Big Benny krieg de Gouden Narrenkap
Big Benny krieg Gouden Narrenkap veur oetzunjerlike biedrage aan Limburgse vastelaovesmesiek
De Samewirkende Limburgse Vastelaovesvereniginge (SLV Limburg) reik dit jaor de prestigieuze Gouden Narrenkap oet aan Big Benny, de volkszénger oet Remunj, ziene echte naam is Ben Peters. De Gouden Narrenkap, dae sins 1962 sjlechs einmaol per drie jaar waerdt toegekind eert eine arties of groep dae zich langdoerig en op oetzunjerlike wieze verdeenstelik haet gemaak veur de Limburgse vastelaovend. Big Benny ontvingk de Gouden Narrenkap (hoogste Limburgse carnvalsbekroning veur artieste) veur zien meer dan dertig jaor doerende biedrage aan de Limburgse carnavalscultuur.
Sins zien debuut in 1992 in ein klein zaelke in Remunj haet Big Benny, gebaore op 18 desember 1964, zich óntwikkeld toet eine icoon van de vastelaovend. Mit zien krachtige sjtum, energieke optraejes en unieke interaksie mit ‘t pebliek bringk hae generasies same. Hits; Riet aop dae tap, Limbo Party en Oh Oh Kammeraod zeen oetgegreujd toet klassiekers die tiedes vastelaovend in gans Limburg waere mitgezónge. Mit vief albums en zeve singles ónger Marlstone Productions haet Big Benny ein onoetwisbare sjtempel gedrök op de Limburgse carnavalsmesiek. Zien optraejes op grote ivvenemente, zowie de 11e van de 11e in Remunj (en eerder in Mesjtreech) en op vastelaoveszaoterdaag in de Zoepkoel in Venlo, sjteit garant veur ein onvergaetelike sfeer. In 2014 goof Big Benny -35 jaor carnavalsarties- in Ahoy te Rotterdam ein groot jubeleijemconsert.
“Big Benny is ein laevende legende binne de Limburgse vastelaovend,” zaet Bart Maes, president van Samewirkende Limburgse Vastelaovesvereniginge. “Zien passie en plezeer bringe de carnavalsgeis toet laeve en verbindj miense van alle laeftieje. Mit de Gouden Narrenkap ere veer ziene tomeloze inzat en blievende impact op óze vastelaovenscultuur.”
De offesjele oetreiking van de Gouden Narrenkap aan Big Benny vind plaats ónger ein feestelike seremonie op zaoterdag 29 november 2025 in Theater de Oranjerie in Remunj. Sjtadsvastelaovesvereniging D’n Uul sjluit hiemit häör 8x 11-jaorig jubeleijem aaf. Prominente carnavalsartieste en -vereiniginge zulle aanwezig zeen óm Big Benny te felisietere en same dit biezunjere moment te viere. ‘T aovendpergram is nog volop in óntwikkeling en hie-euver waerdt later meer bekind gemaak.
De Samewirkende Limburgse Vastelaovesvereniginge haet toet doelsjtelling ‘t in sjtand haje en bevordere van de vastelaovend es ein uiting van laevende volkscultuur en folklore in Limburg. Vastelaovend is ein belangriek óngerdeil van ‘t Limburgs dynamisch immaterieel erfgood; leedjes, verhaole, dialecten, ritewele, gebroeke en tradisies. Bie de SLV zeen de zeveteen grootste en aajdste stadsvastelaovesvereniginge van Limburg aangesjlaote.
