GAJUS 4-EVER!

Vriedaag 16 jannewarie waar de 2e edisie van het óngertösse al legendarisch GAJUS-fees: GAJUS DownTown!

In ‘n oetverkochte Bar DownTown zote 225 feesbeeste de sjpraekwäördelike tent op ziene kop. En det kos ouch neet angers; DJ ADMIN en Wiesse Oet Zuus ware de ganse aovend dao óm ederein op te drejje en te laote sjpringe en feeste. Tössedoor kwaam ouch nemes minder dan Big Benny nog veurbie óm ederein te laote zeen wie de Vastelaovend gevierd mót waere!

’t Waar van 19:00 oer toet 00:00 oer volle bak GAAS, zo wie ouch te zeen waar op de socials!

’t GAJUS zelf sjpraek euver ‘n wederóm ongeëvenaard sukses veur de jeug van gans (Midde-)Limburg en kiek noe alweer oet nao de volgende edisie! Want nao zón sukses kin ’t neet angers det die 3e edisie d’r zeker geit kómme!

Door de sjteun van ónger angere Rik Dieteren Woningontruiming en Verhuizingen en de organisasie ware de kaertjes (€ 5) en de kónsumpsies (€ 2,50) veur de jeug ouch nog ‘ns heel betaalbaar. En ouch dao zeen veer bie ‘t GAJUS greuts op.