det gezègkde van verbinjing, van samezeen, maak de vastelaovend veur Joost bezónjer. Ein dink is dus zeker: mit vereiningsmiens Joost as prins make v’r d’r dit jaor same eine ónvergaetelike vastelaovend van. Want same, is neet allein!
Claire Lambriex
