Carnavals tentoonstelling in het Vrijheidsmuseum
“‘De geest van de zotheid waait ook onder de moeilijkste omstandigheden waar hij wil.”
“De geis van de gekkigheid weijt ouch ónger de meis lestige ómsjtenj wo hae det wilt. “
Zo waas te laeze in de Limburgse gezet “De Nieuwe Koerier” in februari 1944. In de jaore 20 en 30 van de 20ste eeuw sjtóng de vastelaovend zjwaor ónger drök. Maar ‘t fees van alle feeste ging door en vónj in dae dónkere tied zelfs ‘ne nuje impuls Belaef det mit in de tentoonsjtelling
“Alaaf! & Heil Hitler! Carnaval in crisis, oorlog en vrijheid” in het “Vrijheidsmuseum” vanaaf 11 dec 2025 t/m 11 aug. 2026
De expositie brink de gesjiedenis van Vastelaovend veur, ónger en nao de Tweeede Waereldoorlog in greun-gael-rood kleure in beeld. In Duitslandj perbeerde de nationaal- socialiste dit volksfees te gebroeke as propeganda
In Nederlandj wól de Cleres ‘t Carnavalsfees aafsjaffe en in anger lenj waerde Carnaval gebroek óm de nazies belachelik te make. Ónger de bezatting moch d’r neet gefees waere en ‘t verhaol geit róndj det d’r aopelik gaar geine carnaval waerde gevierd ónger d’n oorlog
Nieks is minder waor, ‘t fees ging geweun door . Achter gesjlaote deure en sóms zelfs geweun op sjtraot. Det bliek oet zoväöl foto’s en verhaole die róndjgaon. Nao d’n oorlog laefde de Vastelaovend op as noojt teveure. D’r verangerde väöl aan det oeraad fees. En ‘t ware nao d’n oorlog dan ouch de vastelaovesvereiniginge die as eerste ‘n vrundsjappelike handj oetsjtoke nao häör Duitse naobers.
Bezunjer zeen neet allein de verhaole, maar ouch de unieke beelde, video’s en historische veurwerpe die geer in de tentoonsjtelling kint bekieke. Musea en vereiniginge oet onger angere Kölle, Basel, Wenen, Venlo, Den Bosch, Remunj, Kerkraoj, Mesjtreech en Bergen op Zoom sjtelle de paerelkes oet häör collectie ter besjikking aan ‘t Vrijheidsmuseum.
Zo kint geer zeen de Sjteek van d’n eerste nao-oorlogse vastelaoves prins, ( Prins Rein I van d’n Uul mit ziene liefsjpreuk “Veer laeve nog, waem duit ós get”), óntwerpe van Oeteldónkse Carnavalswages en unieke video’s van de optochte door ‘t sjtedje van plezeer veur en nao d’n oorlog. Centraal in de zaal sjteit ‘n grote replica van de luchtepaol dae in 1933 in Basel waerde geboewd óm Hitler te besjpotte.
Alaaf en Heil Hitler, Vastelaovend in ‘ne crisis, oorlog en vrieheid is ‘n tentoonsjtelling die ós verras, óntreurt en oos (vastelaoves)hert flotter leut kloppe. Te bekieke in ‘t “Vrijheidsmuseum” in Groesbaek vanaaf 11 december 2025 toet 11 augustus 2026.
