Prins Jules I

De jeug haet de toekóms…

en dreug dit jaor de scepter en twee vaere:

JULES I BREUER
Prins van Sjtadsvastelaovesvereniging D’n Uul

 

‘NE JÓNGE UUL HAET DE VAERE RECH OP ‘T KÖPKE’

Mit ‘ne prins van sjlechts 23 jaor en ’t jóngste prinselike gezelsjap van D’n Uul ooit, weijt d’r letterlik en figuurlik eine frisse windj door de vereiniging.

Zien doel dit jaor: de jeug vólop betrekke bie D’n Uul. Tradisie beware, maar mit allebei de bein in ’t hie en noe. Same mit zien beste jeugvrunj en zien broor geit hae dees missie aan. Drie van de veer zeen al ins aktief gewaes bie de jeug van D’n Uul, allemaol mit ’n kloppend hert veur vastelaovend. Jóngk, enthousias en ‘n tikkelke rebels: dit belaof ein bezunjer sezoen te waere.

Alwéér verassingseffek bie ‘t interview

Naodet ich veurig jaor al gans verras waas doordet mien eige sjoonbroor bie ’t interview versjeen, waas ’t dit jaor wéér raak. Ich bel aan bie de lokasie en eine jónge jóng duit de deur aope. “Det zal waal de zoon van zeen”, dink ich nog. Ich loup nao binne, kiek om den hook… en zeen dao drie nóg jónger mansluuj zitten. Zól dit dan toch ’t nuje prinselik gezelsjap zeen? Op de vraog waem van de here prins geit waere, sjtik Jules Breuer (23) zien handj op. Nondeju! Ich kin mich neet herinnere det D’n Uul oojt zónne jónge prins haet gehad. Maar good, bliekbaar begint ’t verassingseffek bie ’t interview inmiddels ein nuuj tradisie te waere. En eerlijk is eerlijk: zónne jónge prins pas eigelik waal bie ’t idee van ‘ne frisse windj door de vereiniging, zeker nao zo’n jubileijemjaor vol tradisie. En zo, nog lich verbouwereerd, beginne veer aan oos gesjprek.

Brak bie de vlaai

Al flot bliek det ’t gezelsjap neet allein jóngk is, maar det ’t Remunjs plat d’r ouch neet bie ederein good in zit. ’n Doos mit flaai waert op taofel gezat. “Wils se kroemele mit pudding?” vreug ein van de jónges. Wo op Jules hem geliek verbaetert “gräömelkes zóls se bedoele”. Twee van de adjudante zeen ’t Remunjs nog aan ’t lere, maar de prins zit d’r sjtrak baovenop. Det belaof get. Waat ouch drek opvélt: zie zitte d’r sjtök veur sjtök mit get klein uigskes bie. De aovend d’r veur waas d’r nog ein euverlik gewaes mit de PKBK, Vors Dirk I en Theo, en det waas oeteraard neet bie ’n glaas water gebleve. “Veer vónje ’t eigelik ouch waal lollig om get brak bie ’t interview te versjiene”, grap ein van de jónges. Sjtudentikozer kin bienao neet.Net as veurig jaor kóste veer get vraoge die ich had veurbereid geliek euversjlaon. Det deze jónge prins neet getrouwd is en gein kienjer haet, kós ich mich namelijk zónger naovraoge waal veursjtelle.

Remunj, rechte en regere

Jules is eine echte Remunjse jóng: gebaore en getaoge, en nog altied woonechtig bie zien elders op ’t Hammerveldj. Mit zien 23 jaor en drie maondj op de daag van zien oetrope geit hae de beuk in es de jóngste Sjtadsprins van Remunj. Daomit pak hae dae titel aaf van aad-Sjtadsprins Maurice I Zwanenberg, dae destieds drie maondj ajer waas. Jules is bezig mit de sjtudie rechtsgeleerdheid. Ómdet hae aafgeloupe jaor neet alle vakke van de pré-master in Mesjtreech haet gehaold, mót hae dit jaor ein aantal vakke via de Aope Universiteit inhaole. Det is gein fulltime bezigheid, dus zo hilt hae genóg tied euver om dit jaor es veurgenger van D’n Uul te regere. Zien biebaan es Chef Servicebalie bie de Albert Heijn aan de Godsweerdersingel zal daodoor de kómmende waeke waarsjienlijk ouch op ’n leger pitje kómme te sjtaon. Volgend jaor haop hae de master in Mesjtreech op te pakke. Welke richting det persies waert wit hae nog neet, maar privaatrecht kint hae zich good veursjtelle. Daonao lónk mesjiens de hele waereld van de advocatuur, al is det veur noe nog toekómsmeziek. Det hae tiedes zien sjtudie in Remunj is blieve wone, besjrief hae als ’n heel bewuste keuze. Hae haet geine sjterke drang om weg te gaon. “’t is hie geweun fijn,”zaet hae “en zeker in de zomer, mit al det water, is ’t fantastisch.” Natuurlijk witse nooit waat de toekóms brink, maar los van mesjiens nog efkes op kamers gaon zuut hae zichzelf neet oet Remunj weggaon.

Remunjs nes

Ouch zien elders zeen echte Remunjenere. Moder Marie-Anne van der Woning en vader Hans Breuer zeen hie ouch gebaore en opgegreujd en al “eine hele lange tied” gelökkig same. Marie-Anne zölle vaol miense kinne van de Polkadots, wo zie al jaore in zingk en optreujt. Zie werk bie de Gemeinte Remunj op ’t Klanten Contact Center (KCC) en is daonaeve ouch trouwambteneer. Jaorelangk waas zie daobie actief bie D’n Uul, veural bie de kienjermiddig dae zie ouch mit Iris van Ginkel regisseerde. Gein wónjer det dus ouch Jules en broor Luca Breuer (27) dao as kienjer regelmaotig aan mitdeje. Vastelaovend zit bie Marie-Anne sowieso in ’t blood. Zo trek zie ouch róndj mit de groep “De Aandujers”, mit vastelaovend herkinbaar aan häör felraoze pekskes.

Dae groep maak mit de vastelaovend ’n kómpleet program, trekke d’r same op oet, bezeuke allerlei evenemente en sjuve ouch gezellig same aan taofel aan. Aanduje dus – letterlijk en figuurlik. Vader Hans is Supply Chain Planner biej Stryker. Hae ging vreuger altied mit zien elders op wintjersjport mit de vastelaovend. Toch ging ouch hae later geregeld mit de Aandujers mit. Det ziene zoon dit jaor prins moog waere, vinjt hae fantastisch, omdet hae wit wie väöl plezeer Jules dao in zal höbbe.

Van kleine adjudant toet “grote” Sjtadsprins

In 2013 waas Jules al in ‘n bezunjere rol betrokke bie D’n Uul. Hae waas toen adjudant van toenmalig Sjtadsjeugprins Damiaan I Bertrams (23). Dit jaor zeen de rolle ómgedrejd. Mennigein herinnert zich Jules mesjiens nog es det klein blóndj jungske in ziene smoking, mit ’t rood-gael-greune sjtrikske, dae naeve de jeugprins op de buun sjting. Hae vertelt det hae bie de sjolefestasie destieds ein saort lóchdrökkenon kreeg om sfeer te maken, maar omdet hae zo klein waas, veel hae door de drök daovan bienao achtereuver. Zo lich wie ei vaerke, det kleine adjudantje. Ouch adjudant Rutger Geurtz (23) haet ein jeugverleje bie D’n Uul. Hae waas in 2014 adjudant van toenmalig Sjtadsjeugprins Sem I van Atteveld. Dees jónges weite dus al wie ’t d’r bie ein prinselik gezelsjap bie D’n Uul aan toe geit. Optrekke mit de Sjtadsprins en zien adjudante waas veur de jónges destieds ’t allersjiekste. Dae sjpesjale bandj is häör altied biegebleve en haope zie dit jaor ouch mit ’t jeugprinselijk gezelsjap te kinne deile. Nog altied bezeuke de drie here eder jaor op vastelaovesdinsdaag ’t aaftraeje van de Sjtadsjeugprins in ’t Witte Kirkse. Dao waert de jeugprins nao zien aaftraeje door ‘ne groep aad-jeugprinse de zaal oet gedrage. Det blief ein sjpesjaal moment, wo ouch väöl aaj bekinde weer bie-einkómme. Jules en Rutger waere dao aaf en toe waal get sjeif aangekeke as aad adjudante, maar det moog ‘t plezeer neet drökke.

De vraog der vraoge

Vlak veur de zomervakantie waerde Jules gebeld door Hein Jambroers. Dae vertelde ‘m det ze zien moder gaer ins in ’t zunke zólle wille zitte en ‘m dao euver wólle sjpraeke. Op zich gein ónlogisch verhaol, ómdet zien moder jaorelank aktief is gewaes bie de kienjermiddig en mit de Polkadots natuurlijk ‘n bekind gezich is in de Remunjse vastelaovend. Hae mós zich melje bie ’t Arresthoes. Det vonj hae al ’n bietje verdach, want hae herinnerde zich nog maar al te good det Joost I veurig jaor via persies dezelfde route waerde binnegehengeld. Toch dach hae “laot maar gaon, gank maar dae kantj op en dan zeen veer waal”. Wie hae binnekwaam en dao de hele PKBK en Vors Dirk I zoog zitte, wis hae eigelik al genóg. “Volges mich geit dit neet euver mien moder…” Wie de vraog waerde gesjteld, antjwaorde hae vriewaal metein det hae det heel gaer zól wille, maar allein es zien twee beste vrunj van vreuger zólle toezegke óm adjudant te waere. Det waas nog efkes sjpannend, ómdet zie allewiel neet meer in Remunj wone en hae daoróm neet kós insjatte of zie det zólle doon. Toch twiefelde Jules dao neet aan: dit mót ’t waere, mit dit drietal of helemaol neet. Vreuger hadde zie ’t d’r namelik al dökker euver gehad, wie geweldig ’t zól zeen om ooit same ’n spesjaal rol te vervölle mit de vastelaovend.

Einmaol toes belde Jules zien vrunj geliek op. Rutger en ouch Damiaan veulde geliek de magie van dae jóngesdruim dae inins mesjiens waal werkelikheid zól waere. Wiewaal zie zich vereerd veulde, wiste ze ouch det ’t organisatories bes ein oetdaging kós waere. Toch kwaam al flot positief antjwaord van allebei, en zo sjting ‘t trio vas. Broor Luca maakde ’t gezelsjap later kómpleet. In eerste instansie wól hae zien breurke veural vanaaf de ziejlien sjteune, ’t waas tensjlotte de jongesdruim van hem en zien vrunj. Maar veur Jules heurde zien broor d’r geweun bie. En zo waerde hae toch nog euvergehaold: es vaste krach in ’t gezelsjap zal hae d’r altied bie zeen, ouch wanneer ’t bie die anger twee vanwaege de aafsjtandj ins neet zól moge lökke.

De drie aan zien zie

De grote broor van de prins is Luca Breuer. Hae werk bie Coldstore Van der Vaart in Ittervoort, wo opsjlaag en transport veur bedrieve waert verzorg. Wiewaal hae nooit offiesjeel bie D’n Uul betrokke is gewaes, behalve dan bie de kienjermiddaag, haet ouch hae al ‘n prinseervaring. Hae waas namelik oojt prins op basissjool Aan de Roer. Op de vraog wie de bandj tösse de twee breurs is, kiek Jules ziene grote broor aan veur ’t antjwaord. Netuurlik höbbe de twee zich vreuger aaf en toe gesjtraeveld, maar de bandj is altied good gewaes. Sinds begin 2025 woont Luca op zichzellef in de sjtad, maar kump nog regelmaotig nao hoes. Det vinjt hae altied gezelllig, al haet zien breurke inmiddels de grótste kamer van ’t hoes weite te veruivere.

Damiaan Bertrams kint Jules al vanaaf groep 3. Hae is bezig mit zien minor econometrie in Amsterdam as ongerdeil van zien sjtudie besjtuurskunde in Leiden. Omdet hae oojt in Delft is begós mit sjtudere, wóont hae nog altied dao. Hae is op ’t moment betrokke bie ’t projek Hydromotion, wobie sjtudente werke aan ‘ne boot dae waert aangedreve door vloejbare watersjtóf. In 2013 waas hae jeugprins van D’n Uul ónger de sjpreuk “Vleeg hoog, alles moog”. Destied wól hae nog piloot waere. Zien aajers wone achter de Kepel in Remunj, wo haer tiedes ’t seizoen weer regelmaotig zal kómme logere. Det zal efkes winne zeen… Binne ’t gezelsjap is hae veural de organisatorische krach en vervult de rol van de regelnaef.

Adjudant Rutger Geurtz kump oet ’n ech uulenés. Zien vader is aad Sjtadsprins Roger I Geurtz, dae in 2014 tiedes ‘t 7×11 jubilejumjaor van D’n Uul Sjtadsprins waas. In detzellefde jaor waas Rutger adjudant van de Sjtadsjeugprins. Hae haet HBO fashion Business gesjtudeerd. Nao zien sjtudie wól Rutger zich gaer meer verdepe in de finansjele kantj van de bedriefsveuring. Hae werk en sjudeert daoróm momenteel bie ’n accountancy kantoor in Amsterdam. Zien vriendin Nina oet Utrecht haet planne óm een eige winkel te aopene in Utrecht. Daodoor is nog neet dudelijk wo zie zich zólle gaon settele, al haop hae netuurlijk sjtiekem det det in Remunj zal zeen. Gezeen ziene achtergrondj is ’t bienao vanzelfsjpraekend det hae binnen ’t gezelsjap de rol as centefoekser zal vervulle. Daobie is hae ‘gecertificeerd schoen- en jeansadviseur’, dus ouch aan sjtieladvies gein gebrek dit sezoen. Zien elders wonen in Roer-Zuid, lekker deunbie de sjtad, dus ouch hae zal dao de kómmende tied regelmaotig te vinje zeen.

Leefde tösse Remunj en Nijmege

Jules haet sins drie jaor ein relasie mit Sara Nusselder (23). Zie sjtudeert genaeskunde in Nijmege en woont dao op kamers, maar is in de wiekende dök in Remunj te vinje. Henjig veur Jules, dae gein sjtudente OV meer haet en ouch neet altied zin haet om twintjig euro veur ein inkel kaertje neer te telle óm vervolges mit de boemeltrein van Arriva in eder gehuch tösse Remunj en Nijmege te sjtoppe. Me mót get euverhöbbe veur de leefde… Sara is neet ech ‘ne vastelaovesvierder, omdet zie normaalgesjpraoke tiedes de vastelaovend mit häör femilie op wintjersjport geit. Zie sjrók dus ouch waal efkes van de väöle aafsjpraoke en verplichtinge die bie ’t prinssjap komme kieke, maar vinjt ’t gelökkig waal hartsjtikke leuk det Jules prins waert. Zie vonj ’t geheim haje mesjiens nog waal lestiger dan de prins zellef “De miense móste ins weite waat ich weit euver dich.“ zag ’t as se same door de sjtad lepe. De skivekansie van de sjoonfemilie róndj aad op nuuj waert dit jaor get ingekort, zodet ouch zie d’r mit de Nach van de Nuje bie kinne zeen en Jules tradisiegetroew mit zien maedje kint danse. Neet ederein van ’t gezelsjap haet ziene danspartner trouwes al gevonje. Damiaan en Luca zólle veur (of tiedes) de Nach nog efkes op zeuk mótte. Maar mit alle aandach dae dit sezoen ongetwiefeld loskump róndj ’t prinselijk gezelsjap, zal det vas goodkomme.

 

Van tentames toet gesjeurde kruutsbenj

In de loup van ’t gesjprek kom ich d’r achter det de nuje prins aaf en toe get onhenjig bliek te zeen. Zien colleges aan de Aope Universiteit zeen veural online te volge, maar de tentames mótte netuurlik örges fysiek gemaak waere. Omdet Jules get te laat waas mit insjrieve, mós hae veur ein van zien tentames nao Antwerpe aafreize. Dao kwaam hae d’r achter det ze in Belsj ein anger toetstebord gebroeke. Det is toch nét efkes onhenjig bie ‘n tentame mit aope vraoge. Ouch op sjportief vlak kump hae d’r neet altied zónger kleijersjeure vanaaf. Mit ‘ne vrunjegroep begóste zie oojt veur de lol ‘n vrunjeteam bie SHH. Toetdet zie innins éch op zóndaagmorge op ’t veltj sjtinge en ’t dus gein lolletje meer waas. ’t Team bestjing oet eine goie mix: ‘e paar jonges die ech good kóste voetballe, en ‘e paar die d’r ech nieks van kóste. Jules heurde bie de leste kattegerie. Op ‘ne brakke zondaag zoot hae dan ouch regelmaotig tevreje oppe bank. “Mót ich d’r aan ’t inj van de wedsjtried nog efkes vief minute in? Is good!” Helaas sjeurde hae bie ein van die wedstrieje ziene veurste kruutsbandj, wodoor ’t voetballe veurluipig effe verleje tied is. De operasie sjtelt hae in eder geval oet tot nao de vastelaovend. Veur noe kint hae gelökkig nog bienao alles: hae is get aan ‘t “gymme” en sjpeelt ouch aaf en toe get padel. Mit zien achtergróndj es tennisser, det hae meer es teen jaor gedoan haet, ligk ‘m det good. Get extra traine kump troewes ouch good van pas mit al det sjpringe en zjweije mit de scepter. Gehockeyd haet de prins zellef noojt, maar zien vrunj Damiaan en Rutger des te fanatieker. Zo kwaam Jules oeteindelik mit Rutger in kóntak dae bie Damiaan in ’t team zoot. Mit z’n drieje zeen zie oojt bie ’t hockeytoernooj Hockeyloverz gewaes. Wiewaal Jules zelf neet hockeyde, waerde hae toch mitgesjleurd omdet ’t team van Damiaan en Rutger nog miense tekort kwaam. Zie sjlepe toen mit zien drieje in ein tent en hele oeteindelijk weinig herinneringe aan hockey euver maar veural aan ’t feeste dao. Vanaaf dae tied neump ’t drietal zich de HockeyGirls.

Tradisie mit ’n rendje

Ein dink det veur de prins en zien gevolg dit sezoen heel belangriek is, is ’t verbinje van jóngk en aad: vernujing bringe, zónger de tradisies oet ’t oug te verlere. Veural ’t optrekke mit de jeug van de vereiniging is get wo zie erg nao oetkieke. De meiste volwassene binne D’n Uul zeen ein sjtök ajer as de jónges. In den aanloup nao ’t sezoen höbbe zie aevel al gemerk, det juus dae mix heel leuk kint zeen. Zo waas ’t tradisjonele oetsjtepke nao Düsseldorf mit de PKBK, Vors Dirk I en Theo medein eine gojeiesbraeker. Aaf en toe kint det netuurlik ouch waal boetse, esse es jónge man nét get meer wils as volges de regels moog. Maar mesjiens is ’t ouch neet verkeerd óm aaj regels ‘ns oet te dage. Zo vertelle zie ouch det de meininge euver of ‘ne prins van D’n Uul ’n eige leedje kint make en zinge verdeild zeen. Of det oeteindelik dit jaor geit gebeure, haje de here nog efkes veur zich. Nog aeve aafwachte dus. Waat waal al vassjteit, is det ’t gezelsjap zich in zal zitte om de zichbaarheid van D’n Uul bie de jeug te verhoge. Zo höbbe zie ’n mediaplan opgesjteld om de socials van D’n Uul aantrekkelikker te make veur häör laeftiedsgenote. Daonaeve wille zie ouch in de sjtad dökker plekke bezeuke wo väöl jongere kómme. Zo haope zie ‘n brök te kinne sjlaon tösse jóngk en aad en zo tradisie mit vernujing te verbinje.

Klassiek mit eine frisse twist

De sjpreuk van Jules geit d’r euver det jóng jónges die toet laat op sjtap zeen sjmorges nog de vaere rech op ’t köpke höbbe stjaon. ’t Waord “rech” in dae sjpreuk haet ein döbbele beteikenis, wobie zien rechtestjudie subtiel trökkump. Dao haet hae same mit zien mooder lang euver naogedacht, zo lang det dae sjpreuk bepaold neet kort is gewaore. De hoesorde leut ‘ne jónge uul zeen mit de vaere rech oppe kop. ’t Is ein óntwerp in zilverglans, gans chroom, mit ingegraveerde letters. Geinspireerd op de hoesordes van aadprinse Herm I en Roger I, daezellefde zilverglans hadde, get waat Jules altied erg sjiek vonj. Veur ’t gemaak waert de hoesorde troewes neet opgepind, maar as broche opgesjtaoke. Zo zuus se maar: de jeug dink gaer prakties. Ouch de möts van Jules leut ein combinasie zeen van klassiek en vernujing. ’t Óntwerp is tradisiejoneel, mit blauwe, witte en golje kleure en biepassende sjtein. Gein rood, gael en greun deze keer. De golje tierelantijne en de witte bandj gaeve d’r net dae frisse twist aan. Op ’t prinsekruuts van Jules kump opnuuj ’t sjtökske rechte trök doordet Vrouwe Justitia dao op sjteit. Verder stjaon dao ouch de initiale van alle here op, net as de letters HG, kort veur HockeyGirls.  Ouch ontbraeke ’t tennisracket, as ode aan Jules aaj hobby,en ’t logo van Ajax neet.

Mit kloppend hert nao de vastelaovend

Vastelaovend viere Jules, Damiaan en Rutger eigenlijk altied same. Alle daag, euveral, zo väöl meugelik. Luca loupe ze dan euveral en nörges taege ’t lief. Waat det betruf zal d’r dit jaor mit de vastelaovend weinig verangere, allein drage ze noe get meer verantjwaording. Neet veur nieks haet de moder van Jules ‘m dus nog op ’t hert gedrök det hae ’t dit jaor mesjiens get röstiger aan mót doon mit de drank. Hae mót tensjlotte ouch nog get zegke as prins. Wie deunderbie ’t sezoen kump, wie sjpannender ’t begint te waere. Zeker ’t grote moment op de sjtasiefestasie hilt Jules bezig. Veur 18.000 man op ein vol sjtasieplein sjtaon, mit alle ouge op dich gerich, det geit dich neet in de kaaj kleijer zitte. Hartsjtikke sjoon, maar zeker sjpannend. En dan te bedinke det Jules ein waek veur de vastelaovend ouch nog geweun ein tentame op de plenning haet sjtaon. Ouch det heurt d’r bie es jónge prins. Wo hae kómmend sezoen ’t meis nao oetkiek, is ‘t optrekke mit de jeugprins en de jeug. Oojt sjting hae dao zelf as jungske, en noe moog hae aan de angere kantj sjtaon. Hae herinnert zich ’t spesjale kleijkamermoment vlak veur ’t oetrope van zien rol bie de jeug nog heel good. Dit jaor zal hae det mit zien adjudante opnuuj belaeve, en nog eine leste keer dinke: noe geit ’t ech beginne. Mit de vaere rech op ’t köpke en eine frisse blik veuroet. De jeug is aan zat.

Claire Lambriex