Jaorlogo 2023

8 april 2022

Geachde Uuleleje, bèste Uule,

Aafgeloupe jaor zeen veer “Vaerkrachtig Veuroet” gegaon, waar Vastelaovend nog altied mit aafstandj, mer waal ’t sjoonste. ’t Jaormotto 2022 “Vaerkrachtig Veuroet”, haje veer neet baeter kinne oetdrage. Veer höbbe sjteeds gekeke waat veer allemaol kósde organizere en det haet ós ouch ‘ne prachtige Uule-Vastelaovend gebrach.

Noe veer Halfvaste net pas achter de rök höbbe, zeen veer ós d’r van bewös det geer op dit mement waarsjienlik nog neet bezig zeet mit de Vastelaovend 2023. Aevel alvas get dao-euver naodinke kin gein kwaod. D’n Uul geit namelik alweer richting Vastelaovend 2023 en daoróm wille veer uch tradisiegetroew vraoge óm mit ós mit te dinke.
Tied veur ‘t jaormotto 2023 van Sjtadsvastelaovesvereniging D’n Uul.Gaer vraoge veer al oos leje óm alle kreatieve hersesjpinsels op pepier of sjirm te zitte. Dink kunstig, mit väöl fantezie, probeer orzjeneel en vinjingriek te zeen. ’t Kin neet gek genóg waat ós betruf. Det jaormotto waert netuurlik ouch weer gedrök op oze jaormedalie en ónger ’t sezoen oetgereik aan miense binne en boete de vereniging.Drie van de sjpaarzame eise zeen det ’t logo van de vereniging (inklusief de wäörd Sjtadsvastelaovesvereniging D’n Uul Remunj of D’n Uul Remunj), ‘t jaortal 2023 én ’t sjtadswaope van Remunj drin verwirk mótte zeen. Es geer waal ‘n sjoon motto höb bedach, mer mesjien meujte höb mit ‘t grafische óntwerp, laot ’t dan aeve weite. Meugelikerwies kinne veer uch ’n hendje helpe.

Haol de potloje of toetseborde teveursjien en gooj al eur iedeje droet. Mesjien waert eur inzending ’t nuje jaormotto en kump dan ouch op de jaormedalie 2023 te sjtaon! ’t Dageliks Besjtuur van D’n Uul zal bekieke wèlk sjoon motto de eer haet óm kómmend sezoen op de jaormedalie te sjtaon. ‘t nuuje jaormotto waert bekind gemaak ónger de ALV op 15 juni 2022. Noteer daoróm ouch alvas de datum van de ALV op 15 juni 2022 in eure aggenda estebleef.

Geer kint eur inzending toet vriedaag 30 april opsjture nao: secretaris@dn-uul.nl