De Prins is dood, lang laeve de Prins!

Vriedaag 3 meert 2023
Det waerde mich mitgegaeve wie ich van ‘t podium waerde aafgetrokke en mit waerde genaome door de Aad Prinse.
‘t Is aafgeloupe, vaerdig! De herinnering blief, vanaaf noe kin ich trökkieke en nao de sjoon momente trök verlange.
Waat bön ich blie det D’n Uul mich gevraog haet óm de ról van Sjtadsprins in te völle, ‘n enorme eer en achteraaf bekeke, ein van de sjoonste dinger die ich in mien laeve höb gedaon.
Mien dank geit in eerste instansie oet nao mien vrouw en gezin, zónger häör had ich dit trajjek neet volgehaje. Ouch mien adjudante; Emiel , Marnix en Frank. Waat ‘n mechtige kaerels, veer höbbe dit same gedaon, same genaote en same volbrach. Vrundj is veur aeve, kammeraod is veur ‘t laeve!!
Dn Uul. Noojt gedach det ich zo gehech aan ‘n vereniging zól rake. Alle miense achter de sjirme die alles toet laeve bringe en oetveure. Van de Nach van de Nuje, vieje de Aovend van de Primäör en de Sjpegeltent, Verkesaovend toet ‘t aaftraeje en alles dao tösse-in. In ein waord, indrökwekkend. Ouch de miense die meer op de veurgróndj traeje. Vórs Dirk en adjudant Theo, ich daag ederein oet óm te doon waat zie doon op zón hoog niveau. De maedjes van de Damesgarde D’n Uul, Prinsekepel D’n Uul – Remunj. Ich höb mien hert verlaore aan uch, waat zeet geer toch ‘n sjtèl kwante ges. Ich zal uch echt noojt vergaete!
Sjtadsjeugprins Jimi I en zien gevolg. Heerlik óm mit dich en dien adjudante de veurganger van D’n Uul te moge zeen gewaes. Eur enthousiasme en drive höbbe mich toet ’t bot gemotiveerd!
Ouch mien mede-Prinse, grote dank! Dankzie uch höbbe veer same de Vastelaovend in Remunj oetgedrage op ‘n niveau det ich noojt verwach had. ‘t Waas mich ‘n eer óm mit uch op te moge trèkke.
Last, but not least… De Vastelaovesgengers van Remunj. Geer waart top! Veer höbbe d’r mit zien alle een topfees van gemaak waat ich noojt en te nimmer zal vergaete!
De Prins is dood, lang laeve de Prins. Ich wins de Sjtadsprins van Remunj 2024 van Sjtadsvastelaovesvereniging D’n Uul ‘n aeve zón sjoon sezoen es waat ich höb gehad. Ich sjpits mich op eur oetrope en zal d’r veur uch zeen.
Vergaet neet te laeve!