Jaorraeje 2025 Veurzitter

Geachde aanwezige leje van Sjtadvastelaovesvereniging D’n Uul,

Ach ach, waat waar ’t ein prach! In ’t sezoen wo–in D’n Uul ziene 88e verjaordaag vierde,moog ich ónger dees ALV euver verenigingsjaor ’24-’25 veur de 6e keer es eure veurzitter de jaorraeje oetsjpraeke. Wo ich in 2024 oetsjprook det de tied vloog ómdet veer op ‘n paar daag nao ‘t kórts meugelike vastelaovessezoen hadde, kan dit jaor obbernuuj gesjpraoke waere euver de tied dae gevlaoge haet. Want waat ‘n kelender technisch gelök hadde veer en kwaam ‘t good oet det veer op ‘n paar daag nao in 2025 ‘t langs meugelike sezoen höbbe gehad.

Mit ‘Ach Ach, waat ein prach’ bedach door Senator Ton Hensen en ’t 8×11-sentrale thema‘verbinjing’, kósde de jubeleijemivvenementeen–aktiviteite good ingepas waere baovenop oos regulier pergram. Mit ouch nog fantastisch waer ónger de vastelaovesdaag zelf, vriedaagen zaoterdaag waar ’t ‘n bietje tricky; kónkludeer ich det oze slivveneer ‘ne Uul mót zeen of op zien mins D’n Uul ‘n werm hert toedreug.

Oze sikkertaris brink dalik ’t jaorversjlaag mer ‘n paar zake beneum ich in mien jaorraeje op vereinigingsjaor gaer. De 2e edisie KUUL en 1e keer op Uulegróndj in ’t Witte Kirkske. Petra Linnartz en Marianne van Etten es ‘WaemAngers’, mit ’t nómmer ‘Ich wil sjoemele’ waerde de Vastelaovessjlager van groot Remunj. Sjoon det in oos 8×11-sezoen bekinde dames oet de “inner circle” van de PrinselikkeSjtadsgarde Faubourg St. Jacques, ouch mit duchtig get Uuleblood, gewónne höbbe. Volgend jaor weer op Katergróndj 26-10-2025, rizzerveer de datum zodet D’n Uul zorg veur ‘n gooj opkóms op Katergróndj.

In jannewarie kósde veer nao väöl jaore “inzat en oefene” mit Uule-ittelazjes en mit proofopsjtèllinge es tiedelike expositieruumteen nao väöl tummere, sjildere, en inrichte ‘ne primäör belaeve in de Uule-gesjiedenis én Remunj; de grande primeur van ’t Uulemezejem en Uulefanshop. Det in oos 8×11-jubeleijemjaor, geweldig! De sjtart waar sjoon en emotioneel, hie kinne veer de kómmende jaore aan doorboewe en oetbreije. Binnekórt kump signing en verleechting. ‘ne Dieke merci Ere-archivaris Louis, de ganse kemissie historie&archief en de TC.

Gezeen oos oetgebreijde pergram i.v.m. 8×11 en regulier is jaomer genóg ‘t noodzakelike mer waal versjtenjige besjloet genaome óm de Verkesaovend te annulere. Ouch in ’t verlengde van waat in de ALV ‘24 op finansjeel vlak is besjpraoke en es hoeswerk richting AB/DB is mitgegaeve óm sjerper te kieke en es neudigen meugelik “in te griepe”. Mit waardering veur de kemissie, d’r is good mit kórte liene gesjakeld mit ’t DB en deze ingreep gedaon. Artieste zeen doorgesjaove nao 2026, de kemissie dink nao euver ‘ne angere opzat dae nog besjpraoke waert en d’r is óngerhanjeld mit nul koste, zo brach get naodeiligs toch op väöl vlakke ouch get pózzetiefs i.v.m. in kóntraolezeen!

In ‘t bezónjer wil ich hie ouch de Kienjermusical beneume. Volges mich óngeveer 1111 man pebliek en terech mit obbernuuj zo’n fantastische veurstjèlling. D’r waar goje PR en marketing, zeer kritisch gekeke nao alle koste en eder döbbeltje waerde ómgedrejd. Daonaeve ouch nog 1300 euro subsidie binnehaole van ‘t kultuurfónds. Waat mich betruf ‘n veurbeeldig veurbeeld van ‘n kemissie. Chapeau!

Aeve trök nao jannewarie netuurlik, de Nach en Middaag wo veer oos twee Sjtadsprinselikejubeleijemveurgengers oetgerope höbbe en veur de 2e keer in de nuuj setting in de Oranjerie. Dees 2e edisie van de Nach en Middaag ware ‘ne sjtap veuroet mit o.a. verbaeterpuntje in de opzat, de inrichting en ekstra aankleijing van de theaterzaal. Hie bleek weer ins ’t geliek van ‘ne waalbekinde sjtèlregel; namelik det ‘n nuuj ivvenement of ‘ne nuje opzat meistal neet bie ‘n 1e edisie 100% sjteit. Dao zeen dökker 2 of 3 edisies veur neudig, dao kómme veer vanaovend waarsjienlik dökker euver te sjpraeke.

Mit de link nao häör oetreupinge wil ich op dees plaats netuurlik gaer dank zègke aan oos noe Aad Sjtadsprinselikejubeleijemgezelsjappe. De 80e óngertösse Aad Sjtadsprins Joost I Kruijssen mit liefsjpreuk ‘Same is neet allein!’ mit adjudante Lars Horbach, Roel Schenk en Martijn Wolters. En ein waek later de 57e óngertösse Aad Sjtadsjeugprins Fenn I Opbroek mit liefsjpreuk ‘Veer zeen Fenn van Vastelaovend!’ mit adjudante Floor Evers en Jurre Beurskens. ‘ne Waalgemeinde dieke merci veur wie zie D’nUul in oos 8×11 jubeleijemjaor zeen veurgegaon. Vol enerzjie veur jónk en aad hadde veer op Prinselik vlak oos jubeleijemsezoen neet baeter kinne winse. Chapeau en zeer väöl dank!

Vanoet oze Sjtadsprinse kóm ich netuurlik bie oos 8×11. De Vastelaoveswaeke ligke achter ós en de tied is letterlik veurbie gevlaoge mit prachtige herinneringe die ós altied bie blieve. Twee waekinje in de Sjpegeltent op de Mert midde in oos Uulehert, ’t hert van de sjtad mit 2 waekinje kómbi van 8×11 en “In de Sjpegeltent”, op de Sjpegeltent kóm ich apaart trök. Ich sóm op: De jubeleijem äöpening, de Sjtadsprinselike resepsie mit daonao ‘t Prinsebal, ’t Matinee, de prizzentasie van ’t blievend aandinke; ‘t Kienjerbook, de ónger-18 feesaovend veur de jeug door ’t Gajus, Grande Finale Loup nao de Pómp, Vrunj van Remunj, de Uulebrunch veur wirkende Uule en de 8×11-vereinigingsjubeleijemresepsie. En dan kwaam d’r ouch nog ‘n waekinj mit 2 veursjtèllinge van de Revue “VasteLOVEnd Same” achteraan.Wow, waat ‘n pergram höbbe veer belaef!

‘t DB Festiviteite sjtichting trok es kernteam 8×11 de ker. Twee jaor lang en ‘t aafgeloupe jaor zeer intensief waerde periodiek aafgesjtump same mit ’t vereinigings–DB. Belangrieke zake waerde besjpraoke, planninge gedeild, koers bepaold, gesjtuurd op financiën en zake besjlaote. Waat ich neet ónbeneump wil laote, is det ‘n breijd team van miense oet de ganse vereiniging en/of boete de vereiniging mer mit hert veur D’n Uul ‘n belangrieke ról vervölt. Vanoet de eerder geneumde verbinjing waerde gewirk mitvertroewe, mit mandaat en periodieke gezamelike aafsjtumming en sjturing door ‘t Kernteam 8×11 mit ‘t DB.

Alles in de lien die vanaaf 2020–2021 al is ingezat. Gesjtart mit aanpassing van de Festiviteitesjtichting-sjtatute en zeuktoch nao besjtuursleje die ouch beougde kertrèkkers zólle waere veur 8×11. Nao inkele kóntakte en ‘n paar gooj glazer wien bie Hattem same mit beoug sjtichtingsveurzitter aad SjtadsprinsRoger I Geurtz ware veer d’r mit oos 2 same oet en begós ’t avóntuur. Rick Nillesen waerde gesjtrik es sikkertaris en Maarten Uijterwijk kwaam get later in ’t vizier es penningmeister. Zo waar de aanzat van ’t kernteam 8×11 gebaore. Bezónjer sjoon ómdet Roger I in 2014 de lèste 7×11–jubeleijemprins waar en dus(same mit Rick en Maarten) de trèkker waerde richting 8×11. Mit de wetensjap en trökkiekend op oos 8×11-sezoen en sjtraks de pózzetieve siefermatige verantjwaording 8x11 kiek ich mit väöl genoege op dae tied trök dae ouch vanwaege anger C-raejes zeer hectisch en neet mekkelik waar en väöl oetdaginge kinde.Mit de wetensjap van noe sjteit hie ‘ne greutsevereinigingsveurzitter!

Mit veurgaonde besjpegeling sjtopde ’t neet. Vanaaf 2021 waerde ’t 8×11-kernteam door ’t leidend trio Rogér I, Rick, Maarten aangevölden häör beneum ich gaer. Christian van Ool, Fabiana Prestigiacomo, Rob Vossen, Guido In ’t Zand, Gijs van den Brand, Herm Belgers, Marjo Peeters, Spencer Hinzen en Dimfy Lambriex. Dimfy fungeerde daonaeve es 1e liaison richting ’t DB wobie ich es klankbord fungeerde. Zo waar in ’t ganse trajjek de ‘verbinjing’ gans róndj en waar ’t waord same. Vergaderinge, brainstorms, waekinjmeetings, insjtèlle van kemissies en subkemissies en aaf en toe ‘ne goje borrel volgde. Zónger emes tekórt te wille doon, wil ich sjpesjaal ’t ganse 8×11-kernteam, alle mitwirkers in jubeleijemkemissies en mien eige DB-kelegaas grote dank zègke veur alle insjpanninge de lèste jaore. Zónger häör waar de tied net zo hel gevlaoge mer zól d’r gein 8×11 zeen gewaes.‘ne Dieke merci!

De 3e edisie “In de Sjpegeltent” waar qua opzat, entourage en inhaldelik pergram top. Sjtraks kómme netuurlik ouch de financiën aan bod. Mer óm aan de eine kantj de kaaj hie al ‘n bietje oet de lóch te haole en aan de angere kantj ouch dees kemissie pózzetief te beneume wil ich sjtilsjtaon bie De Sjpegeltent. Det doon ich ómdet veurig jaor in de ALV terech aandachtspuntje zeen beneump en zake mitgegaeve richting AB en DB. Dao is keihel aan gewirk en veer wiste det ‘ne kómbi mit ’t 8×11 in potensie ‘ne fantastische kómbi zól zeen. Ouch is toen de samesjpraok al geveurdeuver kriteria veur nao de 8×11-Sjpegeltent-kómbi.

De kwalliteit van ‘t 3e jaor “In de Sjpegeltent” waar 100% Uulwaerdig, mer d’r is gebleke det óndanks alle meer dan 100% inzat door de kemissie ouch mit ‘n plan en siefermatige óngerboewing veur 2026 det ’t te risicovol is qua finansjele óngerligker en qua cash-flowveur in ‘n 4e kwartaal en 1e kwartaal van ‘n vereinigingsjaor. Daoróm haet ’t AB veurige waek good en pózzetief inhaldelik de samesjpraok geveurd en besjlaote óm vanaovend in de begroting 2026 gein Sjpegeltent meer op te naeme zowie de Sjpegeltent in de aafgeloupe 3 jaor is oetgeveurd. Waal waert ’r nog naogedeach euver alternatieve. Veur noe kemissie Sjpegeltent ‘ne dieke merci veur ruum 5 jaor hel werk en de prachtige momente.

Veur mien aafrunjing wil ich gaer ouch nog sjtilsjtaon bie de toekóms. En es ich toekóms zèk, dan hob ich ’t ouch euver oos toekómsbeeld. Es DB höbbe veer naogedach euver de aanpak en naobesjpraeking in AB is d’r ‘ne veurbereidings werkgroep aan de sjlaag gegaon waat geleid haet toet ‘n brainstormsessie mit ’t AB en kemissieveurzitters. Jao, dus ouch in ’t vereinigingsjaor wo in 8×11 vèlt zeen veer neet allein bezig gewaes mit feeste mer ouch mitbeleid veur de toekóms. Veer höbbe geanalyseerd, gekeke nao ‘t verleje, veuroetgekeke en inkele thema’s bie de kop gepak. Róndjóm ‘t jubeleijem is väöl pózzetieve enerzjie en det mótte veer SAME gebroeke óm veuroet te kieke.

Alle take oetveure en in zien geheel de vereiniging drejjend haje, det doon veer mitmiense… väöl miense. Daoróm is en blief ’t belangriek óm zo waal besjtaonde es nuje leje én zakelike partners te binje aan oos vereniging en de Uulefemielie. ’t Is belangriek det det neet allein in ‘t oettrèkkend gezelsjap gebeurt waat greujende is in alle facette, merouch in oze kemissies,’t AB en in ‘t DB. ‘t Aantal leje en zakelike partners blief sjtijge en ’t duit mich deug óm uch vanaovend mer leefs 6 nuje AB-leje te kinne prizzentere wo geer es ALV euver besjlis.

Laote veer de oetkómste op inhald van de brainstormsessie koppele aan ’t versjterke van oos finansjele toekómsbeeld en de bemanning van oos AB en oze kemissies. Dan is D’n Uul weer klaor veur de kómmende 11 jaor richting ’t volgende jubeleijem 9×11. Nog eine keer wil ich gaer hie vandaag sjtilsjtaon bie alle Uuleleje en daomit ouch häörpartners en gezinne. Óm häör enorm te bedanke. Zie höbbe allemaol de sjouwers euveral mit ónger gezat.

Geachde leje, ich sjloet aaf. Waat mich betref blief baove alles euverinj det Vastelaovend (veural de Uule-Vastelaovend) altied mit aafsjtandj ’t sjoonste is en det veer altied vaerkrachtig veuroet blieve gaon ouch es ’t sóms waal ‘ns Sjpegelend taegezit. Mer ouch mit de boodsjap det de kómmende maonje de tied veurbie blief vlege en veer in november 2025 de oetreiking van de Gouden Narrekap in Remunj aan Big Benny es sjloetsjtök van oos 8×11 jubeleijemjaor 2025 kinne belaeve. Inhaldelik kin ich uch al verklappe det belaof net zón klapsjtök te waere es oos jubeleijem-waekinje! En dan höbbe veer mit 2025 zowaal in vereinigingsjaor 2024-2025 es 2025-2026, ‘n prachtig 8×11-jubeleijem toet in de haorvate genaote!

Ich dank uch veur eur aandach!