D’n Uul äöpent ‘Vastelaovesmezejem en Uule-fanshop’

Nao vief jaor ervaringe opdoon en eksperimentere mit etalages in de Hamsjtraot en de Heilige Geissjtraot én 2 keer ein oetgebreide invulling van ein tiedelike eksposisieruumte aan de Hamsjtraot, geit D’n Uul in häör 8×11-jubeleijemjaor ein grote sjtap wiejer. Veur de kómmende jaore waerdt op ‘t adres Hamsjtraot 19 ein permanent mezejem geäöpend wo de historie van D’n Uul en de ‘Remunjse Vastelaovend’ geëksposeerd zal waere. Daonaeve is d’r ruumte veur de Uule-Fanshop wo miense allerlei merchandise van D’n Uul kinne koupe. Ouch kinne Uuleleje hie terech veur ‘t ophaole van antreekaarte, ’t Zjwetskammezaol, de Uulewapper, sjpesiefieke jubeleijem-attributen en nog väöl meer.

Äopening en äöpeningstieje: Zaoterdage vanaaf 11 jannewarie toet de Vastelaovend. De in het mezejem aanwezige Uuleleje kinne de bezeukers väöl vertelle euver de Vastelaovend mér ouch euver de plaats van dit volksfees in de Remunjse historie. Veurluipig is de mezejemruumte alle zaoterdage toet de vastelaovesdaag van 10.30 toet 16.00 oer geäöpend. Ouch de res van ‘t jaor zal dit mezejem op bepaalde tieje geäöpend zeen.

Ónger ‘t motto ‘’t is neet nieks mer waal veur nieks’ is de antree veur nieks. Veur groepe is d’r de meugelikheid, taege ein kleine biedrage, op aafsjpraok, de prizzentasie te kómme bekieke, eventeweel in kombinasie mit ein kórte sjpesjale Vastelaoves-róndjleijing in en óm ‘t Uule-mezejem.

Äöpeningstieje mezejem:

Zaoterdaag         01-02               10.30 – 13.00

Zaoterdaag         08-02              10.30 – 15.30

Zaoterdaag         15-02               10.30 – 15.30

Zaoterdaag         22-02               10.30 – 15.50

Mit de Vastelaovesdaag is ‘t mezejem gesjlaote.