DE KATERS NEEL & D’N UUL REMUNJ
Sjtadsvastelaovesvereniging D’n Uul en Vastelaovesvereniging De Katers Neel, prizzentere op zóndaagmiddaag 5 november 2023 “KUUL, ‘t Katers-Uul-Leedjessjpektakel”. Dit vinjt plaats in De Sjter in Neel.
‘ne Eerste update: De aanmeljinge en leedjes sjtruime al lekker binne, ’t aantal van 11 leedjes is al gehaold. Mer Vastelaovesleedjes zeen d’r “noojt, noojt, noojt, noojt, noojt genóg!” Zo wie al aangegaeve kint ’r ouch mit ‘ne cover waere mitgedaon. Alle inzendinge mótte waal in ‘t dialek zeen en d’r waert in de zjurering óngersjeid gemaak tösse Vastelaovesleedjes en covers. Ederein waert begeleijd door ‘n semi-perfessjenele live-band. Leedjes insjture kin dus nog altied!!! Sjtuur daoveur gans mekkelik ‘ne e-mail nao: info@dekaters.nl of info@dn-uul.nl.
Te winne: Naeve ‘ne geldjpries van € 555,55 veur de winnaar, zeen d’r 3 plaatse te verdeile op zowaal de Sjtasiefestasie es Vastelaoves Villaasj. Ouch zeen d’r inkele belangrieke ivvenemente van De Katers en D’n Uul wo me zich moog laote heure veur pebliek. De winnaar moog ouch optraeje op de 11devande11de.
Get nuujts: ónger ‘t KUUL kint ‘t pebliek det perzent is in de zaal, geliek digitaal mitsjtumme op de deilnaemers. Geer kint zo es pebliek de winnaar(s) bepaole vieje QR-codes.
