“Wiej geit ‘t ?  Zo geit ‘t ! “

Nuuje Uuleprins Sybert I van Keeken (41) is eine “relasieknuiper”
“Vastelaovend mót pien doon, vastelaovend mós-se veule”

Biej van Keeken aan de Peereboom in Melick geis-se veur de lol nao ‘t huuske. Ouch es-se neet aan d’n dunne bös kins-se ’t dao oppe pot oerelangk oethaje. Want op de plee biej van Keeken kieks-se dich dien ouge oet. ’t Huuske hingk baordevol vastelaovesfotoos, allemaol printe van vastelaovesoptochte in zowaal Remunj es Melick. En op alle fotoos zuus-se sjitterende krejasies. Volges mich allemaol prieswinnende deilnames.“Klop,” zaet Sybert van Keeken, de “heer des huizes” en vanaaf noe baeter bekint es sjtadsprins Sybert I van D’n Uul. Ziene Dorslustige Hoogheid woont hiej same met zien vruike Ingrid (43), dochter Manon (12, zit oppe brögkklas van ’t Stedelijk Lyceum, is gek op ziene ponnie Dancer) en zoon Onno (10, leerling van groep 7 van basessjool De Achtbaan en Feyenoord-gek. Det lèste mos-se zeen as ein jeugzuunj). Verder rent d’r eine lestige keffer rondj wovan ich de naam neet ins wil weite.

Om ’t meis pienlikke nuujts mer metein weg te wirke: Sybert,Peter, Hubert, Marie van Keeken is 41 jaor geleje gebaore in……Gelaen, de zogenaamde waereldsjtad wo zien vader en moder ein drogiesteriej hadde, diej ze later in Melick verder dreve. Ja en dao zits-se dan mit dien good fetsoen en dien sjtreve óm allein in Remunj gebaore manskaerels oet te keze es prins van D’n Uul. ’t Sjprik in Sybert zien veurdeil det ’t ouch zien eerste vraog waas aan de prinsekeuzekemissie toen ze biej ‘m op de sjtoep sjtinge: ”Woróm eine in Melick wonende en in Gelaen gebaore jóng es sjtadsprins van Remunj?” Sybert, omdes dich de bèste, meist gesjikde kandidaat bös. Veer koste geine grotere vastelaovesgek vinje. En es d’r eine zien vastelaovesroets in Remunj haet ligke, dan is ’t Sybert van Keeken: hae duit al 26 (!) jaor mit aan d’n optoch, wint alle ereprieze met zien unieke oetmonsteringe. Sybert is neet meer weg te dinke in ’t sjpeel en óngetwiefeld ein grote aanwins. Trouwes ouch veur Melick, want in ’t riek van de Markoef sjittert hae mit vrouw en kienjer ouch in de optoch. Biej de van Keekens is alles döbbel: Melick en Remunj, al zal de biesjopssjtad dit jaor toch waal de veurkeur kriege.

Ein anger pluspunt van Syberts leefde veur Remunj: hae koos ein ech Remunjs maedje in 1985 toet zien vrouw naodet ze zich eerder hadde lere kinne oppe dansles biej Pietje Moors. Ingrid Evers, dochter van Jan Evers (de eerste prins in 1957 van de Plekplaosters in Baoksem) en Gerrie Teuwsen en nichske van Jo Hóndj. Gebaore ónger de Munsterbaog en buurmaedje van Onno de Bock, zien jeugleefde. (Zól Ingrid dae kleine daorom Onno geneump höbbe?)
De einensestigste Uuleprins is sowieso op Remunj gekonsentreerd: sins 1 november wirk Sybert d’r ouch. En waal biej Tom Loven Verenigde Bedrijven es kómmersjeel dirrektäör van Vastgoed Service Zuid BV, ein aafdeiling die zich bezig hilt mit óngerhaad aan geboewe.
En dan te bedinke det Sybert van hoes oet eigelik óngerwiezer is, “mer nooit veur de klas haet gesjtaon”, vertelt hae d’r flot biej. “Dao waas toendertied gein werk in ’t óngerwies wiej ich oet deens kwaam en dus waerde ich vertaegewoordiger in verwermingskaetels en kwaam daonao in de insjtallasiebransj terech”. Vanaaf 1997 zit Sybert in de boew, eers biej IBC in Gelaen, daonao biej Ruyters Vastgoed in Zittert en daonao biej IBC Heymans in Rosmalen.”Omdet ich de firma Loven al ein paar leuke projekte hat aafgejat, vónj Tom ’t tied mich biej Heymans weg te haole,” vertelt Sybert dae zichzellef omsjrief as “eine kontakteman, eine mienseman en eine relasieknuiper”. Neet veur nieks is d’r lid van Remunjse Zake, van de Rotaryklup Remunj, Maas en Roer, van de sjpónzerkemissie Cirque d’Hiver en van de Alliance van Hóngerd.
“Vastelaovend is veur mich ein oetlaotklep nao alle zakelik gedeuns. Vastelaovend is op een lollige meneer aajhore, de draaksjtaeke en van nieks get make. En neturelik mit väöl meziek.” Det lèste haet d’r in ’t blood, want Sybert sjrief al jaore de schlagers veur de Markoef en maak same met Jos Willems en Pierre van Elmpt eder jaor de Melickse Artieste Middaag (de MAM) in kefee De Sport. “Ich höb ein werrem hert veur de Melicker vastelaovend,” bekint hae.

En de Remunjse vastelaovend? Sybert: “Ich vinj D’n Uul ein sjieke vereniging. Ich haaj van de meneer wiej ze vastelaovend viere. Ich haaj van die sjoon Remunjse illemente in ’t fees” Sirk Willems, Kuukskesmaondaag, de sjitterende SjtasieFestatie, de Bacchusklup, ’t AAS en de APK en de Vrouwluujzitting. Mer ich mis de kienjeroptoch en veural de bónjte aovende, ’t gespraoke waord in de vastelaovend. Ich weit ouch det de Remunjse miense sjnakke nao die heerlikke aovende van vreuger.”

Sybert en Ingrid zitte pas ech op de spraeksjtool es ’t euver häör grótste leefde, d’n optoch geit. Dan zuus-se ze opbleuje. “’Eine maondj veur vastelaovend sjteit hiej dan edere daag ’t neijmesjien oppe taofel,”vertelt de prinses. Lachend herinnert ’t zich in waat veur krejasies Sybert allemaol haet rondjgeloupe. “Hat d’r beveurbeeld ein kómpleet terras omzich haergeboewt onger ’t motto : ”ich gaon ein terrasje pikke”. Haet d’r de ganse maondj óppe zölder geoefend toet det-t’r angerhalf oer kós sjtaon en loupe.
Ouch höb ich ‘m ins ein jaor de hele optoch oppe knieje laote kroepe. Ware veer pas getrouwd, ich verkleid as broed en ónger ’t motto: “Ich höb ‘m te graze!” Sybert: “Vastelaovend mót pien doon, vastelaovend mós-se veule. Det vinj ich ech. Zo höb ich ouch ins mitgeloupe in ein deepvreeskies. Ingrid leep naeve mich en dan vroog ich of ’t eine Jägermeister wilde. Allein as d’r ies- en ieskaat is, zag ’t danne en dan sjtapde ich oet die kies en goof ‘m de fles. Jao, jao, veer höbbe döks ‘t veurblaad van de gezette gehaold.

HANS II STRAUS

Perseneel van de prins

v.l.n.r. Paul de Vreese, Bart van Zijl, Rob Wester en de prins zellef

Prins Sybert l haet twee sjieke adjudante. Hoogswaarsjienlik ein aanwins veur ’t AAS. Óm te beginne is dao Paul de Vreese, 38 jaor, van beroep óngernaemer. Paul, gebaore en getaoge in Remunj, is getrouwd mit Lyan en greujtse pap van Loek en Liniek. ’t Gezin woont in Melick, vlakbiej ’t prinselik pelies.

Paul de Vreese, zoon van Lou de Vreese en Fransje Bak, det ein zöster is van óngerangere aad-Uule-prins Harrie Bak en vreuger döks same mit Lies Cillekens sjitterde in de bóntje aovende van D’n Uul. Paul is trouwes ’t paetekiendj van dae onvergaetelikke Pietje Bak, mit-oprichter van ‘t AAS en achternaef van aad-Uuleprins Jo Leenhouts. Paul zien broor Laurens waas ein paar jaor geleje nog prins van de Kaketoes aan de Kepel.
De angere adjudant is Bart van Zijl, 37 jaor, getrouwd mit Susan en vader van Shirley (6). Ze wone in Lin, mer Bart is eine rasechte Remunjse jong van de Dr. Leurssjraot. Hae waas de benjamin in ein gezin van 10 kienjer.

Bart van Zijl is sins angerhallef jaor rajondirrektäör van de ING-bank. Biej die ING bank leerde hae ’t vak van óngerangere aad-Uuleprins Hans I Geurts. Bart sjpeelde vreuger biej ’t Ketoene Dörp en waas al jóngk bevrundj mit Paul de Vreese. Hae is sjportief, leep in 2000 nog de marreton van New York en löp zich vanaaf noe de bein ónger de vot oet veur ziene prins.

As sjefäör/regelmeister koos prins Sybert I de vriejgezel(lige) Rob Wester, 51 jaor jónk. Rob is havemeister biej Marina Oolderhuuske, zodet ‘t prinselik gezelsjap neet bang hoof te zeen veur hoog water.