Sjtadsprins Rob II Schaepkens  2006

” in Sjaopsnaam… Aangenaam “

Rob Schaepkens (46) is de 63ste “Ich bön eine geëmansiepeerde prins, laot mien vrouw vriej mit die daag!

Höbbe de Sjieneze ’t “Jaor van de Aap”, biej D’n Uul viere ze vanaaf noe toet 1 jannewarie 2007  “’t Jaor van ’t Sjaop”

Neet ómdet Ziene Dorslustige Hoogheid oet ’t riek van de Sjaopsköp oet Häör kump, maar vanwaege ’t feit det de nuje Sjtadsprins van D’n Uul de naam
Rob Schaepkens dreug. En ze zólle ’t weite in Remunj det d’r eine van Schaepkens Prins is gewaore: ’t gans vastelaovessezoen sjteit in ’t teike van ’t Sjaop, de ganse sjtiel waert Sjaop-egtig. Wobiej ’t Prinselik gezelsjap d’r vanoet geit det de wieze Uul daomit euverwaeg kint!

Net es zien veurgengers Sybert van Keeken (Melick) en Sjra Puts (Zjwame) haet de 63ste Uuleprins zien boeteverblief euver de Uulegrens: in Zjwame. Dao woont t’r en dao wirk d’r. Uule-veurzitter Rob Pollen: “De keus veur Rob Schaepkens oet Zjwame is ein bewuste keus in verbandj mit de aansjtaonde herindeiling. Zo höbbe veer de luuj oet Zjwame drek op oos handj.” Prins Rob II moog dan aevel in Zjwame wone, hae is eine meer es rasechte Uul. Rob is gebaore oppe Aje Boelevaar (Willem II Singel), persies taegeneuver – toendertied – dokter Bär en de Kweeksjool, wo noe de rechbank sjteit. Rob zien gebaortehoes sjtóng op nómmer 82, tösse fotegraaf Joep Korfmacher en Blomisteriej van Kessel in. Zien vader Chrit had hiej dameskapselon “Chretien”. In dit hoes waerde Rob 46 jaor geleje op vastelaovesvriedaag 24 fibberwarie gebaore. Rob: “Jaozeker, vlakbiej de Amstel Club, mien sjtamkroeg. Manne, miene jas waas vreuger aan eine kantj ram kaal vanwaege ’t sjravele naeve de moer mit nao hoesgaon”. Rob ging in Remunj nao ’t Klein Kelezje en de Lindanus-ulo. De nuje prins haet nog ein zöster Marielle det in Herte woont. Zien elders laeve nog, zeen allebei in de tachetig en wone nog altied zellefsjtenjig op ein flet in de Aoliesjlaegerssjtraot.

Prins Rob is al biejnao 12,5 jaor getrouwd mit Pea – ein aafkórting van Petronella, ’t had dus ouch Nelke kinne heite – Janssen. Ze höbbe twee kiendjes: zoon Lando van 10 en dochter Lana van 8, die allebei in Remunj zeen gebaore, want Rob en Pea höbbe vreuger in de Robert Regoutsjtraot gewoond. Vanaaf ’97 wone ze pas in Zjwame. In Zjwame oppe Bóssjtraot sjteit ouch Rob zien bedrief: autohanjel ABS. Dit bedrief haet t’r in 1999 euvergenaome. Veural de leste jaore haet Rob väöl suukses mit zien zellef bedach “Car-Search”- siesteem wobiej hae veur de klantj in ’t gans landj de iediejale wage zeuk. Remunjse miense en van ver daoboete kinne Rob Schaepkens oet de autowaereld. Dao zitter ouch al vanaf 1977 in: hae begós biej Veith Benj in Remunj en ging daonao nao Graasj Lambert Geelen in Melick, in 1982 haolde Leon Engelen ‘m nao de Renault-graasj, daonao wirkde hae biej Rijks op ’t Zjwartbrook en in 1992 waerde hae op de daag van de aerdbeving door Jos Engelen zaligger es verkoupleijer weer nao de Renault-geraasj trökgehaold. Toen Engelen verkoch waerde, kwaam Rob 7 jaor langk es bedriefsdirrektäör in deens van Pons Autohanjel op Spikkerhoven. Dao nao vónj d’r ’t in 1999 tied ins veur zichzellef te beginne. Rob is troewens de eerste óm toe te gaeve det de zakes veural zo good loupe omdet zien vruike Pea de fienansiejele kantj in de gater hilt. De Prins en de Prinses kinne zich al heel lang. Naodet ze zich leerde kinne biej Rinus in Le Journal, wo Rob same mit zien vrunj friedaags meistetied de kroegetoch begint, trouwde de twee op 17 september 1993 in ….Las Vegas in de Steets. “Veer wolle ins get angers. ’t Touwe waerde gedaon in ein kepelke wo ouch de aktriese Whoopi Goldberg en de zenger Barry White zeen getrouwd. Aevel die zeen mesjiens al gesjeije?” Terwiel Pea zich veural bezig hilt mit de kienjer en ’t vee – hondj Mazzel, twee katte en eine ponnie – duit Rob nao ’t werk nog waal ins te vollieje biej Net-In of S’62.

Vanaaf wanneer wit-se det-se prins waers? Rob : ”De Prinsekeuzekemissie van D’n Uul sjting op 1 september biej mich in de zaak. Later höb ich de aansjtaonde Vors Sybert op eine blootheite daag nog de Beegderhei in gelok en mich dao aan ‘m veurgesjteld. Ich had dit noojts meer verwach, dach det ich te aad zól zeen. Nae dus. Ja en toen hoofde ich neet lang nao te dinke. Veur eine Remunjse jóng is dit toch ’t sjoonste waat ’t guf ?

Ich bön eine gebaore Uul, altied eine vastelaovesgek gewaes. ’t Liek mich fantasties. Wie zo? Nou, perbere dien plezeer euver te bringe op angere. ’t Sjpeel in al zien óngerdeile mitmake. Vreuger höb ich van alles gedaon veur de techniese kemissie, höb döks mitgedaon aan de bóntje aovende, väöl optochte mitgeloupe mit Wallie van Gils en vief keer op eine middag, altied in eine angere wage, naeve de Amstel Club gereje. Man, as ich draan dink krieg ich weer de kriebels…”Waat is veur Prins Rob II vastelaovend? “Eine ganse houp lol make. Väöl sjaele kal verkoupe, väöl aajhore, mit of zónger maske. En heel väöl van kroeg nao kroeg trekke. Ich sjpits mich op alles waat op mich aafkump. Bön sjiet-zenewechtig veur de “Nach”, aevel vinj ’t ouch weer zalig. Eigelik liek mich ’t pergram veuraaf ’t sjoonste. Dao kin-se van genete, terwiel se oppe vastelaovesdaag zellef gelaef waers, die vlege veurbiej, dink ich. Nae, ich vinj ’t veursjpel ’t leukste”. Zien vrouw: “Vinj ich ouch!” En Pea, wie vinjs doe ’t det diene man Prins is? “Veur Rob vinj ich ’t sjitterend. Ich weit wiej gaer hae ’t duit. En ich bön d’r van euvertuug det hae ’t good duit. Zellef bön ich neet zonne vastelaovendvierder, ich drink gaaroet nieks en zal neet väöl mittrekke.” Prins Rob: Ïch bön eine geëmansiepeerde prins, laot mien vrouw vriej mit die daag!”. Ein vastelaovesfees in ’t teike van ’t sjaop. Alle in Remunj rondriejende wages kriege twee klein sjäöpkes oppe achterkantj, de hoesorde van de prins: sjäöpkes en es geer mit ‘m oet gaot aete, besjtel dan maar ein sjóttel sjaopevleis. Dan bedank d’r uch ongetwiefeld mit ziene liefsjpreuk:

In Sjaopsnaam Aangenaam!

Hans II Straus

Perseneel van de Prins

Prins Rob II en ziene sjtaaf: v.l.n.r. sjeffäör Paul Perriëns,
de prins zellef, Lei Meijs en Rob Vastert.

Sjtadsprins Rob II van D’n Uul haet veur zien perseneel gekaoze oet ziene grote vrunjekringk. Hae leut zich helpe door echte en biejzónjer door de wol gevèrvde Uule. Óm te gebinne koos hae Rob Vastert (55) es ziene eerste adjudant en regeleer. Naamgenoot Vastert is al vanaaf 1973 lid van D’n Uul, zoot heel lang in ’t algemein besjtuur en is ouch al vanaaf ’73 lid van de techniese kemissie (tc). Rob Vastert haet tied zat óm de prins te óngersjteune want hae is vriegezel(lig). Vastert is sjpesjalis op ’t gebied van de heremode, is hobbie-kastelein, eine echte Amsteltieger en ómdet hae oppe de Vinlosewaeg woont, lid van de vastelaovesvereiniging CV de Woelratte.

Adjudant nómmer twee is Lei Meys (43), dae in de branjdbeveiliging zit, getrouwd is mit Brenda, det vreuger lid van de damesgarde van D’n Uul waas en vader van twee dochters: Nadine en Yvette. Lei waas in 1988 sjeffäör biej Uuleprins Jan II Heuvelmans. ’t Prinselik triejo is kómpleet mit Paul Perriens (47) , bedriefsleider biej Nedcaot en getrouwd mit Gea. De prinselikke sjeffäör is vanzellefsjpraekend eine “neet drinker” en lid van Verdeenste van de Blauwe Knoup