Prins Stefan 1

Stefan I
‘Waat ein gelök, veer zeen ós dök’

Stefan I Cox is de Sjtadsvastelaovesprins in 2016. Wiewaal wonend in Häör is d’r ‘ne echte Remunjeneer, gebaore in ’t Lerang, oet Leve. Zien wederhelf Corine van Kemenade, wo d’r op aswoonsdig 2 keer 11 jaor mit getrouwd is, kump ouch oet Remunj. Weer ‘n ech Remunjs sjtèl det mit Vastelaovend altied op joets is. Aafgeloupe jaor waar Stefan nog adjudant bie Bacchus, wie flot kint ‘n vastelaovescarrière gaon? Veer gaon ‘m dök zeen en det is gelök höbbe want Stefan is ‘ne enthousiaste Prins dae van e good glaas beer hilt en det veural al moelend mit ós same wilt drinke. Proos op Stefan I wie dökker wie lever!

Getrouwd mit Corine Kemenade
Kienjer: Claire en Jules

Remunjse jóng oet Häör
De deur geit al aope veurdet ich de sjtoep op loup: de nuje prins sjteit breidlachend in de deur veur mich. Ich begriep ’t medein: hie sjteit de nuje Prins dae neet wachte kint toet de eerste zaoterdig van ’t nuuj jaor, ’t moment det alle Vastelaovesgekke ‘m op henj gaon drage.
Oze Sjtadsprins van 2016 is Stefan I Cox dae woont aan de angere kantj van de Maas in Häör, ‘ne Sjäöpskop, wiewaal opgegreujd in Leve es Tuinhagedis. Wèrke duit Stefan bie Sabic in de waereldsjtad Gelaen. Dao waere gróndjsjtóffe gemaak veur allerlei kunssjtóffe. Es sjef van de óngerhaadsaafdeiling mót hae dao alle gelejinge op ein lien kriege. Mit Corine, gebaore op de Venlosewaeg in Remunj, haet d’r ‘ne riekemanswins: dochter Claire, alweer 21 jaor, is kapster en verköp Diesel-kleijer in ’t outlet en Zoon Jules, dae 17 is, sjtudeert grafische vórmgaeving in Boxtel en is in 2011 al jeugprins gewaes bie de Sjäöpsköp: ‘in 2011 geit de vastelaovend vanzelluf’. Corine is CEO van oetgeverie de Cox Group en wèrk bie Marjon Snieders Sjoon in det sjiek pandj van Cillekens in de Neersjtraot. Let maar ins op wie gemekkelik ’t prinselik gezelsjap ‘door de vastelaovend’ löp.

Es Cowboy aan de kletskes beer
Stefan I is gebaore in ’t Lerang en greujde flot op in Leve. Nao de leger sjool, St Jozef, ging d’r metaaltechniek sjtudere in Zjwame op de LTS. ‘ne Prins dae de henj oet de moewe kint sjtaeke! En wie d’r via ’t MBO ‘alles’ waat mit iezer te make had inein kós fiespernulle, kwaam d’r dus terech in Gelaen bie Sabic.
Wie d’r nog op de leger sjool zoot, sjtóng d’r aan de handj bie mam (Elly Mackendas, jao, jao, femielie van Willems-Mackendas ‘de Sirk’) vastelaovend te viere. Es cowboy mit ‘ne zónnebril op óm op ‘ne sheriff te lieke. Hae rotzooide dan in Zjwame boete de kefee toetdet pap Sjac Cox, ‘ne kater, nao de waegbrök wól. Nao get kwatta repe, cola mit e rietje en sisi zoog Stefan mit get anger kwaojónges de kletskes beer sjtaon die ónger in de kaarttaofels sjtónge. Die ware zo laeg en nao 10 kletskes kreeg d’r ‘t 11de ‘klets(ke)’ van mam en sjlingerde hae zo ’t bed in. De volgende daag weer op en bie mam aan de schminktaofel wo Stefan helemaol nieks aan vónj. Det kump dit jaor good oet: Uule prinse blieve óngeschmink! Stefan bleef oetgaon in Remunj en det veural in de Veldjsjtraot en ’t Kelderke.

In dae tössetied ging hae ouch nog nao Pietje Moors óm dao te lere wie se e maedje netjes mós versiere mit e sjtevig denske. Ómdet Corine die fase in häör laeve haet euvergesjlage, krieg het noe dansles van Stefan. En det is good gegaon, want tiedes de äöpeningsdans nao ’t oetrope zjweefde ze same euver de vloer .

In eine taxi nao Remunj, mit twee nao Häör
De Veldsjtraotperiode waerde aafgesjlaote want Corine duujde Stefan de Allebenäör en de Amstel in óm ‘m daonao d’roet te mótte sjleipe. Es Stefan örges aan begint dan maak d’r ’t ouch aaf. Zo geit det ouch mit de vastelaovend. Edere daag same op joets, zo-es nao kuukskesmaondig en circus Willems, maar mit ‘t nao hoes gaon toch ein veur ein, Stefan is dan zo galant om Corine nao de taxi te bringe. ’t Kump dökker dan eine keer veur det Stefan d’rachter kump det hae ouch aan de hèk is, zodet d’r e keteerke later in dezelfde taxi zit dae euver de Maasbrök nao Häör riet.

Wie Hans IV mer bleef vraoge…
“Stefan vertèl ins wie ging det mit ’t vraoge?”
Stefan begint te glundere. Óngerhalf jaor geleje bön ich bie Nautilus en dao sjteit Hans IV veur mich. “Doe lieks mich gesjik es Sjtadsprins,” zaet dae. Ich dach ja jao, vang dich ‘ne baer, ich prins en drónk mie glaas beer laeg. Veer maondj later sjteit Hans IV weer veur mich bie de mansluujzitting van Nautilus. Ich waar óngertösse gepromoveerd toet adjudant van Bacchus Roland I en vónj ’t feeske helemaol geweldig. Hans begint weer euver ’t prinssjap: “Wie zóls se ’t vinje óm Sjtadsprins te waere van Remunj?”. Oei, dach ich en drónk zeve glazer beer achterein laeg aan de bar. (Gelökkig had ich mit Corine al euverlag veur ’t geval det ’t Hans meines waar.) Nog efkes mit twee veut oppe gróndj en es vanzelf leep Stefan op Hans aaf: “ich doon ‘t”.
Wie (miene) Bacchus aafgeloupe jaor verzaope waerde, kwaam Hans weer op mich aaf. “Zèk Steef, ich höb dich get gevraog………..!?” Verder heurde ich nieks meer, ich koch mich ‘ne motor en veulde mich ‘ne prins oppe waeg. In september ging de telefoon: e bedrief veur inbraakpreventie wól mich ins get kómme vertèlle, want in Häör bös se minder veilig es se zóls dinke. ‘ne Plies belde aan (Jules Geraedts van de keuzekemissie is plies) en dao sjtapde ouch Tanja en Hans binne. Yes, hè hè dus toch! Hans, wo bleefs se al dae tied, dach ich en nog veur ze de jas oet hadde zag ich ’t nog maar ins: “ich doon ’t” En zo begós ’t echte sjpeel.
Van det sjpeel geneet Stefan mit vol teuge.

Maondigaovend prins en noe ‘n echte möts
In Häör is Stefan al ins prins gewaes en waal op vastelaovesmaondig. De prins van de Sjäöpsköp waar d’r op dae maondigaovend efkes helemaol klaor mit, gevolg: geine prins inne kefee. Det vónje Stefan en zien vrunj mer nieks en zo waerde Stefan geïnstalleerd es maondigaovendprins mit scepter, möts en al, zien adjudante deej d’r ‘ne sjmoking aan.
Noe haet d’r ‘n echte möts wo de kleure vanaaf sjpatte. ’t Rood, gael en greun van de vastelaovend waert óngersjteund door ’t Remunjse blauw en det allemaol op setien en floer. Dao ónger kómme dan zien witte haor te veursjien.

Bacchusclub
’t Waert e kórt sezoen want op 9 fibberwarie is alweer Bacchusverzoepe. Bacchus is altied ‘n belangrieke club gewaes veur oze veurgenger. Stefan zoot al bie de Bacchus wie Vicktor Adams, Wim Crijns en Jos Beckx de ker trokke. Daonao sjloog de Bacchus ‘n anger richting in en trok Stefan zich trök. Mer wie de Bacchusclub weer meer aansjloeting zóch bie de vastelaovend van Remunj waar Stefan weer d’rbie en det resulteerde in ’t adjudantsjap bie Roland I aafgeloupe jaor. In mesjiens waal de sjoonste pakke ‘ever’ leide Stefan mit Mario en Francois häöre Bacchus door e geweldig vastelaovessezoen mit es hoogtepunte de Sjtasiefestasie en ’t Bacchusverzoepe mit die geweldige vraog op ’t inj!

Waat ein gelök, veer zeen ós dök!
Stefan belaefde wie sjoon de Remunjse vastelaovend gevierd waert mit al die versjillende prinse, de óngerligkende vrundjsjappe en al die festiviteite.
Noe geit Stefan I zelf de ker trèkke ónger ziene liefsjpreuk ‘Waat ein gelök, veer zeen ós dök’.

Adjudante
Leon Suijlen (45)
Haorsjnieder bie Vasco 4711
Getrouwd mit Patricia Claessen
Kienjer: dochter Loïs en same mit Patricia zoon Morris

Harold Schaepkens (53)
ICT-er in de TV-tore, Tore-7
Samewonend mit Yvette Gijsen
Kienjer: döchter Vera en Mirthe

Sjefäör
Vasco ‘4711’ Campos
Haorsjnieder

Same mit Leon oprichter van de Flarusse en det 11 jaor volbrach.