D’n Uul blief Vastelaovend oetdrage, sjpesiefieke aandach veur kienjer en jeugdige!

D’n Uul blief Vastelaovend oetdrage, sjpesiefieke aandach veur kienjer en jeugdige!

Oetrope Sjtadsjeugprins geplend op zondaag 6 fibberwarie in Foroxity Filmarena.
Sjtadsvastelaovesvereniging D’n Uul haet in lien mit ‘t jaormotto ‘Vaerkrachtig veuroet!’, eine volgende sjtap gezat in de veurbereidinge op de Vastelaovend. Omdet Vastelaovend dit jaor laat velt haet D’n Uul medio desember 2021 al ein waaloverwaoge besjloet genaome om op det moment neet alles af te gelaste, mér om aktievieteite door te sjuve nao fibberwari. ‘T Algemein Besjtuur van D’n Uul haet noe op basis van de aktewele situasie en ‘t persjpektief veur de kómmende waeke, alles aafgewaoge en besjloete genaome.
D’n Uul wil op zondaag 6 fibberwari de Sjtadsjeugprins van Remunj in de Foroxity Filmarena oetrope. In ein themasetting primair gerich op kienjer en jeugdige. Mit de Sjtadsjeugprins wil D’n Uul zich dit sezoen focussen op dae doelgroep die ‘t de aafgeloupe 2 jaor al zo meulik haet, de kienjer en jeugdige. Te meer omdet róndjóm Covid-19, gezeen de aktewele situasie en ‘t perspectief veur de kómmende waeke, d’r veur dae doelgroep weer meer kin en moog. Väöl kienjer zeen ouch aktief in de Uulefemilie zowie in de Kienjergarde, Jeuggarde, Uulejónges en Kienjermusical. D’n Uul vindtj ouch det de Sjtadsjeugprins mit zien adjedante ouch es boegbeeld kin fungere veur alle kienjer en jeugdige in de Remunjse (Vastelaovend-) samelaeving.
Hiej sjteit taege-euver det mit ein “blojend Vastelaovendhert” is besjlaote om in naovolging van 2021, in 2022 geine Sjtadsprins oet te rope. Nao de meining van D’n Uul is mit ‘t perspectief van de kómmende waeke, de kans namelik té gering óm ein kwalitatieveinvulling te gaeve aan de rol en de beteikenis van Sjtadsprins.
Daonaeve zeen en waere d’r ein reeks aktiviteite veurbereid, womit D’n Uul de kómmende waeke de essensie van Vastelaovend binne de meugelikheid wil oetdrage, wo meugelik sjpesiefiek gericht op de jeugdige Vastelaovendvierders. Dit gebeurt fysiek of via print of via sosjale mediakenalen van D’n Uul. ‘T zólle aktievieteite zeen die kórte veurbereidingstied en/of ein relatief eenvoudige organisasie höbbe, zodet optimale flexibiliteit meugelik is. Ouch veur de Sjolefestasie en Sjtasiefestasie waerdt ein alternatieve aktieviteit veurbereid. Kortom; D’n Uul gaat ‘Vaerkrachtig veuroet!’

Vórst-veurzitter Dirk I Franssen is greuts op waat de vereiniging veur ‘t 2e jaor op riej gerealiseerd haet en nog geit óngernaeme. “D’n Uul is greuts en dankbaar ten opzichte van alle aktieve leje in en gelieerd aan óze vereiniging, die zich de aafgeloupe maonje weer ónvermeujbaar höbbe ingezat óm alternatieve oet te werke. Dit pas perfek binne ós jaormotto ‘Vaerkrachtig veuroet!’ en toont wie de vereiniging zich blief inzitte óm de Vastelaovend oet te drage, juist in meujlike tieje! D’n Uul is naeve alle eige aktiviteite ouch in euverlik mit aanverwante partners en partieje óm róndj de Vastelaovesdaag initiatieve te óngersjteune of gezamenlik te óntploje, die ein biedrage levere aan ‘t oetdrage van het kultuurgood Vastelaovend.”